Read Toraja-Sa'dan 2 TIMOTIUS 4 Bible Online

2 TIMOTIUS 4 - Toraja-Sa'dan bible

2 TIMOTIUS 4

¹Kupa’pepasanan tongan lako kalemu dio oloNa Puang Matua sia Kristus Yesu, tu la umpaolai salunna mintu’ to tuo sia to mate, sia tete dio duka kasaeanNa sia kadatuanNa, kumua.

²Palolangi tu kada iato, matoto’ko umparampoi, la iake nakamorai la iake nakanokai tau, pakanassanni tu salana tau, ta’tanni, pakilalai situru’ kama’tanan penaa sia situru’ pangadaran.

³Belanna undinna la sae tu attu nanii tau tang untananni tu pangadaran tongan; belanna kamakattikanna talinganna anna rampunni lako kalena tu mai guru situru’ lalan pa’poraianna,

⁴napasalai talinganna tu tonganna, anna patanan lu lakoi ulelean tang tongan.

⁵Apa iatu iko mangingarangko lan mintu’na, pengkabatta’i tu kamaparrisan, pogau’i tu passanan tengko umpalolang Kareba-kaparannuan sia pasundunni tu pentoeammu.

⁶Belanna sakka’mo’ la dipemalaran dipopemala’ pantedok, sia attu kaussalaiangku te lino mandappi’mo.

⁷Kupembela-belai tonganmo lan rari melo diona kapatonganan, kusundunnimo tu tage’ku, kukaritutuimo tu kapatonganan.

⁸Na undinna sakka’mo makota kamalamburan, tu la Napa’kamasean Puang lako kaleku ke Allo iato, tu Tomangra’ta’ malambu’, sia tangia lako manna kaleku, sangadinna lako duka mintu’ to ungkamali’mi tu kasaeanNa.

⁹Pengkullei mumadomi’ male mai.

¹⁰Apa natampemo’ Demas, belanna napalosongmo te lino sia malemo ia lako Tesalonika; na iatu Kreskes male lako Galatia, na Titus male lako Dalmatia;

¹¹Lukas mannamo kusolan. Tambai tu Markus musolanni, belanna kapua patunna lako kaleku lan pentoean iate.

¹²Na iatu Tikhikus kusuamo lako Efesus.

¹³Iammu male mai, banna’ tu bayu landoku, tu kutampe dio Troas dio banuanna Karpus, sia iatu mintu’ sura’, ma’ondonganna tu sura’ balulang.

¹⁴Iatu Aleksander, pande tambaga, lendu’mo kakadakean napogau’ lako kaleku; Puang la umpapakkanni lako kalena tu sitinayanna penggauranna.

¹⁵Kanandaiko kalemu dio mai, belanna naea tonganmo tu kadangki.

¹⁶Iatonna bunga’ pebalingku tae’ bang tau misa’ tundu dio kaleku, sangadinna natampe nasangna’; kenna da siamo nadipamatana’ lako kalena tu iannato.

¹⁷Apa Puang urrondongna’ sia umpabatta’na’, kumua anna sundun kalelean tu kadipalolanganna Kareba-kaparannuan belanna aku sia anna rangii mintu’ bangsa; sia lessu’mo’ dio mai sadang singa.

¹⁸Puang la ullendokanna’ dio mai mintu’ penggauran kadake sia ungkarimmannina’ landa’ sae tama Parenta lanNa suruga; anna lu lako Puang tu kamala’biran tontong sae lakona. Amin.

¹⁹Salama’ku lako Priska sola Akwila, sia lako to lan banuanna Onesiforus.

²⁰Iatu Erastus torro diomo Korintus; na iatu Trofimus kutampe lan kamasakianna dio Miletus.

²¹Pengkullei male mai su’ding tae’pi anna attu kamadinginan. Iatu Ebulus na Pudes na Linus na Klaudia sola mintu’ sangsiuluran umparampo salama’na mati’.

²²AnNa Puangmora urrondong penaammu sia pa’kamaseanNamora Puang Matua urrondongkomi sola nasang.