Read Toraja-Sa'dan 1 TIMOTIUS 6 Bible Online

1 TIMOTIUS 6 - Toraja-Sa'dan bible

1 TIMOTIUS 6

¹Samami to naluang samban kakaunanan, la nasanga sipato’ tu puangna napangke’ lan mintu’na, kumua da anna ditelle tu sanganNa Puang Matua sia pangadaranNa.

²Iato to umpopuang to ma’patongan, da natunai tu belanna siulu’mo, sangadinna la samengkaola-olanna lako puangna, belanna ma’patongan tu puangna sia dipakaboro’, tu birisan umpogau’ kameloan. Susimo la muadaranni to sia la mupakilalanni.

³Iake den tau umpa’pangadaran pangadaran senga’, tang unturu’ kada tongan, iamotu kadanNa Puangta Yesu Kristus, sia pangadaran situru’ kamengkaolan lako Puang Matua,

⁴tau iato matampo, natae’ apa naissan, sangadinna bomboan massita’gen sia massitamben kada, tu naninna bu’tu kamagallian, kasigagan, ma’rupa-rupa pa’palele beko sia pa’kapang-kapang kadake,

⁵iamo kasisakkan napabu’tu tu to tang ma’runduanan tangnga’na sia disabakkimo tu kamanapparan, tu ussangai kumua iatu kamengkaolan misa’ tangnga’ la dinii mesaro.

⁶Iatu kamengkaolan tonganna kapua sarona, ke narondongi penaa manaman.

⁷Belanna moi misa’ apa tae’ tabaa tama te lino, iamoto dadi tae’ duka misa’ apa la tabaa tassu’ lan mai.

⁸Iake denni kande sia pakean dio kaleta, taposilasan bangmi.

⁹Apa iatu to ungkamorai la sugi’, tobang tama peroso sia poya sia buda kamaduangan baga sia umpabu’tu kamaparrisan tu umpatallan tolino tama kasanggangan sia kamasolangan.

¹⁰Belanna iatu kabasisi-inaan lako doi’, iamo garonto’na mintu’ kakadakean; na iatu to undaka’nai tu iannato, pusamo diona kapatonganan sia umpatamai bungin lassu kalena.

¹¹Apa iatu iko, taunNa Puang Matua, pallaiangko kalemu dio mai tu mintu’nato, sia tuntunni tu kamaloloan, kamengkaolan, kapatonganan, pa’kaboro’ kabattaran sia sorong inaa.

¹²Pembela-belai lan rari melona kapatonganan, pellambi’i tu katuoan matontongan, tu ditambammoko, sia mangkamoko unnaku pangakuan tongan dio tingayona buda sa’bi.

¹³Kupasan lako kalemu dio oloNa Puang Matua, tu umpatuo angge maritik sia dio oloNa Kristus Yesu tu ungkatottongi tu pangakuan tongan dio olona Pontius Pilatus.

¹⁴Ammu karitutui tu parenta tang la mupaattangan sia tang la mupasayuan sae lako kakitananNa tu Puangta Yesu Kristus.

¹⁵Iatu iannato ke attunnamo la Napa’pekitanan Puang ma’kada misa sia tang dilambi’ karongkosanNa. Datunna mintu’ datu sia Puangna mintu’ pekapuangan.

¹⁶Tu Ia manna unnampui tu tang mate, sia unnesungi arrang tang dirandan, tu tae’ lenpa tau untiroi ba’tu ma’din untiroi, na mintu’na kamala’biran sia kapaan matontongan lu lako nasang Kalena! Amin.

¹⁷Pakainga’i mintu’ to sugi’ lan te lino, kumua da anna pamadao penaanna, sia da narannuanni tu kasugiran tae’ natontong, sangadinna langnganri Puang Matua, tu umpalempan mintu’ apa Napa’kamasean lako kaleta, taangkaran parannui.

¹⁸Anna ma’gau melo sia umposugi’ penggauran melo, sia masokan, sia naporai mantaa-taa,

¹⁹anna rampunanni kalena tu pong la napoparandangan, ke attu la sae, anna appa’i tu katuoan tongan.

²⁰E Timotius, karitutui tu pangingko’ dipa’pekambiran lako kalemu, sia boko’i tu ulelean punala bang sia tae’ gai’na sia kasita’genan ussita’genni kapaissanan tang pato’ disanga kapaissanan;

²¹denmo tau pira unnakui, anna pusa dio mai kapatonganan. Narondongmorokomi pa’kamaseanNa Puang Matua.