Read Toraja-Sa'dan 1 TIMOTIUS 1 Bible Online

1 TIMOTIUS 1 - Toraja-Sa'dan bible

1 TIMOTIUS 1

¹Iate sura’ lu dio mai Paulus, rasulu’Na Yesu Kristus tete dio pepasanNa Puang Matua, To pakarimmananta, sia dio mai Yesu Kristus kapa’rannuananta,

²diparampo lako Timotius, anak tongan-tonganku diona kapatonganan. Narampoimoroko kamaturu-turuan sia kamamasean dio mai Puang Matua Ambe’, sia dio mai Kristus Yesu, Puangta.

³Melo ke torropoko dio Efesus susitu kupalakunna lako kalemu, tongku male lako Makedonia, ammu pa’parentanni lako ba’tu pira-pira tau, da napa’pangadaran pangadaran senga’,

⁴ba’tu umbudanan ulelean tang tongan sia pangosso’ tae’ upu’na tu umpabu’tu penunnung tang kebattuan losong na iatu ungkaritutui kombongan lan kapatonganan, Napa’pepasanan Puang Matua.

⁵Na iatu patunna pangadaran, iamotu pa’kaboro’ bu’tu diong mai penaa tang kera sia sukaran inaa melo sia kapatonganan lantuk.

⁶Na den ba’tu pira-pira tu sepang dio mai te ianna te, anna ma’palulako ulelean tang kebattuan.

⁷La morai pandita Sukaran aluk, moi anna tae’ naissanni tu apa napokada sia iatu namanassainna.

⁸Apa taissan kumua iatu Sukaran aluk melo, ke napalalo meloi tau susitu sipatunna siamo,

⁹sia ke nakanassai kumua iatu Sukaran aluk, tangia dipadenan to malambu’, sangadinna to battuk sia to matoro, to tang mekaaluk, to ponno kasalan, to tang ungkasiri’ kamaindanan sia tang massipa’, to umpatei ambe’na sia indo’na sia mintu’ to papatean,

¹⁰to ma’pangngan buni sia to sigau’ sala padanna muane, sia to umboko tau, to buttokan sia to menggata tang tongan, sia apa-apa tu sisalanna pangadaran mepamanaman,

¹¹situru’ Kareba-kaparannuan umpa’peissanan kamala’biranNa Puang Matua, tang dilambi’ karongkosanNa, iamo dipakambiranna’ to.

¹²Ma’kurre sumanga’na’ lako Kalena tu umpamatoto’na’, Iamotu Kristus Yesu Puangta, belanna Nakatappa’imo’, anNa patamana’ lan te pentoean iate,

¹³moi angku to pa’kada solangan sia to palolan sia to pa’pakario-rioan tonna dolona; apa dikamaseimo’, belanna mintu’na tu iannato kupogau’ diona kabagangku tete katangma’patonganangku.

¹⁴Apa iatu kamaturu-turuanNa Puangta tarru’ lempan tonganmo sisola kapatonganan sia pa’kaboro’ tete lan Kristus Yesu.

¹⁵Manappa’ te kada iate sia sipatu tongan ditarima, tu nakua: saemo tu Kristus Yesu tama te lino ungkarimmanni to kasalan; na iatu mintu’na tau iato, akumo tu losongna kasalan.

¹⁶Apa inde sia tu bannangna angku mangkamo dikamasei, tu kumua iatu aku losongna kasalan Nanii umpa’pekitanan nasangi Yesu Kristus tu kama’tanan penaanNa, angku dadi misa’ sangka’ lako mintu’ to ma’patongan tete dio Kalena undinna, umpangudui katuoan sae lakona.

¹⁷Mintu’na kadipangkeran sia kamala’biran lu lako Datu umparenta attu siosso’ Iamo Puang Matua tu tae’ kasangganganNa sia tang dikita, sia Puang Misa’ri, tontong sae lakona. Amin.

¹⁸Inde sia tu pepasan kupabarakkanangko, e, anakku Timotius, situru’ tu mintu’ pa’nubua’ dipokada dolo diona a’gammu, kumua anna pa’nubua’ iato mupomatoto’ lan kapararian melo.

¹⁹Ammu manda’ untoe kapatonganan sia lako penaa ma’pakilala, tu ba’tu pira-piramo tau ussuale pala’i, anna sabu’ kapatongananna.

²⁰Susimo Himeneus sola Aleksander to, tu mangka kusorong lako deata bulituk, kumua anna diada’ da anna ma’kada solang.