Read Toraja-Sa'dan 2 TIMOTIUS 3 Bible Online

2 TIMOTIUS 3 - Toraja-Sa'dan bible

2 TIMOTIUS 3

¹Sipatu la muissan, kumua iake attu ma’katampakanna la sae tu attu maparri’ tongan.

²Belanna buda tau la tuo misa sia ungkailui doi’, untendeng kalena, madao penaa, umpalele beko tau, umbali-bali indo’-ambe’na, tang ma’kurre sumanga’ sia tang mekaaluk;

³tang unnampui pa’kaboro’, tae’ namorai massikaelo, umpangrosoan tau, tang untaloi kalena, arasan, ungkagi’gi melona,

⁴patangnga’, masa’ga’, matampo, umpalosong kasendean anna iatu ungkamasei Puang Matua.

⁵Ma’matottong-tottong butung to ungkaritutui aluk, apa napeongannimo tu kamatotoran ungkaritutui aluk; toyangan dukako kalemu dio mai tu to susito.

⁶Belanna den tu tau iato umboko lalan tama banuanna tau anna patana’i tu mai ma’kada baine, tu nao’tonni kasalanna, narenden ma’rupa-rupa kamailuanna,

⁷tu tontong bang melada’, apa tae’ nabelai palambi’ untandai tu kamanapparan.

⁸Susi Yanes sola Yambres umbali Musa, susi dukamo tu tau iato mai umbali tu kamanapparan, iamoto tang ma’rundunan tangnga’na sia tang diangga’ tu kapatongananna.

⁹Apa tau iato tae’mo nalolo’, belanna la payan tu kabaganna lako mata malele susi kabaganna tu tau da’dua.

¹⁰Apa iatu iko unturu’moko pangadarangku sia gau’ku, sia lalan inaangku sia kapatonganangku sia kama’tanan penaangku sia pa’kaboro’ku sia kama’patariangku.

¹¹Sia mintu’ kadipakario-rioan sia kamaparrisan urrampoina’ dio Antiokhia sia dio Ikonium sia dio Listra. Apa Puang Matua urrampananna’ dio mai kadipakario-rioan, susinna tu mangka kuperasai.

¹²Ondongpi, mintu’ tu to la morai tuo mengkaola lako Puang Matua lan Kristus Yesu, la narampoi kadipakario-rioan.

¹³Apa iatu to kadake sia to patangnga’ la samasarrang-sarrangna kakadakeanna ma’papusa sia ia kalena duka pusa.

¹⁴Apa iko te la manda’ko lan tu mintu’na apa mangkamo mupelada’i, sia iatu mukatappa’inamo, belanna muissan minda tu munii mangka umpelada’i;

¹⁵sia tempon dio mai bitti’mu mutandaimi tu mintu’ Sura’ MadatunNa Puang Matua, tu ma’din umpakinaako la umpabu’tu kamakarimmanan tete dio kapatonganan lako Kristus Yesu.

¹⁶Mintu’na tu Sura’ Napa’patudu-tuduan Puang Matua sia den gai’na lako kapangadaran, lako kapa’pakilalan, la umpakalolo kelokna sia la ma’patudu diona kamaloloan,

¹⁷anna palambi’ tu taunNa Puang Matua, sia sakka’ lako mintu’ penggauran melo.