Read Toraja-Sa'dan TITUS 1 Bible Online

TITUS 1 - Toraja-Sa'dan bible

TITUS 1

¹Iate sura’ lu dio mai Paulus, taunNa Puang Matua sia rasulu’Na Yesu Kristus belanna kapatongananna mintu’ to Natonno’ Puang Matua, sia belanna kapaissanan diona kamanapparan, tu situru’ kamengkaolan lako Puang Matua,

²tete dio kapa’rannuanan lako katuoan sae lakona, tu mangka Naallu’ dolomo Puang Matua tang balle na iatu tipamulanna attu,

³anna iatu bisaranNa mangkamo dipasombo tonna attunna lan tu kada dipa’peissanan tu dipatageranna’ situru’ pepasanNa Puang Matua, To pakarimmananta.

⁴Diparampo lako Titus tu anak tongan-tonganku tete dio kasiduluan kapatonganan. Narampoimoroko pa’kamasean sia kamarampasan dio mai Puang Matua, Ambe’, sia dio mai Kristus Yesu, To pakarimmananta.

⁵Inde sia bannangna angku tampeko dio lebukan Kreta, kumua ammu pasirundunanni tu tang sirundunannapa, sia kumua ammu angka’ penatua lan simisa’-misa’ tondok, susitu mangka kupa’pepasanan lako kalemu,

⁶tu kumua minda-minda tu tae’ sayuanna, sia misa’ri bainena, sia ma’patongan tu anakna sia tae’ naditanda’ umpogau’ tang penggauran sia tangia to tang diada’.

⁷Belanna iatu to ma’panundu’ la susito makatirinnanNa Puang Matua tae’ len sayuanna, da nato umpakapua penaanna, da nato madoi’ sengke, da nato pa’anggoro’, ba’tu to passiboboran, ba’tu to mesaro bu’tu kadake;

⁸sangadinna to ungkarimmanni to lempang, umporai kameloan, kinaa, malambu’, masallo’, untaloi kalena,

⁹to manda’ untoe kada manappa’, susitu dipa’pangadaranna, anna issanni umpakilala tau diona pangadaran mepamanaman sia untarru’i to pabali-bali.

¹⁰Belanna buda tu to toro, to umpasun kada tang kebattuan, sia ma’patudu beko, ondong pissan tu to untoe sunna’.

¹¹Tu sipatu dikamummu’ sadangna, tu umbalittua’ tau lan lu tananan dapo’na, diona umpa’pangadaran tang sipato’na, belanna mesaro bu’tu kadake.

¹²Den misa’i tu tau iato, iamo nabinna, mangka ma’kada nakua: Iatu to Kreta, tae’ mosona mo’rang, olo’-olo’ masuru, to barak tukkunan.

¹³Tonganna tu kada iato. Iamoto, tarru’i tonganni tu tau iato mai, anna mapato lan kapatonganan,

¹⁴sia da naperangii ulelean tang kebattuanna to Yahudi sia pepasanna to umboko’imo tonganna.

¹⁵Iatu to masallo’, mintu’na apa masero lako kalena; apa iatu to masareppak sia tang ma’patongan, moi misa’ tae’ masero lako kalena, sangadinna la tangnga’na, la sukaran inaanna, masareppak duka.

¹⁶Tau iato ussanga kalena untandai Puang Matua, apa penggauranna tang ussangai, belanna pagi’giran, sia pabali-bali sia tae’ bang patunna lako mintu’ penggauran melo.