Read Toraja-Sa'dan IBRANI 7 Bible Online

IBRANI 7 - Toraja-Sa'dan bible

IBRANI 7

¹Iatu Melkisedek iamo datu dio Salem sia tominaanNa Puang Matua patodoranna, tu mangkamo untammui Abraham tonna sule tu Abraham untalo mintu’ datu, napassakkemi tu Abraham.

²Lako dukamo nanii Abraham umpa’ben taa sangpulona dio mai mintu’na. Iatu Melkisedek, ke dibattuananni bunga’na, datu malolo, disanga polepa datu Salem, iamo datu marampa’.

³Tu tang keambe’ sia tang keindo’ sia tang keossoran, sia tae’ pamulanna ba’tu katampakan katuoanna, sangadinna dipasangtinti ia AnakNa Puang Matua, tontongmi ia Tominaa sae lakona.

⁴Tangnga’i tumba kapuana tau iato, tu naben Abraham nene’ to dolota taa sangpulona tu mintu’ pangrampa ma’iringanna.

⁵Mintu’na bati’na Lewi tu sikambi’ pentoean tominaa unnappa’ pepasan unnala bura padang taa sangpulona dio mai bangsa iato situru’ atoran Sukaran aluk, iamotu dio mai sangsiuluranna, moi anna tau iato sun dio mai Abraham;

⁶apa iatu Melkisedek tu tang sangnene’ tau iato, unnalamo taa sangpulona dio mai Abraham sia napassakke tu to unnappa’ mintu’ pangallu’ iato.

⁷Tae’mo nama’din dite’ge’i kumua to bitti’ anna passakkei to madaoan.

⁸Inde te iatu to untarima taa sangpulona iamo to tang la marendeng, apa inde to dio den misa’ to dikanassai kumua tuo marendeng ia.

⁹Ma’din dipokada kumua lalan dio Abraham, iatu Lewi tu untarima taa sangpulona, mangka dukamo mamaya’ taa pessangpulona,

¹⁰belanna lanpa kalena ambe’na tonna tammui Melkisedek tu Abraham.

¹¹Iamoto iake iatu kasundunan napabu’tu katominaanna ma’suku Lewi, — belanna bannang iamorato anna tarima Sukaran aluk naapaopa gai’na bu’tu pole tu tominaa senga’ unturu’ lalanna Melkisedek, tu disanga tang situru’ lalanna Harun?

¹²Belanna iake disondai tu katominaan, tae’ duka nasalai tang la disondai tu atoran Sukaran aluk.

¹³Belanna iatu To dipokada tu a’ganNa to, dibilang lako suku senga’, na suku iato tae’ bangpa misa’ umpogau’ pengkarangan dio to’ inan pemalaran.

¹⁴Belanna payanmo kumua iatu Puangta sun dio mai suku Yehuda, na diona suku iato moi misa’ tae’ napokada lenni Musa diona katominaan.

¹⁵Mandu pissan payan tu susinna to, ke bendanni misa’ tominaa senga’ susi a’ganna Melkisedek,

¹⁶tu mangka dadi susito tangia unturu’ lalan atoran rara buku, sangadinna situru’ kuasa katuoan tu tang sitiro kasanggangan.

¹⁷Belanna iatu a’ganNa dikanassaimo kumua: Ikomo Tominaa tontong sae lakona unturu’ lalanna Melkisedek.

¹⁸Susinnamorato na iatu atoran dolo dipa’dei, belanna malamma’ sia tae’ gai’na,

¹⁹— belanna moi misa’ tae’ napasundun Sukaran aluk — apa dipabu’tu tu kapa’rannuanan mandu melo, tapobannang umpentireke’i Puang Matua.

²⁰Sia tumbai tu Yesu tangia mendadi Tominaa Kapua tang undudung sumpa belanna tau iato mai dadimo Tominaa Kapua tang undudung sumpa,

²¹apa iatu Ia Napadudungi sumpa Puang Matua tu ma’kada lako Kalena, Nakua: Umpalaomo sumpa tu Puang sia tang la menassan, Kamumo Tominaa tontong sae lakona.

²²Susi dukamo Ia mendadi bassean ulangna basse mandu melo.

²³Sia buda tu tau iato mai sisonda-sonda mangka diangka’ tominaa, belanna tang napatontong kamatean;

²⁴apa iatu Ia, belanna tontong bang sae lakona, tae’mi natilele len lako to senga’ tu ka TominaanNa.

²⁵Iamo bannangna to anNa belai ungkarimmanni sundun mintu’ to umpentireke’i Puang Matua tete dio Kalena, belanna tontong bang Ia tuo umpalakuanni pa’tunduan tu tau iato mai.

²⁶Belanna pato’ lako kita misa’ Tominaa Kapua susito, iamotu masallo’, tae’ Nakasalan, tae’ attanganNa, dipamarimbangan dio mai mintu’ to kasalan sia dipamatande anna mintu’ langi’,

²⁷tae’ Namanggi’ susi tominaa kapua senga’, kiallo-kiallo umpennoloan ba’tu sangapa suru’, bunga’na belanna mintu’ kasalanna siamo, namane belanna mintu’ kasalanna to buda. Belanna iatu ianna te mangkamo Ia Napissanni Napogau’ tonna pemalaran Kalena.

²⁸Belanna iatu Sukaran aluk unturo ta’ba to malamma’ mendadi Tominaa Kapua, apa iatu lise’ sumpa tu undinna, na Sukaran aluk, unturo ta’ba Anak mendadi Tominaa Kapua tu sundun tontong sae lakona.