Read Toraja-Sa'dan IBRANI 6 Bible Online

IBRANI 6 - Toraja-Sa'dan bible

IBRANI 6

¹Iamoto melo ke tatorroi urrundunanni tu tipamulanna pangadaran diona Kristus, anta patarru’mi lako kasundunan: da taparandanganni polei, iamotu pangadaran kamengkatobaran dio mai penggauran mate, sia kapatonganan lako Puang Matua,

²sia pangadaran diona to mai pa’dioran, sia diona urremme’i lima tau, sia diona kamalimbangunanna to mate sia ukungan matontongan.

³Susimoto la tapogau’, ke Naeloranni Puang Matua.

⁴Belanna mintu’i tu to paissanmo dipamasiang tu penaanna, sia ussa’ding-sa’dingmo pa’kamase lu dao mai suruga sia umpoba’gimo Penaa Masallo’,

⁵sia ussa’ding kada meloNa Puang Matua sisola kamatotoranna attu la sae,

⁶anna sorong boko’, umbapa la dikua umba’rui sule tu pengkatobaranna tau iato, belanna naa’ta’ poleomo tu AnakNa Puang Matua tu la nanii bu’tu kasangganganna, sia napadio lindo bang.

⁷Belanna iatu padang, unnamma’ uai uran tu unta’pai nenne’i, anna pabu’tu burana tu den gai’na lako tau, tu napobannangna umposara’i, Napassakke duka Puang Matua.

⁸Apa iake umpatuoi duri sia a’da’, ditampemi sia sikandappi’mo tampak ropu, katampakanna diballa.

⁹Moi angki ma’kada susito, apa iatu diona kamu, e pa’kaboro’ku, kikanassai tu apa mandu melo, sia ma’palulakona kamakarimmanan.

¹⁰Belanna tangia kumua tang unnola salunna tu Puang Matua Naurunganni tang ungkilalai tu penggaurammi sia pa’kaboro’mi lako sanganNa, tu mangka mipa’pekitanan tete dio kamangkammi ungkamayai mintu’ to masallo’ sia sae lako totemo mikamayai siapa.

¹¹Inde sia tu diongna penaangki, to kumua pantan umpa’pekitanangkomi kamasarasan susi dukato, miurunganni unnappa’ kapa’rannuanan sundun sae lako katampakanna,

¹²dikua da ammi matukkun, sangadinna la unturu’komi sangka’na tu mai to umpomana’ mintu’ tu Naallu’na Puang Matua belanna kapatongananna sia kama’tanan penaanna.

¹³Belanna tonna mangallu’ tu Puang Matua lako Abraham, apa tae’mo ia daoanna tu Kalena, umposumpa Kalenami Kalena,

¹⁴Nama’kada kumua: Tonganna tongan la Kupamaupa’ko upa’ ma’iringanna sia la Kupamabatiran tonganko.

¹⁵Nasusito tonna mangka umpeagi ma’tan penaai, naappa’mi tu pangallu’ iato.

¹⁶Belanna iatu tolino umposumpa madoanna anna kalena, na sumpa iato untonganan kadanna, naurunganni umparampo randannai tu mintu’ kasisalan.

¹⁷Iannamorato, belanna morai tongan tu Puang Matua umpapayan katanglelukanNa lalan penaanNa lako mintu’ to umpomana’ pangallu’, Naarra’imi sumpa,

¹⁸kumua anna bannang dio te da’dua passalan tang tileluk tu Nanii Puang Matua tang balle, nadipabatta’ tu penaanta te kita mallainnamo mentilindung lako Kalena la untoe kapa’rannuanan tu diomo tingayota,

¹⁹tu susi sau penaanta bantang sia matoto’, tu mentama tarru’ dio boko’ kulambu sapa’,

²⁰dio inan Naniimo Yesu mentama mendadi Panglalan belanna kita, tu mendadi Tominaa Kapua sae lakona unturu’ lalanna Melkisedek.