Read Toraja-Sa'dan 1 TIMOTIUS 5 Bible Online

1 TIMOTIUS 5 - Toraja-Sa'dan bible

1 TIMOTIUS 5

¹Da musaraba-rabai to matua-tua, sangadinna pakilala susii misa’ ambe’; sia iatu mai to mangura pasusii siulu’;

²sia iatu mai to matua baine pasusii indo’, sia iatu mai manguranna pasusii siulu’ situru’ kamaseroan lan mintu’na.

³Kasiri’i tu mintu’ baine balu tu balunna tongan.

⁴Apa iake den to balu den anakna ba’tu ampona, la umpogau’ kapengkaolan lako to lan banuanna dolo, sia umpakkanni kameloan to matuanna, belanna iamote tu melo dio oloNa Puang Matua.

⁵Iatu baine balu tongan, tu misa-misamora, iamo marannu lako Puang Matua, sia tontong batta’ lan palakunna sia passambayangan allo bongi.

⁶Apa iatu unturu’na bang kamoraian penaanna, tonganna tuo apa samanna mate.

⁷Iamote tu la mupasananni, da naden sayuanna.

⁸Apa iake den tau tang ungkaritutui sangdadianna, ontongrika to lan banuanna, iamo umpeongannimo kapatonganan to, sia ondong ia kadakena, na to tang ma’patongan.

⁹Da nadipatama sura’ tu baine balu ke tae’pi naganna’ annan pulona taunna dadinna, sia ke tae’i namisa’ bangri tu muanena,

¹⁰sia iatu kaleleanna diona penggauran melo, belanna ungkaritutui anakna, sia ungkarimmanni to lendu’, sia umbasei lentekna to massallo’, sia untundui to narua sussa, sia umpengkullei mintu’ penggauran melo.

¹¹Apa da mupatamai sura’ tu mai baine balu mangura, belanna ianna saemo kamoraianna tu sisalanna Kristus, la moraimi kemuane,

¹²sia narua ukungan, belanna ullendai pangallu’ dolona.

¹³Sia randuk pole’pa umpopa’biasa kalena tukkunan sia ullelei banua; apa tangia kumua tukkunan manna, sangadinna pa’uleleanan duka sia umpatangma’rundunan tau sia unnulelean apa tang pato’ dipokada.

¹⁴Iamoto, iatu diongna penaangku, la kemuane nasang tu mai baine balu mangura, sia la ma’dadian tau sia ungkaritutui tu lanna banuanna, sia da anna benni lalan pa’posangan tu uali la nanii umpalele bekoki’.

¹⁵Belanna inang den ba’tu pira-pira tau sepangmo unturu’ deata bulituk.

¹⁶Iake susinna misa’ baine ma’patongan den baine balu dio rapunna, ia la natundui, da napamatana’i tu kombongan, anna belai kombongan untundui tu mai baine balu tongan.

¹⁷Iatu mai penatua-penatua manglopian melo, sipato’ dikasiri’ manglokkon penduan, ontong pole’ tu to umposara’ kadanNa Puang Matua sia ma’pangada’.

¹⁸Belanna susite tu kada lan Sura’ Madatu: Da mukambui tu sapi marassan manglullu’ sia nakuapa: Iatu to mengkarang, manassa den sarona.

¹⁹Da muperangii tu pa’parapa’na tau diona penatua, sangadi ke denni to sa’bi da’dua ba’tu tallu tau.

²⁰Iatu to umpogau’ kasalan, la mulo’bo dio tingayona sola nasangi, anna mataku’ tu senga’na.

²¹Kupa’pepasanan tongan lako kalemu dio oloNa Puang Matua sia Kristus Yesu sola mintu’ malaeka’ ditonno’, la mukaritutui tongan tu mintu’nate situru’ tang la pakayun bimbang, sia da mipogau’ apa-apa umpalosongan misa’ tau anna iatu mai senga’na.

²²Da ammu sa’ka’ bang urremme’i lima moi misa’ tau, sia da mutamai kasalanna to senga’. Karitutui maindanko kalemu.

²³Damo napaka uai manna muiru’, sangadinna iru’i tu uai anggoro’ sisidi’, belanna pa’di’ tambukmu sia iatu saki untu’bai nenne’ko.

²⁴Iatu kasalanna tau pira payan bang, naurunganni undoloi lako ukunganna; apa iatu kasalanna tau pira undipi namane payan.

²⁵Susi dukamoto tu mintu’ kameloan, den tu payan bang, sia iatu senga’na na iato, tae’ duka nala tontong bang kabunian.