Read Toraja-Sa'dan FILEMON 1 Bible Online

FILEMON 1 - Toraja-Sa'dan bible

FILEMON 1

¹Iate sura’ lu dio mai Paulus, misa’ to ditarungku belanna Kristus Yesu, sia lu dio mai Timotius, siulu’ta, diparampo lako Filemon, tu kipakaboro’, sia sangayokaki lan pengkarangan,

²sia lako siulu’ki Apfia, sia lako Arkhipus, sangayokaki lan kapararian mempenaa, sia lako kombongan lan banuammu.

³Narampoimoroko pa’kamasean sia kamarampasan dio mai Puang Matua, Ambe’ta, sia dio mai Puang Yesu Kristus.

⁴Tontong bangna’ ma’kurre sumanga’ langngan Puangku, angku sa’bu’ko lan mintu’ passambayangku,

⁵belanna kurangi tu diona pa’kaboro’mu sia diona kapatonganammu lako Puang Yesu sia lako mintu’ to masallo’.

⁶Massambayangna’ sangapaoi upa’ tu kasiduluanta lan kapatonganan naumpamatoto’ kapaissanan diona mintu’ apa melo, tu lanna kaleta diona Kristus.

⁷Belanna lendu’ parannungku sia masannang penaangku tu diona pa’kaboro’mu, belanna mupakatana tu penaanna to masallo’, e siulu’.

⁸Iamoto, moi angku barani tongan tete lan Kristus ussuako umpogau’i tu sipato’na,

⁹apa diona pa’kaboro’ kupola’biranni malaku lako kalemu, te aku Paulus, to matua, tu ditarungku totemo belanna Kristus Yesu,

¹⁰kupalakuan lako kalemu tu anakku, tu butung kudadian lan te kaditarungkuangku, iamotu Onesimus,

¹¹tu tae’ patunna lako kalemu pirambongi’, apa totemo kapua tongan gai’na lako kalemu sia lako duka kaleku.

¹²Iamo kusua sule mati’, tu pa’kamoyaku.

¹³Kusangari la kupatorro kusisolan, anna sondako umparakaina’ lan te kaditarungkuangku belanna Kareba-kaparannuan.

¹⁴Apa tae’ kumorai umpogau’ apa-apa, ke tae’i mueloranni, da anna butung diparuku tu penggauran melomu, sangadinna kamasorokammu.

¹⁵Belanna umbai ia dukamo patunna te anna disarakki dio mai kalemu lan te sattu’, kumua ammu posolai tontong sae lakona,

¹⁶totemo tae’mo nasusi kaunan, sangadinna mala’bi’mo ia na kaunan, susimo siulu’ dipakaboro’, ma’ondonganna lako kaleku, tang dipokada pissanmo tu ikona, la lanna a’gan tolino, la diona kasiturusan lan Puang.

¹⁷Iamoto, iake musanga siulu’na’, tarimai susi kaleku.

¹⁸Iake mangkami umparugiko ba’tu kaindananni lako kalemu, bilang lakoi kaleku.

¹⁹Akumo Paulus, limangku kalena ussura’i te, na akumora umbaya’i; da’omo kupokadai te iannate tu kumua: bilang lako bangmi kalemu, belanna kalemu mupoindan lako kaleku.

²⁰Melo, e siulu’, ke muparongko’na’ tete dio Puang; pakatanai tu penaangku lan Kristus.

²¹Tu belanna kukatappa’i tu kamengkaolammu, angku surasangko, sia kuissan kumua la ondongpa tu mupogau’na na iatu kupokadanna.

²²Sipoduanna to, la mupasakkaranna’ inan kunii ma’bongi, belanna kurannuan diona passambayangmi angku dipa’kamasean sule lako kalemi.

²³Iatu Epafras, padangku ditarungku belanna Kristus Yesu, umparampo salama’na lako kalemu,

²⁴sia Markus, Aristarkhus, Demas na Lukas, tu kusisangayokan lan pengkarangan.

²⁵Narondongmira pa’kamaseanNa Puang Yesu Kristus tu penaammi.