Read Toraja-Sa'dan IBRANI 3 Bible Online

IBRANI 3 - Toraja-Sa'dan bible

IBRANI 3

¹Iamoto e sangsiuluran masallo’ku, tu pada unnappa’ petamba dao mai suruga, pemantangkomi Rasulu’ na Tominaa Kapua tu mangkamo taaku, iamotu Yesu;

²tu maruru’ lako To unturo ta’bai susi Musa lako (makalima’na) apa lan banuanNa Puang Matua.

³Belanna dibilang pato’mo Ia untarima kamala’biran losong anna Musa, susito umbangun banua losong dipakala’bi’ na banua.

⁴Belanna mintu’ banua tau umbangunni, apa iatu umbangun angge maritik, Iamo Puang Matua.

⁵Iatu Musa maruru’ lako makalima’na apa lan banuanNa Puang Matua susi to ruranan, la umpa’peissananni tu mintu’ apa la dipokada undinna,

⁶apa Kristus susi Anak ungkuasai makalima’na apa lan banuanNa Puang Matua; kitamorate tu apa lan banuanNa, podo ke tang tilelukki tu penaa batta’ta sia kapa’rannuananta, tu taposattuan (sae lako katampakanna).

⁷Iamoto susitu kadanNa Penaa Masallo’: Iate allo, ke mirangii tu gamaranNa,

⁸da mipabattukki tu penaammi susi tommi pasaki-arasan, sia tonna allo kapassandakan dio padang pangallaran,

⁹tu nanii nene’ to dolomi usandakNa’ nasudi, moi anna tiromi tu mintu’ penggaurangKu lan patangpulo taunna.

¹⁰Iamo bannangnato angKu sengke lako bangsa iate, Kuma’kada kumua: Nenne’ bang pusa tu penaanna tau iato, tae’ siapa naissanni tau iato tu lalanKu;

¹¹iamoto angku palenduranni kada kumua: Inang tae’ nala tama inan kapelayoangKu tu tau iato.

¹²Kanandai meloi, e sangsiulurangku, da miden misa’ ma’penaa kadake, tu tang ma’patongan, naurunganni balik dio mai Puang Matua matontongan;

¹³sangadinna pada sipakilala-lalakomi kiallo-kiallo su’ding nasa’bu’pi tau tu allo iate, da miden misa’ battuk penaa natumang tangnga’na kasalan.

¹⁴Belanna umpoba’gimiki’ Kristus, podo ke manda’ki’ untoei tu randukna kamatapparan sae lako katam- pakanna.

¹⁵Diona tu kada mangka disura’ kumua: Iate allo, ke mirangii tu gamaranNa, da mipabattukki tu penaammi susi tommi pasaki-arasan,

¹⁶dipekutanan kumua: mindara tu mangka manna ma’perangi, anna saki ara’i Puang Matua? Tang mintu’raka to sun lan mai Mesir nasolan Musa?

¹⁷Mindara tu mangka Nasengkei lan patangpulo taunna? Tangiaraka tu mai to mangka umpogau’ kasalan naurungan siapanan tu batang rabukna dio padang pangallaran iato?

¹⁸Sia mindara tu Napalenduran kada kumua inang tae’ nala tama inan kapelayoanNa? tang mintu’naraka tu to battuk?

¹⁹Iamoto payan lako kaleta kumua tae’ nama’din tau iato tama, belanna tae’ nama’patongan.