Read Toraja-Sa'dan IBRANI 5 Bible Online

IBRANI 5 - Toraja-Sa'dan bible

IBRANI 5

¹Belanna mintu’na tominaa kapua iamo diangka’ umbendanan tolino diona kamenomban langngan Puang Matua, kumua anna ia umpennoloan pemala’ sia suru’ belanna mintu’ kasalanna tau;

²sia tu ma’dinna umpama’tanan penaa to tang paissan sia to pusa, belanna ia duka nakapu’ kamalammaran;

³iannamoto pato’ ia umpennoloan pesuru’ belanna kasalan, tangia kumua belanna to nabendanan manna, sangadinna kalena duka.

⁴Moi misa’ tae’ anna alan kalenai kalena tu pangka’ mala’bi’ iato, sangadinna to Natambaipi Puang Matua susitu Harun.

⁵Susi duka Kristus tae’ na Ia umpamala’bi’ Kalena kumua la mendadi Tominaa Kapua, sangadinna Puang Matua Ia tu mangka ma’kada lako Kalena kumua: Kamumo AnakKu; allo iate KudadiangKomi,

⁶susi duka tu Napokada lan pa’pudian senga’ kumua: Kamumo Tominaa tontong sae lakona, unturu’ lalanna Melkisedek.

⁷Anna Ia, tonna lan a’gan tolino, Napennoloammo tu passambayangNa sia pa’palakunNa sia Napemandui metamba umpato’do uai matanNa lako Puang tu kuasa ullendokanNi dio mai kamatean, nadipalalo tu pa’palakunNa, belanna ungkasiri’ Puang Matua;

⁸moi tonganna Ia Anak apa melada’ dukamo mengkaola, belanna diona kamparrisan Naperasai.

⁹Tonna mangkamo dipasundun maneri Ia mendadi oto’ kamakarimmanan matontonganna mintu’ to mengkaola lako Kalena,

¹⁰anNa gantii Puang Matua Tominaa Kapua unturu’ lalanna Melkisedek.

¹¹Iatu diona to, budapa tu la tapokada, apa masussa la urrundunanni, belanna matukkunkomi ma’perangi.

¹²Iake ditangnga’i tu masainna, pato’komi dadi guru, apa sipatukomi naada’i pole tau tu pamulanna pangadaran diona kadanNa Puang Matua; susimokomi to sipatupa dipairu’ bumbungan, tangiapa kande makarra’.

¹³Minda-minda tu unniru’pa bumbungan, tae’pa anna tandai kada tongan, belanna piapa.

¹⁴Apa iatu kande makarra’, iamo taana to matakko, tu to biasa umpatumbang tangnga’na anna belai umpasisengaran melo na kadake.