Read Toraja-Sa'dan IBRANI 9 Bible Online

IBRANI 9 - Toraja-Sa'dan bible

IBRANI 9

¹Iatu bunga’ basse den atoran kamenombanna sia inan maindanna diona a’gan lino.

²Belanna mangkamo tu tenda, tu sapa’ dio tingayona nanii tongkonan palita sia meda nanii roti dipennoloan, iamoto tu disanga inan maindan.

³Sia iatu sangsapa’ dio boko’ kulambu ma’penduanna iamo disanga inan tarru’ maindan;

⁴Nalan to den bulaan pantunuan dupa sia patti basse disapu’ mintu’ bulaan mengguririk, nanii gori-gori bulaan nanii manna lan sia tekken mentarukna Harun, sia da’dua papan batu basse;

⁵na daona lu to den da’dua karubion kamala’biran unnonganni tu tutu’ pebase kasalan; apa totemo iatu mintu’nato tae’mo palambi’ umpokada simisa’-misa’i.

⁶Tonna mangkamo dipopa’rundunan nasang tu mai susinnato, tama nenne’mi sapa’ tingayo tu mintu’ to minaa la umpogau’ nasangi tu kamenomban;

⁷Apa sapa’ ma’penduan, Tominaa Kapua manna tu mentama sipissan sangtaun, tangia kumua tang umbaa rara, tu napennoloan diona batang kalena sia salana to buda.

⁸Susimo a’gannato Nanii umpapayanni Penaa Masallo’, kumua tae’pa anna tibungka’ tu lalan lako to’ inan tarru’ maindan, ke bendan siapi tu tenda dolo,

⁹tu misa’ rapanganna attu totemo, situru’ susi lan rapangan iato dipemalaran ba’tu pira-pira pemala’ sia pesuru’, tu tang nakulle umpasundun to umpogau’i, susitu nasa’dingna lan penaanna,

¹⁰na iatu apa iato tu ma’rupa kande sia diiru’na sia ma’rupa-rupa pebase, pangalukan a’gan tolino bangri to, tu dipatageran tau sae lako nalambi’na atoran ma’rundunan melo.

¹¹Apa saemo tu Kristus mendadi Tominaa Kapua, tu oto’na mintu’ kameloan la bu’tu, unnolai tenda la’bi kapua sia la’bi sundun, tangia panggaraga lima, battuananna tangia lu dio mai te lino,

¹²sia tang umbaa rara bembe’ laki sia anak tedong, sangadinna raraNa Kalena, anNa pissanri tama inan maindan, umpabu’tu misa’ pangla’bakan matontongan.

¹³Belanna iake rara bembe’ laki sia tedong laki sia au anak tedong birang dipi’pikan to maruttak umpamaseroi, naurunganni umbasei batang kale a’gan salianna,

¹⁴ontong polepa tu raraNa Kristus, tu mangkamo umpemalaran Kalena tang sayuan lako Puang Matua tete dio Penaa matontongan, usseroi tu batu ba’tangta dio mai penggauran mate, kumua anta mengkaola lako Puang Matua matontongan.

¹⁵Iamora bannangnato anna Ia mendadi Toparitangngana basse ba’ru, kumua anna iatu to ditambai ma’din unnappa’ mana’ matontongan tu mangka dialluranni, tonna rampoi kamatean Napangla’bakan kasalan tu napogau’ to naluang basse dolo.

¹⁶Belanna iake denni pantaa dolo, sipatu dipemanassa tu kamateanna to mantaa dolo.

¹⁷Belanna iatu pantaa dolo, tiserek, ke matemi tu puangna; apa iake tuopi tu to mantaa dolo, inang tae’pa nama’din lalo.

¹⁸Iamoto anna dibassei rara tu basse bunga’na.

¹⁹Belanna iatonna mangkamo tu Musa umpokada nasangi tu pepasan iato lako mintu’ tau iato situru’ tu lanna Sukaran aluk, naalami tu rara anak tedong sia rara bembe’ laki, sola uai sia bannang bulu domba mararang, sia supa, anna pi’pikki tu sura’ sia to buda;

²⁰anna ma’kada nakua: Iamote tu rara lan basse Napasanangkomi Puang Matua.

²¹Sia ia duka tu kema sola mintu’ oongan penomban napasusi dukato napi’pikki rara.

²²Iatu biasanna atoran Sukaran aluk, kamma namintu’ apa dibasei rara, sia iake tae’i anna dipato’do tu rara, tae’ kadipa’deian kasalan.

²³Iamoto pato’ tu mintu’na rapang-rapang apa dao suruga diseroi susito, apa mintu’ tu apa daona siamo suruga diseroi pesuru’ mandu melo anna iatu mintu’nato.

²⁴Belanna iatu Kristus tangia tamamo inan maindan panggaraga lima, tu rapang-rapang batangna inan maindan, sangadinna tama batang suruga, la mennolo totemo dio oloNa Puang Matua belanna kita.

²⁵Tangia kumua Natole-tolei umpemalaran Kalena susitu Tominaa Kapua rundun taun mentama inan maindan umbaa rara tangia rarana kalena.

²⁶Belanna iake susito, tae’ anna salai tang la ma’tole-tole umperasai parri’ tempon dio mai dikombongna tu lino. Apa totemo te tonna ganna’mo tu attu, pissan dukari mangka dipasombo diona kaumpassurusanna batang kaleNa la umpa’dei kasalan.

²⁷Susitu tolino manassamo den pissan nala mate, namangkato namane dipaolai salunna,

²⁸susi dukamo Kristus, tonna mangkamo pissan dipemalaran la ullendokan kasalanna to buda, anna iake ma’penduannami, tang untanggungmo kasalanna tau, anNa tiroi mintu’ to untayanNi la napomakarimman.