Read Toraja-Sa'dan YAKOBUS 2 Bible Online

YAKOBUS 2 - Toraja-Sa'dan bible

YAKOBUS 2

¹E sangsiulurangku, tu ma’patongan lako Puang Mala’bi’ta Yesu Kristus, da mipalaloi tu kapatonganammi umpelindo tau.

²Belanna iake tamai banua pa’kombongammi misa’ to ma’sissin bulaan ma’pake melo na inde dukato nanii tama misa’ to bongko ma’tamangkale kadake;

³ammi kasiri’i tu to ma’pakean melo sia mikua lako: Unno’ko’komi inde te inan melo, nalako tu to bongko mikua ungkuanni: Bendanko inde te, ba’tu unno’ko’ko diong to’ pelleseangku;

⁴misangaraka tang mangkaopokomi ma’pasisengaran lan penaammi, sia dadi to mangra’ta’ pakayun bimbang?

⁵Perangii, e sangsiuluran pa’kaboro’ku, tang Napileiraka Puang Matua tu to bongko lan te lino mendadi sugi’ kapatonganan sia umpomana’ Parenta tu mangka dialluran mintu’ to ungkamaseI?

⁶Apa kamu te mangkamokomi unne’sek to bongko. Tang to sugi’raka umpakario-riokomi sia urrendenkomi lako olona to mangra’ta’ kara-kara?

⁷Tangiaraka tau iato tu umpa’kada solangi sanga mala’bi’, tu disa’burangkomi?

⁸Apa iake mituru’i tu parenta ma’iringanna, susitu lan Sura’ Madatu nakua: La mukamasei tu padammu tolino susi batang kalemu, melo dukamo tu penggaurammi.

⁹Apa iake mipelindoi tu tau, umpogau’komi kasalan, belanna napasalakomi Sukaran aluk butung to ullendai parenta.

¹⁰Belanna minda-minda untoe nasangi tu mintu’ atoran sukaran aluk, apa nalendai misa’, salamo ia lako mintu’na.

¹¹Belanna Iamo ia tu Tomangka ma’kada kumua: Da’ mupasandak salu lako rampanan kapa’, Ia dukamo ma’kada kumua: Da’ mupapatean. Na iake tae’i mupasandak salu lako rampanan kapa’, apa papateangko, manassa dadimoko to ullendai atoran Sukaran aluk.

¹²Pokadami sia pogau’mi susi sipato’na lako to la napaolai salu Sukaran aluk ma’popentorro to makaka.

¹³Belanna kama’paolaian salu tae’ nakamasei tu to tang umpogau’ kamamasean. Anna iatu kamamasean undaoanni kama’paolaian salu.

¹⁴E sangsiulurangku, apa gai’na ke ussangai kalena tu tau den kapatongananna, apa tae’ nasituang penggauran. Ma’dinraka tu kapatonganan susito la umpamakarimmanni?

¹⁵Iake denni siulu’ muane ba’tu siulu’ baine tang ma’tamangkale sia tang sidundu rokkoan barokona allo-allo,

¹⁶ammi den misa’ ma’kada lako kumua: Paela’-ela’mokomi lalan, lassui tu kalemi, sia ma’pedia’komi, apa tae’ mibenni tu sipatunna lako batang kalena, apara gai’na to?

¹⁷Susi duka kapatonganan, ke tae’i nasituang penggauran, mate bang- siami.

¹⁸Apa umbai den tau ma’kada nakua: iko den kapatonganammu, na aku den penggaurangku, apa pakitammo’ kapatonganammu tang situang penggauran, angku pakitangko tu kapatonganan tete dio penggauran.

¹⁹Anna iko te mupatongan kumua iatu Puang Matua, misa’ri. Melo duka. Na mintu’ deata bulituk umpatongan dukai, apa ma’parondo.

²⁰La morairokoka untandai, e to tae’ gai’na, kumua iatu kapatonganan tae’ nasituang penggauran, tae’ patunna?

²¹Tang bannang dioraka penggauranna anna dibilang malolo tu Ambe’ta Abraham tonna umpandan Ishak, anakna, la napemalaran dao inan pemala’?

²²Manassamo lako kalemu kumua kapatongananna situnduan penggauranna naurunganni tete dio penggauran anna disundunni tu kapatonganan.

²³Na susito nalambi’mo tu kada lan Sura’ Madatu, nakua: Napatonganmo Abraham tu Puang Matua, na iamorato tu dibilang kamaloloan lako kalena; iamo disangai sangmaneNa Puang Matua.

²⁴Manassamo lako kalemi kumua tangia tete dio manna kapatonganan anna dibilang malolo tu tau, sangadinna tete dio duka penggauran.

²⁵Tang susi dukaraka tu Rahab, baine kadake gau’, dibilang malolo, belanna penggauranna tonna tarimai sia tonna patassu’i tu to dipolentek maringan unnola lalan senga’?

²⁶Belanna susi kale mate, ke tae’i penaa lan, susi dukamo kapatonganan to, mate, ke tae’i nasituang penggauran.