Read Toraja-Sa'dan TITUS 2 Bible Online

TITUS 2 - Toraja-Sa'dan bible

TITUS 2

¹Apa iko te, la umpokadako situru’na pangadaran tongan, iamotu:

²Mintu’ to matua-tua la mangingaran melo, masipa’, kinaa, sia mapato lan kapatonganan sia pa’kaboro’ sia kabattaran.

³Susi dukato tu mintu’ to matua baine, sipatu la ma’gau susito sikambi’ maserona, da nama’palele beko, da napa’anggoro’, sangadinna la umpa’guruan kameloan,

⁴anna ada’i kinaa tu mai baine mangura, umpakaboro’ muanena, sia ungkamasei anakna,

⁵sia kinaa, sia masero, sia birisan ungkaritutui tananan dapo’, sia melo penaanna, sia tunduk lako muanena, da anna dipokada kadake tu kadanNa Puang Matua.

⁶Susi dukato la muada’i tu mai muane mangura anna kinaa;

⁷iko kalena la umpa’pekitanan sangka’ penggauran melo lan mintu’na; sia la mupapayan tu kamalamburan sia kamasiparan lan pangadarammu,

⁸sia pa’peissananni tu kada tongan tu tang la disayunna, anna kasirisan tu balinta, belanna tae’ tu la nanii umpokada kadakeki’.

⁹Sia pakilalai tu mintu’ kaunan namengkaola lako puangna lan mintu’na, sia anna pasende puangna sia da anna bali-balii tu kadanna,

¹⁰sia da anna kadi’pu’-di’pu, sangadinna la napa’pekitanan tu kamarurusanna lan mintu’ melona, anna lan mintu’na nanii umpobeloi pangadaranNa Puang Matua, To pakarimmananta.

¹¹Belanna iatu pa’kamaseanNa Puang Matua, tu umpasaena kamakarimmanan lako mintu’ tolino, bu’tumo,

¹²sia unnada’iki’ anta tumpui tu mintu’ katang-mekaalukan sia mintu’ kamailuanna te lino, anta lolangan kaleta lan te lino situru’ kakinaan sia kamalamburan sia kamengkaolan.

¹³Anta tayanni tu kapa’rannuanan diporongko’ sia kapayananna kamala’biranNa Kapenomban patodoranta sia To pakarimmananta, Kristus Yesu,

¹⁴tu mangka ussorong Kalena belanna kita, kumua anna la’bakki’ dio mai mintu’ kakadakeanta, sia kumua anna pamaseroanni Kalena tu sangrapu tau la Napotau misa, tu birisanna umpogau’ kameloan.

¹⁵Pamati’tinni mupokada tu mintu’ kada sia pakilalai sia tarru’i sia da naden tau misa’ untapa’ko.