Read Toraja-Sa'dan TITUS 3 Bible Online

TITUS 3 - Toraja-Sa'dan bible

TITUS 3

¹Pakilalai tu mai tau, anna tunduk lako mintu’ to paa sia to ma’parenta sia anna mengkaola sia ma’parandan lako mintu’ penggauran melo.

²Da napalele beko tau, da anna passigagan, sangadinna la masokan, sia umpa’pekitanan tongan sorong inaanna lako mintu’ tau.

³Belanna kita duka bagaki’ pirambongi’ sia pabali-bali sia pusa sia unturu’ ma’rupa-rupa kamailuan sia pa’poraian lino, tuo lan kakadakean sia kamagallian sia tumbuan biri’ sia sikabiri’.

⁴Apa iatonna sombomo tu kamasokananNa Puang Matua, To pakarimmananta, sia pa’kaboro’Na lako tolino,

⁵Nakarimmannimiki’, tangia kumua tete dio penggauran melo tapogau’ lan kamaloloan, sangadinna situru’ kamamaseanNa tete dio kamendioran kadidadian pole sia kadiba’ruan Nakarang Penaa Masallo’,

⁶tu Napalempanmo Natuarangki’ tete dio Yesu Kristus, To pakarimmananta,

⁷kumua anna kita, tu mangka dibilang malolo tete dio pa’kamaseanNa, dipadadi to umpomana’ katuoan sae lakona, susitu tarannuanna.

⁸La dikatappa’i tu kada iato; na iatu diongna penaangku: la mupakatua tu mintu’nato, anna iatu to ungkatappa’imo Puang Matua, napengkullei umpogau’ mintu’ penggauran melo. Mintu’na tu iannato melo sia den bua’na lako tolino.

⁹Apa randanangko kalemu dio mai kasita’genan baga sia pangosso’ nene’ sia kasisakkan sia kasigagan diona atoran Sukaran aluk, belanna mintu’nato tae’ gai’na sia tae’ patunna.

¹⁰Iatu to unturu’mo pangadaran sala, iammu mangkamo umpakilalai pissan ba’tu penduan, pasalian rindingmi.

¹¹Belanna muissan kumua iatu to susito tibalikmo tangnga’na sia kasalan, na ia kalenamo umpasala kalena.

¹²Iake kusuami mati’ tu Artemas ba’tu Tikhikus, pengkullei mupellambi’ina’ lako Nikopolis belanna diongmo penaangku la torro dio ke attu kamadinginan.

¹³Iatu Zenas, tu pandita Sukaran aluk sola Apolos la mupengkullean kinallo, da naden apa kurang dio kalena.

¹⁴Sia melo ke napelada’i nasangi tu solata umpengkullei umpogau’ penggauran melo, la umpaganna’ kurangnapa, da anna tae’ buanna tu kapatongananna tau iato mai.

¹⁵Mintu’na tu to kusolan umparampo salama’na mati’. Salama’ lako tu mintu’ to umpakaboro’ki’ lan kapatonganan. Narodongmorokomi pa’kamaseanNa Puang Matua sola nasang.