Read Toraja-Sa'dan 1 TIMOTIUS 2 Bible Online

1 TIMOTIUS 2 - Toraja-Sa'dan bible

1 TIMOTIUS 2

¹Iannamoto bunga’na pa’pakilalangku, la mipangandoan sia mipassambayangan sia mipalakuan sia la mipa’kurre sumangasan tu mintu’ tau;

²tu mai mintu’ datu sia mintu’ to kapua, anta tuo manaman sia marampa’ situru’ mintu’ kamenomban sia sipa’ melo.

³Iamo melona susinna to sia naala penaanNa Puang Matua, Topakarimma- nanta,

⁴tu umporai ke mintu’i tau unnappa’ kamakarimmanan sia ullambi’ kapaissanan diona kamanapparan.

⁵Belanna iatu Puang Matua Misa’ri, na iatu ToparitangngaNa Puang Matua na tolino Misa’ri, tolino duka sia, iamotu Kristus Yesu,

⁶tu mangka ussorong Kalena napopela’bak mintu’ tau, nadipa’pekanassan lan attu mangka dipamanassa.

⁷Iamotu iannato dinii umpamanassana’ dadi to ma’palolang sia rasulu’ — tonganna te kupokada, tae’ angku mo’rang — , napoguru to kapere’ diona kapatonganan sia kamanapparan.

⁸Iamoto, iatu diongna penaangku, umba-umba inan nanii tu mai muane massambayang, umpatado pala’ mabusanna ma’uai ma’tan.

⁹Susi dukato tu mai baine la umpakei kalena pakean sitinaya sia naturu’ sipa’ sia siri’; tae’ kumua la ma’beluak diampinni’i sia umpake bulaan sia mattiara ba’tu pakean masuli’;

¹⁰sangadinna sitondon penggauran melo, susitu sipato’na lako baine ussanga kalena menomba lako Puang Matua.

¹¹Iatu baine la kappa bang melada’ sia umpamadiongan tongan penaanna lan mintu’na.

¹²Apa tae’ kueloranni tu baine mangada’i ba’tu untaloi muane, sangadinna la ma’loko-loko.

¹³Belanna Adam dipadadi dolo, namane Hawa.

¹⁴Na tangia Adam tu ditua’ ba’tang, sangadinna baineri tu ditua’ ba’tang tarru’, naurunganni untengkai parenta.

¹⁵Apa la maupa’, belanna ma’dadian tau, ke tontongi batta’ lan kapatonganan sia pa’kaboro’ sia kadipamasalloran sia kamassiparan.