Read Toraja-Sa'dan 1 TIMOTIUS 4 Bible Online

1 TIMOTIUS 4 - Toraja-Sa'dan bible

1 TIMOTIUS 4

¹Apa maleso tongan tu kadanNa Penaa, kumua undinna, la sorong boko’ tu tau pira dio mai kapatonganan, belanna menturu’ lako penaa ma’papusa sia lako ba’tu pira-pira pangadaranna deata masussuk,

²tu belanna kabelo-pudukanna mintu’ to mo’rang, tu butung to disarrang bassi sukaran inaanna.

³Tu umpa’gagai ma’rampanan kapa’, sia umpemalii ma’rupa-rupa kande tu Napadadi Puang Matua, kumua nakandei situang kurre sumanga’ to ma’patongan, unnissan kamanapparan.

⁴Belanna mintu’na tu Napadadinna Puang Matua melo sia moi misa’ tae’ nasipatu ditibe, ke ditimangi kurre sumanga’,

⁵belanna iatu iannato napamasero kadanNa Puang Matua sia passambayang.

⁶Iake mupa’pakilalanni te mintu’na te lako sangsiuluranta, manassa ikomo tu to masokanNa Kristus Yesu, to ungkaritutuiko kalemu diona kada pa’patongan sia mintu’ tu pangadaran melo tu mupengkaolainnamo.

⁷Apa tumpui tu mintu’ ulelean tang kebattuan sangrupa uleleanna to matua baine. Sangadinna popa’biasako kalemu lan kamengkaolan.

⁸Belanna iatu umpopa’biasa kale sidi’ri patunna, apa iatu kamengkaolan den patunna lan mintu’na, belanna den pangallu’ katuoan dio, la totemona la iatu la saena.

⁹Iamote tu kada sielle’ dikatappa’i sia sipatu tongan ditarima.

¹⁰Belanna ia dukamo napobannang te angki tang ussa’ding ta’ka’ sia mengkulle-kulle, belanna umporannumokan Puang Matua matontongan, Iamo ungkatirinnai mintu’ tolino, ma’iringanna mintu’ to ma’patongan.

¹¹Mintu’nate iannate la mupa’pepasanan sia la mupa’pangadaran.

¹²Da naden tau untunaiko belanna mangurako, sangadinna la dadiko misa’ sangka’ to ma’patongan, la diona buangan kada, la diona gau’, la diona pa’kaboro’, la diona kapatonganan ba’tu kamaseroan.

¹³Karitutuiko kapa’basan sia kapa’pakilalan sia kapa’pangadaran sae lako saeku mati’.

¹⁴Da mukasalioi tu pa’kamasean lan kalemu, tu dipa’kamasean lako kalemu tete dio pa’nubua’ tonna remme’iko limanna mintu’ penatua.

¹⁵La mupalan ara’ tu iannato, sia la mupangu’gui, anna payan lako mintu’ tau tu sakakendek-kendekammu.

¹⁶Kanandai tu kalemu sia pangadarammu; la tontongko batta’ lan iannate, belanna la mupomakarimman umpogau’i te iannate, la iko, la iatu mintu’ to umperangiiko.