Read Toraja-Sa'dan IBRANI 4 Bible Online

IBRANI 4 - Toraja-Sa'dan bible

IBRANI 4

¹Iamoto su’ding denpi tu pangallu’ diona kataman kapelayoanNa, sipatu takaselangan kumua denkomi manii misa’ payan tinampe.

²Belanna dipa’peissanan dukamo lako kaleta tu Kareba kaparannuan, susi bangsia lako tu mai tau iato, apa iatu kada narangi tae’ bua’na lako kalena, belanna tae’ nasiindo’ kapatonganan lan penaanna tu to urrangii.

³Belanna kita te mentamaki’ kapelayoan iato, ke ma’patonganki’, susitu Napokadannamo kumua: Susitu mangka Kupalenduran kada kumua: Inang tae’ nala tama kapelayoangKu tu tau iato; moi anna sakka’mo tu mintu’ pengkaranganna tempon dio mai dikombongna tu lino.

⁴Den lan Sura’ Madatu nanii mangka ma’kada diona allo ma’pempitu susite: Natorroimi Puang Matua tonna allo ma’pempitu tu mintu’ pengkaranganNa.

⁵Nakua polepa inde te kumua: Inang tae’ nala tama kapelayoangKu tu mai tau iato.

⁶Iamoto belanna tongtongpa tu kalamentamanna ba’tu pira-pira tau tama kapelayoan iato, sia iatu to dipokadan dolomo Kareba kaparannuan tae’ natama, belanna battuk.

⁷Napamanassa polei pissan tu misa’ allo, iamotu: Allo iate, tu Napokada lan sura’na Daud undinna tonna ba’tu sangapamo lendu’na susitu mangka disa’bu’ ina’ kumua: Iate allo, ke mirangii tu gamaranNa, da mipabattukki tu penaammi.

⁸Belanna iake nasolammi Yosua tu tau iato mai mentama kapelayoan, manassa tae’mo Napokadai Puang Matua tu allo senga’ undinna.

⁹Iake susito tontong ia tu misa’ kapelayoan allo katorroan lako taunNa Puang Matua.

¹⁰Belanna iatu to tamamo kapelayoanNa Puang Matua, natorroi kalenamo tu pengkaranganna, susi Puang Matua untorroi pengkaranganNa.

¹¹Iamoto tapengkullei tama kapelayoan iato, da taden misa’ tobang, susi to a’gan kabattukanna.

¹²Belanna iatu kadanNa Puang Matua tuo sia maatang sia mandu mataran anna pa’dang kemata patomali, sia mandalan pa’kandeanna, naurunganni umpasisarak sumanga’ anna penaa, sia lesokan anna utak buku lampa, sia naissan umpelalan tangnga’ sia lalan penaa.

¹³Tae’ misa’ panampa karerungan lako Kalena, sangadinna payan sia tiballa’ mintu’ apa dio oloNa Puang Matua, tu la tapebalii lako Kalena.

¹⁴Tu belanna den Tominaa Kapua ma’iringanta, tu umpasitarru’mo mintu’ langi’, Iamo Yesu, AnakNa Puang Matua, sipatu tatoe tu kapangakuan iato.

¹⁵Belanna tae’ taampui tu Tominaa Kapua tang ungkaturu-turui kamalammaranta, sangadinna Iamotu mangka narampoi peroso lan mintu’na susi kita, apa tae’ Ia Nakasalan.

¹⁶Iamoto tapabatta’i tu penaanta urreke’ isungan pa’kamaseanNa Puang Matua anta appa’ kamamasean sia ungkabu’tui kamaturu-turuan la patunduan ke attunnai.