Read Toraja-Sa'dan IBRANI 11 Bible Online

IBRANI 11 - Toraja-Sa'dan bible

IBRANI 11

¹Iatu kapatonganan iamo tanda tasikna kumua taampui tu mintu’ apa dirannuan, sia tanda sa’binna apa tang kakitanan.

²Belanna tete dio kapatonganan anna dipokada melo tu sanganna nene’ to dolo-dolo.

³Bannang dio kapatonganan taissanni, kumua iatu mintu’ angge maritik Napadadi kadanNa Puang Matua, naurunganni iatu apa nata’pai mata, tae’ nadadi dio mai apa mempaan.

⁴Bannang dio dukamora kapatonganan anna pemalaranni Habel lako Puang Matua tu misa’ pesuru’ mandu melo na iatu pemala’na Kain; tete dio kapatongananna to, anna dikanassai, kumua iato malolo, belanna Natonganni Puang Matua tu pemala’na; sia tete dio kapatongananna anna ma’kada-kada siapa, moi anna matemo.

⁵Bannang dio dukamora kapatonganan anna dipopellindung tu Henokh, kumua da naperasai kamatean; sia tae’mo anna kabu’tui tau, belanna Naalamo ia Puang Matua, belanna iatonna tae’pa nadipopellindung dikanassaimo kumua Naala ia penaanNa Puang Matua.

⁶Iake tang ma’patonganni inang tae’ naalai penaanNa Puang Matua; belanna iatu to umpengkareke’i Puang Matua sipatu la nakatappa’i kumua den tu Puang Matua, sia kumua Ia umparongko’ mintu’ to undaka’ tonganNi.

⁷Bannang dio dukamora kapatonganan na iatu Nuh, tonna mangkamo Puang Matua umpokadanni tu diona apa tang dikitapa, ungkasiri’mi Puang Matua napasakka’i tu lembang iato la umpamakarimman mintu’ to lan banuanna; tete dio kapatongananna napasalai tu mintu’ issinna lino, anna pomana’ kamaloloan tu situru’ kapatonganan iato.

⁸Bannang dio dukamora kapatonganan, anna turu’i Abraham tonna ditambai, naurunganni tassu’ male lako misa’ inan tu la napoba’gi nasiosso’i bati’na; tassu’mi tae’ natandai umba tu naola.

⁹Bannang dio dukamora kapatonganan, ma’tondokmi dio padang dialluranni butung dio padangna tau, anna torro lan tenda, susi duka Ishak sola Yakub, tu pada umpomana’ pangallu’ ia dukato.

¹⁰Belanna urrannuan tondok diparandanganni, tu Nabangun sia Napabendan Puang Matua.

¹¹Bannang dio dukamora kapatonganan anna appa’i Sara tu kamatotoran la ma’tambuk, moi anna lendu’ tonganmo kakianakanna, belanna nakanassai kumua matappa’ tu To-mangkamo unnallu’i.

¹²Ia dukamoto, anna dio mai misa’ tau, ontongpi samannamo to mate, nanii bu’tu ba’tu pira budanna tau tu susi bintoen dao langi’ sia susi karangan dio biring tasik tang dikemba’ dibilang.

¹³Lan duka kapatonganan naniimo mate sola nasangi tonna tae’pa naappa’i tu apa dialluranni, apa lan kapatongananna natiro mambelamo sia natammui marampa’, anna akui tu kalena kumua to sae sia to mentiruran lan te lino.

¹⁴Belanna iatu to ma’kada susito, napapayan kumua undaka’ tondok kadadian.

¹⁵Sia iake tongannai tau iato mai ungkilalaimo tondok kadadianna tu naboko’imo, den dukamo pakalanna la sule.

¹⁶Apa iatu manassana tau iato mai ungkaduangi misa’ tondok mandu melo, iamotu dao suruga; iamoto anna tae’ Nakasirisanni Puang Matua nasa’bu’ Puangna, belanna Naparandanammo misa’ tondok.

¹⁷Bannang dio dukamora kapatonganan anna pemalaranni Abraham tu Ishak, tonna disudi, sia tae’ anna tipodo’ tinde to mangka untarima mintu’ pangallu’ umpemalaran anak tungga’na,

¹⁸moi anna dipokadammo susite, kumua: Iatu tarukna Ishak iamo la disa’bu’ tarukmu.

¹⁹Belanna natangnga’ kumua Puang Matua kuasa umpamalimbangunni tu tau, moi anna mate; nabutung dio mai kamatean nanii unnappa’i sule.

²⁰Bannang dio dukamora kapatonganan anna mangka tu Ishak umpassakke Yakub, sola Esau diona tu apa la sae undinna.

²¹Bannang dio dukamora kapatonganan tonna la matemo tu Yakub anna passakke simisa’-misa’ tu anakna Yusuf, massambayangmi anna ma’patu’tun lako to’ ulu tekkenna.

²²Bannang dio dukamora kapatonganan tu Yusuf tonna mandappi’ mo sunga’na, napokadami tu diona katassuranna to Israel, sia napepasanan tu diona batang rabukna.

²³Bannang dio dukamora kapatonganan anna iatu Musa tonna dadimo, nabunimi indo’ ambe’na tallung bulan, belanna natiro kumua iatu pia’-pia’ me’lok rupanna, tae’mi anna kataku’i tu parentana datu.

²⁴Bannang dio dukamora kapatonganan anna noka tu Musa disanga anakna Lai’na Firaun, tonna kapuamo;

²⁵napola’biran ia dipakario-rio sola taunNa Puang Matua, ke la umposende sangattu’mira kasolleranna kasalan;

²⁶belanna iatu kaditelleanNa Kristus nasanga la’bi kapua ia angga’na na iatu mintu’ ianan dio Mesir, belanna mentiro lu lako ia rongko’.

²⁷Bannang dio dukamora kapatonganan anna tampei tu tondok Mesir tang ungkataku’ kasengkeanna datu, belanna bantang ia butung ungkita To tang kakitanan.

²⁸Bannang dio dukamora kapatonganan anna pogau’i tu Pa’pasa sia aluk ma’pi’pik rara, kumua da anna rumbui malaeka’ umbaa kasanggangan tu mai anak pa’bunga’na to Israel.

²⁹Bannang dio dukamora kapatonganan anna lambanni tau iato mai tu tasik Kolsum, butung to unnola karangkean; na iatu to Mesir nasandak umparundu’i susito, nasabu’.

³⁰Bannang dio dukamora kapatonganan anna tuan tu bentengna Yerikho, tonna mangkamo dililingi pitung allo.

³¹Bannang dio dukamora kapatonganan, anna tae’ naruai kasanggangan tu Rahab baine kadake gau’, sola mintu’ to battuk, belanna untarima marampa’ to ullio-lio tondok.

³²Na apa siapara tu la kupokada? Belanna tae’mo pakalangku ke la kuuleleanni tu diona Gideon, Barak, Simson, Yefta, Daud sia Samuel, sia mintu’na tu nabi.

³³Bannang dio dukamora kapatonganan anna untalo ba’tu pira-pira parenta, umpogau’ kamaloloan, unnappa’i tu apa diallu’, ungkamummu’ sadang singa,

³⁴umpapa’de kamasarrangan api, ullendokan kalena dio mai mata pa’dang, malamma’ anna memmawatang, sia lalong lan kapararian, sia untalo russun mintu’ to pararinna uali naurunganni mallai.

³⁵Anna den pira-pira tu baine ungkabu’tui sule tu solana dipamalimbangun dio mai to’ to mate, iatu senga’na dipakitai pa’di’, anna tae’ namorai untarima kadirampananna, kumua anna appa’i tu kamalimbangunan mandu polepa melo.

³⁶Na iatu to senga’ umpatanan peroso, petelle-telle, sia diongkan-ongkan, sia rante bassi sola pa’tarungkuan.

³⁷Sia ditumbui batu, sia digare’ge’, sia diroso, sia mate dipongko pa’dang, sia salamba-salao ma’tamangkale balulang domba sia balulang bembe’, nakapu’duran sia dipakario-rio sia dipakitai pa’di’.

³⁸Tonganna iatu issinna te lino tae’ nasielle’ lako tau iato mai; tau iato mai salamba salao dio lu padang aak sia dao lu mintu’ buntu sia lo’ko’ sia pamombong.

³⁹Na mintu’ tau iato, moi anna dipokada melo tu sanganna belanna kapatongananna, apa iatu apa dialluranni tae’pa anna appa’i.

⁴⁰Belanna Naparandanammiki’ Puang Matua tu apa la’bi’ melo, kumua da anna lambi’i tu kasundunan ke tae’i nakitai.