Read Toraja-Sa'dan 2 TIMOTIUS 1 Bible Online

2 TIMOTIUS 1 - Toraja-Sa'dan bible

2 TIMOTIUS 1

¹Iate sura’ lu dio mai Paulus, rasulu’Na Yesu Kristus tete dio pa’poraianNa Puang Matua, situru’ pangallu’ katuoan, tu menggaronto’ lan Kristus Yesu,

²diparampo lako Timotius, anak pa’kaboro’ku. Narampoimoroko kamaturu-turuan sia kamamasean sia kamarampasan dio mai Puang Matua, Ambe’ sia Kristus Yesu, Puangta.

³Ma’kurre sumanga’na’ langngan Puang Matua, tu kupenombai susi nene’ to doloku situru’ sukaran inaa masero, kumua tae’ ka’tungku ungkilalaiko lan mintu’ passambayangku keallo kebongi.

⁴Belanna ungkilalai uai matammu, kupourungi mamali’ la ussitiroangko, kumua anna ponnoina’ kaparannuan;

⁵Situndu kukilalai tu kapatonganan lantuk lan kalemu, tu randuk diopa mai natuo lan penaanna nene’mu baine Lois sia indo’mu Eunike, apa kukatappa’i kumua den dukamo lan kalemu.

⁶Iamo bannangna to angku pakilalako, kumua ammu tundanni tu pa’kamaseanNa Puang Matua lan kalemu diona tu kamangkammu kuremme’i limangku.

⁷Belanna tangia kumua Penaa kamatakuran mangka Napa’kamasean Puang Matua lako kaleta, sangadinna Penaa kamatotoran sia pa’kaboro’ sia kauntaloian kale.

⁸Iamoto da mumasiri’ umpa’peissananni tu diona Puangta, sia da mupomasiri’i tu diona aku te dirante bassi, sangadinna la pada-padako umperasai kamaparrisan tu belanna Kareba-kaparannuan situru’ kamatotoran dio mai Puang Matua.

⁹Tu mangka ungkarimmanniki’ sia mangka untambaiki’ petamba masero, tangia sitinaya penggauranta, sangadinna situru’ tanan penaanNa Kalena sia pa’kamasean, inang dolo dikamaseangki’ tete dio Kristus Yesu na iatu tipamulanna attu,

¹⁰apa totemo napasombomo kasaeanNa Topakarimmananta Kristus Yesu, tu mangka unno’ton kamatean, anNa pabu’tui tu katuoan sia a’gan katangsanggangan tete dio Kareba-kaparannuan.

¹¹Iamora tu Kareba-kaparannuan dinii unnangka’na’ mendadi to pebaa kareba sia rasulu’ sia guru.

¹²Iamo bannangnato, angku perasai dukai te mintu’nate. Apa tae’ duka kupomasiri’i, belanna kuissan kumua minda tu kupatonganmo sia kukatappa’i, kumua Iamo kuasa la ungkarimmanni tu apa kupa’peannan landa’ lako tu Allo iato.

¹³Alai passangkaran dio mai mintu’ kada tongan, tu mangka murangi dio mai kaleku naturu’ kapatonganan sia pa’kaboro’ tete dio Kristus Yesu.

¹⁴Karitutui tu pangingko’ melo, tu dipa’pekambiran lako kalemu tete dio Penaa Masallo’ tu torro lan kaleta.

¹⁵Muissan sia te iannate kumua mintu’nato dio tana Asia memboko’mo dio mai kaleku; iatu tau iato, Figelus misa’ anna Hermogenes.

¹⁶Anna Puangmora umpa’kamasean kamamasean lako to lan banuanna Onesiforus, belanna ba’tu pempiran-pirammo umpakatana penaangku, sia tae’ napomasiri’i tu rante bassingku,

¹⁷sangadinna tonna rampomo dio Roma, natonganni tongan undaka’na’, sanaappa’ku.

¹⁸— Sangapaoi upa’ anNa benni Puang kamauparan anna appa’ kamamasean dio mai Puang, ke Allo iato, — ba’tu apa siapa tu nanii umposara’na’ dio Efesus, iko sia mandu unnissanni.