Read Toraja-Sa'dan 1 TIMOTIUS 3 Bible Online

1 TIMOTIUS 3 - Toraja-Sa'dan bible

1 TIMOTIUS 3

¹Indemo tu kada sielle’ dikatappa’i: iake den tau umpapatui penaa tu toean to ma’panundu’, iatu patu penaanna to, misa’ toean melo tongan.

²Iamoto sipatu la tae’ sayuanna tu to ma’panundu’ sia la misa’ dukari bainena, to umpama’tan penaanna, kinaa, massipa’, ungkarimmanni to lendu’, naissan unnadai’ tau,

³tang pa’anggoro’, ba’tu passiboboran, sangadinna to sallo’ penaanna, tangia to passite’geran sia tangia to ungkaduangi doi’;

⁴sangadinna to umparenta mana’pa to lan banuanna sia unnada’ kinaa anakna anna mengkaola lako kalena.

⁵Apa iake tang naissanni tu tau umparenta to lan banuanna, umba la nakua ungkambi’i tu kombonganNa Puang Matua?

⁶Da na ia tu to mane tama pekaalukan, napomatampoi manii, anna ruai ukungan susi deata bulituk.

⁷Sia sipatu duka napokada melo to salian tu sanganna da anna sayuan sia naala poyana deata bulituk.

⁸Susi dukato tu mai pa’kamaya, la massipa’, da anna popa’pangka lilana, da anna pa’anggoro’ da anna mesaro bu’tu kadake;

⁹la unnampui kapatonganan tang paan lan sukaran inaa masallo’na.

¹⁰Sia la ditiro dolo tu tau iato, namane tama untoei tu pentoean pa’kamaya, ke tae’i sayuanna.

¹¹Susi dukato tu mai baine (na) la massipa’, da nama’palele beko, sangadinna la umpama’tan penaanna sia dikatappa’i lan mintu’na.

¹²Iatu pa’kamaya la misa’ri bainena, sia la umparenta mana’pa anakna sia to lan banuanna.

¹³Belanna iatu to mangkamo untoe meloi tu pentoean pa’kamaya, dipangka’ tongan sia malona’ penggirikanna umpalolang pentoeanna tete dio kapatonganan lako Kristus Yesu.

¹⁴Kusura’ mati’ te, moi angku sangai la madomi’ tonganna’ male mati’.

¹⁵Apa iake marempana’ male mati’, muissanmo to, kumua umba nakua sipato’na tu gau’na tau lan banuanNa Puang Matua, iamotu kombonganNa Puang Matua matontongan, napopatongkon sia napoparandangan katonganan.

¹⁶Sia natongannimo tau tumba kapuana tu apa katangpaanna pengkaolanta kumua: Iamotu dipasombo lan batang kale tolino, Natonganni Penaa, payan lako malaeka’, dipa’peissanan lako mintu’ to kapere’, dikatappa’i lan lino, diangka’ tama kamala’biran.