Read Toraja-Sa'dan IBRANI 10 Bible Online

IBRANI 10 - Toraja-Sa'dan bible

IBRANI 10

¹Belanna iatu Sukaran aluk bayo-bayona bangri mintu’ rongko’ la sae, tangia kumua batangna tonganno mintu’ apa iato, anna tete dio pesuru’ susi duka bangsiato, tu nenne’ dipemalaran rundun taun, inang tae’ nabelai umpasundun mintu’ to umpennoloi.

²Iake nakullei, tang tae’moraka napemalaranni tau tu pesuru’ iato? Belanna iatu to umpogau’ kamenomban, iake dipamaseromi pissan, tae’mo kasalan nasa’ding lan penaanna.

³Apa diona mintu’ pesuru’ iato, ke taunoi napakilalaoki’ tu diona kasalan.

⁴Belanna inang tae’ nakullei tu rara tedong laki sia bembe’ laki la umpa’dei kasalan.

⁵Iamo bannangnato tonna mentama te lino tu Kristus, Nakuami kumua: Iatu pesuru’ sola pemala’ tae’ Mianga’i, — apa mangkaMo’ Mipatepuan misa’ batang kale — .

⁶Iatu pesuru’ ditunu pu’pu’ sia suru’ pengkalossoran, tae’ anna alai penaamMi.

⁷Kukuami: Tiromi, rampoMo’, nalan tu sura’ tilulun mangkamo disura’ tu diona a’gangKu la umpogau’ pa’poraiamMi, o Puang Matua.

⁸Iatonna mangkamo umpokadai te daona, iamotu: Pesuru’ sia pemala’ sia pesuru’ ditunu pu’pu sia suru’ pengkalossoran tae’ amMi anga’i sia tae’ anna alai penaamMi — tu dipemalaran unturu’ Sukaran aluk — .

⁹Undinna Nakua polemi kumua: Tiromi, rampoMo’ la umpogau’ pa’poraiamMi. Iatu bunga’nato Napa’dei, kumua anNa pantokki tu ma’penduanna.

¹⁰Pa’poraian iannamorato anta pissan bangri mangka diseroi pesuru’ batang kaleNa Yesu Kristus.

¹¹Mintu’ tominaa bendan kiallo-kiallo umpogau’ kamenomban, sia madada’ umpennoloan pesuru’ susi duka bangsiato, tu inang tang nakulle umpa’dei kasalan.

¹²Apa Tominaa Kapua iate, tonna mangkamo umpemalaran misa’ suru’ belanna mintu’ kasalan, unno’komi dio kananNa Puang Matua tontong sae lakona.

¹³Randuk attu iato anNa tayanni tu mintu’na ualinNa la Napopelilli’ lentek.

¹⁴Belanna diona misa’ pemala’ anNa mangkamo Ia umpasundun sae lakonai tu mintu’ to Naseroi.

¹⁵Nakatottongi duka Penaa Masallo’ lako kaleta tu dionato, belanna iatonna mangkamo ma’kada, Nakua:

¹⁶Iamote tu basse la Kutananan tau iato mai, undinna dio mai attu iato, nakua kadanNa Puang; la Kupatama penaanna tu mintu’ parentaKu, sia la Kusura’ duka lan tangnga’na;

¹⁷sia mintu’ tu kasalanna sia kakelokanna tae’mo angKu palan penaai.

¹⁸Apa umba tu nanii kadipa’deian kasalan, manassa tae’omo nasipatu tu pesuru’ belanna kasalan.

¹⁹Iamoto, e sangsiulurangku, belanna baranimo tu penaanta, la mentama inan maindan belanna diona raraNa Yesu,

²⁰unnola lalan ba’ru sia tuo tu Nabungkarangki’ untarru’ kulambu, iamotu batang kaleNa;

²¹sia belanna den kita misa’ Tominaa mala’bi’ta, tu umpoissan apa lan banuanNa Puang Matua.

²²Melo ke tapengkareke’i naturu’ penaa lambu’ sia kapatonganan kalebu, anna dipi’pikki tu penaanta, naurungan masero pindanmo dio mai pa’inaan kadake, sia iatu batang kaleta dibasei uai malino.

²³Melo ke manda’ki’ umpentoei pangakuan umpabu’tu kapa’rannuanan naturu’ katangbata-batan, belanna iatu Tomangallu’ maruru’.

²⁴Sia melo ke sipokarianganangki’ la untundan pa’kaboro’ sia penggauran melo.

²⁵Da anta salai tu kasirampunan kombonganta siamo, susitu biasa napogau’ tau pira, sangadinna la sipakilala-lalaki’, ondong pole’pi na iato belanna mitiro tu allo iato mengkareke’mo.

²⁶Belanna iake taangga’i umpogau’ kasalan, ke mangkamoki’ unnappa’ kapaissanan diona kamanapparan, tae’mo suru’ pengkalossoran,

²⁷sangadinna ukungan masang la ditayan sia palla api la unnimbakanni tu mintu’ to unnea.

²⁸Iatu to untapa’ sukaran alukna Musa, mate dipatei tang dikaturu-turui, ke nasa’bii da’dua ba’tu tallu tau.

²⁹Tangnga’mi, tumba polepi magasanna tu ukungan sipatu dipakannanni tu to ullullu’ Anakna Puang Matua, sia to ussangai maruttak tu rara basse tu dinii usseroi sia iatu to untelle-telle Penaa oto’na pa’kamasean.

³⁰Belanna tatandai tu To mangkamo ma’kada kumua: Akumo untoe pepakkan; Aku duka tu ma’papakkanni, sia Nakua siapa: Puang tu la umpaolai salu tu taunNa.

³¹Masang, ke tobangi tu tau tama limanNa Puang Matua matontongan.

³²Apa kilalai tonna dolona, tonna dipemasiangimo tu penaammi, mipengkullei tonganni umpatanan penaammi lan parri’ paria;

³³denkomi pira tu ditelle-telle sia dipakario-rio mendadi pengkitanna tau, sia den pira tu manda’ sisola tu to dia’ga susito.

³⁴Belanna mipa’petiroammo tu mamasemi lako to ditarungku, sia mikasorokan duka tu mai apammi dirampa, tu miissan kumua, den dio kalemi tu apa mandu melo sia matontongan.

³⁵Iamoto, da ammi pa’dei tu kabattaran penaammi tu umpabu’tu polean kapua.

³⁶Belanna sipato’komi unnampui kabantangan penaa, dikua anna iake mangkamokomi umpogau’i tu pa’poraianNa Puang Matua, ammi appa’i tu apa diallu’.

³⁷Belanna sattukmora, na iatu Puang la sae iato, tang marempamo karampoanNa.

³⁸Apa iatu to maloloKu la umpotuo kapatonganan; pa iake sorong boko’i, tae’ naalai PenaangKu.

³⁹Apa kita te tangiaki’ to tama bilangan to sorong boko’, taurunganni sanggang, sangadinna to ma’patongan, naurunganni makarimman tu deatanta.