Read Toraja-Sa'dan 2 TIMOTIUS 2 Bible Online

2 TIMOTIUS 2 - Toraja-Sa'dan bible

2 TIMOTIUS 2

¹Iamoto, e anakku, mananna’ko lan pa’kamasean tete dio Kristus Yesu.

²Sia iatu muranginna dio mai kaleku, tu nasa’bii buda tau, pakambiranni to dikatappa’i, tu la sielle’ unnada’i pole’to senga’.

³La pada-padaki’ umperasai kamaparrisan, butung misa’ surodadu mapatoNa Kristus Yesu.

⁴Tae’ misa’ tu surodadu marassan parari, umposara’ kalena kinallona, ia manna ria la naposara’ tu la naposendena tu to umpangului.

⁵Sia iake sitoro’-bukui tu tau lan kapaningoan, tae’ nadipaluangi makota, sangadinna ke naturu’i susitu atoranna.

⁶Iatu to mara’ta’ ma’pa’lak, sipato’ ia dolo untammui tu burana.

⁷Palan ara’i tu kadangku, belanna lan mintu’ apa Puang la umbenko kamanarangan.

⁸Pengkilalai tu Yesu Kristus tarukna Daud, mangkamo malimbangun dio mai to’ to mate, susitu lanna Kareba-kaparannuan kupa’peissanan.

⁹Belanna iamira tu iannato angku perasai kamaparrisan, kuurunganni dirante bassi butung to sala’ kedo, apa iatu kadanNa Puang Matua tae’ nabelai dirante bassi.

¹⁰Iamo patunna to angku batta’ umpatananni tu mintu’na, belanna mintu’ to ditonno’, kumua anna kabu’tui tu kamakarimmanan, lan Kristus Yesu sola kamala’biran tontong sae lakona.

¹¹Inde sia tu kada la dikatappa’i: Iake mangkamiki’ mate Sola, la tuo dukaki’ Sola;

¹²sia iake batta’ki’ umpatananni, la ma’parentaki’ Sola; iake tapeonganni, la Napeonganni dukaki’;

¹³iake tang maruru’ki, tontong Ia maruru’, belanna tae’ nama’din la Napeonganni tu Kalena.

¹⁴Pa’pakilalanni te mintu’na te lako tau, sia pa’pakare’nan tonganni dio oloNa Puang Matua, kumua da nasita’genni tu kada tae’ bang patunna, sangadi la ussanggangi manna to urrangii.

¹⁵Pengkulle-kullei umpopennolo kalemu lako Puang Matua susito tongan, butung to tae’ namasiri’, belanna umpalolang malolo kada diona kamanapparan.

¹⁶Apa boko’i tu mintu’ ulelean punala bang sia tae’ gai’na, belanna iatu to susito napasakendek-kendekna bang tu katang-mekaalukanna.

¹⁷Sia iatu kadanna tu tau iato mandalan kandena susi bari’bo’; iatu tau iato Himeneusmo misa’ na Filetus,

¹⁸tu sepangmo dio mai kamanapparan, sia nakua kumua iatu kamalimbangunanna to mate dadimo, na ba’tu pira-pira tu tau napatibalik tu kapatongananna.

¹⁹Apa moi susito tae’ namatumba len, belanna iatu parandangan matoto’Na Puang Matua bintin, na iatu pearra’na, kumua: Natandai Ia Puang Matua tu taunNa; sia nakuapa: Minda-minda tu ussa’bu’ sanganNa Puang, la umboko’i kakelokan.

²⁰Lan misa’ banua kapua tangia oongan bulaan manna sia salaka, sangadinna oongan kayu sia litak duka; den pira diangkaran lako mala’bi’na den lako tang mala’bi’na.

²¹Iamoto, iake den tau umpamasero kalena dio mai tu tang maserona, iamoto tu dadi oongan diangkaran lako mala’bi’na, tu mangka dipamaindan, sipato’ napake puangna, sia sakka’ la diangkaran lako mintu’ pentoean maelo.

²²Apa randanangko kalemu dio mai mintu’ pa’poraian to mangura, ammu tuntun kamaloloan, kamarurusan, pa’kaboro’ sia sikaelo mintu’ tau, tu to masero penaanna metamba langngan Puang.

²³Tumpui tu mintu’ kasita’genan baga sia tae’ patunna, apa muissan kumua iatu iannato umpabu’tu kasigagan.

²⁴Tae’ napato’ tu taunNa Puang massigaga, sangadinna mabalele lako mintu’ tau, manarang mangada’i sia umpama’tanan penaa kakadakean;

²⁵sorong inaa unnada’i tu mintu’ to umbalii, kumua sangapaoi Napa’kamaseanni Puang Matua lako tau iato tu kamengkatobaran, naurunganni ullambi’i tu kapaissanan diona tu kamanapparan,

²⁶anna mengkilala sia tilendok sule dio mai poyana deata bulituk, tu ungkurungi, la umpogau’ pa’poraianna.