Read Toraja-Sa'dan IBRANI 2 Bible Online

IBRANI 2 - Toraja-Sa'dan bible

IBRANI 2

¹Iamoto la losong tapalan ara’ tu mintu’na apa mangka tarangi, dikua da anta tipero’ senga’.

²Belanna iake iatu kadanNa Puang Matua tu naparampo malaeka’ payanmo tang tileluk sia mintu’ kasalan sia kapabali-balian dipakkanni sipatunna,

³umbara la takua tilendok, ke tae’i takatappa’i tu kasalamaran pada kapuanato, tu tipamulanna Napa’peissanan Puang, anna pakanassai mintu’ to mangka urrangii lako kita;

⁴mangka dukamo Nakatottongi Puang Matua tu iannato tete dio tanda kalle-kallean sia tanda mangnga sia ma’rupa-rupa kuasa sia diona kaumpa’kamaseanNa Penaa Masallo’ unturu’ pa’poraianNa.

⁵Belanna tangia Nasorong lu lako malaeka’ anNa popengkanorongi tu lino undi, tu tapokadanna.

⁶Apa den misa’ tau ussa’bu’i lan Sura’ Madatu, nakua: Apa toda ia tu tolino amMi kilalairi, ba’tu iatu bati’ tolino amMi sailei?

⁷Mangkamo Mipopengkadiongan sattu’ na malaeka’; mangkamo Mimakotai kamala’biran sia kadipangkeran,

⁸iatu mintu’na Mipopengkanorongmo diong to’ lentekNa. Iatu mintu’na tu Napopengkanorong lako Kalena, moi misa’ tae’ Nasangadi len, tu tang mengkanorong lako Kalena. Apa te totemo tae’ dukapa anta tiroi tu mintu’na mengkanorong lako Kalena.

⁹Apa iatu Ia tu mangka dipopengkadiongan sattu’ na malaeka’, iamotu Yesu, tatiro dimakotai kamala’biran sia kadipangkeran, diona parri’ kamatean; kumua anna tete dio pa’kamaseanNa Puang Matua anNa perasai kamatean belanna mintu’ tolino.

¹⁰Belanna Puang Matua, tu bannang Dio sia tete Dio duka napodenNi angge maritik, anNa solan ba’tu sangapa budanna anak lako kamala’biran, pato’ umpasundun Panglalan kasalamaranna tau iato, tete dio buda kamaparrisan.

¹¹Belanna iatu To ma’pamasallo’ sia to di pamasallo’, misa’ri garonto’na: iamoto Natae’ Ia anNa masiri’ unnaku siulu’i tu tau iato mai,

¹²Nakua: La Kupa’peissanan tu sangamMi lako mintu’ siulu’Ku, sia la KupenaniangKomi pa’pudian lan lu kombongan.

¹³Sia Nakuapa: Aku te la marannu lakoNa’ Kalena. Nakua siapa: Tiroi, Aku te sisolana’ mintu’ anak Napa’kamasean Puang Matua lako Kaleku.

¹⁴Iamoto belanna iatu mintu’ anak pada ma’rara ma’duku’, Ia duka unnala a’gan susito, kumua anNa bannang dio kamatean Nanii umputtai tu to untoe kuasa umpabu’tu kamatean, iamotu deata bulituk.

¹⁵Sia kumua anNa rampananni tu mintu’ to naluang kakaunanan angge tuona belanna ungkataku’ kamatean.

¹⁶Belanna manassa tangia malaeka’ tu Natiroan, sangadinna bati’na Abraham Natiroan.

¹⁷Iamoto anNa Ia dipapada mintu’ siulu’Na lan mintu’na, dikua anNa lan kamenomban langngan Puang Matua Ia mendadi Tominaa Kapua tu mamase sia maruru’, la usseroi mintu’ kasalanna taunNa.

¹⁸Belanna mangkamo Ia umperasai parri’ tonna ruaI peroso, iamoto anNa belai untundui tu to diroso.