Read Toraja-Sa'dan YAKOBUS 3 Bible Online

YAKOBUS 3 - Toraja-Sa'dan bible

YAKOBUS 3

¹E sangsiulurangku, da mibuda morai la mendadi guru, belanna miissan kumua la nakannaki’ kadiparessan mandu magasa;

²belanna kita sola nasang buda apa tanii sala. Iake denni misa’ tau tae’ nasala lan buangan kadanna, iamoto sundun, sia ma’din duka umparenta mintu’ kalena.

³Iake ussanga’ki’ darang dikua anna turu’i tu pa’poraianta, anta balikki mintu’ kalena lu lako dipapatuanni.

⁴Tiro dukai tu mintu’ kappala’ moi sangtumba kapuanna, sia nadudang angin bara’, napasepang kamudi bittik duru mudi lako tu naporainna.

⁵Susi dukamoto tu lila misa’ lesoan kale bitti’, apa lendu’ ia umpakapuanna kalena. Tiromi tumbai kapuana tu pangala’ nanennek api bitti’.

⁶Iatu lila susi misa’ api; anna mintu’na lesoan kaleta lilamo tu misa’ lino pa’rampunanna mintu’ kakadakean, urruttakki mintu’ batang kale sia umballa mintu’ lalan katuoanta, anna ia kalena naballa api naraka.

⁷Belanna mintu’ rupa olo’-olo’ lampung sia manuk-manuk sia olo’-olo’ mendonglo’ sia iatu lanna tasik ma’din dipamanaran sia mangka dukamo napamanaran kamalutean to lino;

⁸apa iatu lila tae’ tau ungkullei umpamanaranni; iamo misa’ kakadakean tang mari’pi, ponno ipo papatean.

⁹Iamotu lila taoong umpudi Puang, Ambe’ta, sia lila dukamo taoong untampakki ropu tolino tu dikombong susi rupanNa Puang Matua.

¹⁰Na misa’ dukari puduk nanii tassu’ pa’tendeng sia pa’tampak ropu. E sangsiulurangku, tae’ napato’ tu iannate.

¹¹Denraka kalimbuang umpatassu’ uai malino sia uai mapai’ diong mai misa’ mata kalimbuang?

¹²E sangsiulurangku ma’dinraka tu garonto’ ara la membua saitun, ba’tu garonto’ anggoro’ la membua ara? Ten dukamoto tae’ nama’din nanii sun uai malino tu naninna sun uai ma’sin.

¹³Mindammiraka tu kinaa sia paissan? Sipatu ia napa’pekitanan mintu’ penggauranna tu lu dio mai gau’ melo, situang sorong inaa diona kakinaan.

¹⁴Apa ia ke denkomi untambuk kamagi’giran sia te’geran penaa, da misattuan kalemi sia da mimorang unnea tonganna.

¹⁵Iatu kakinaan iato tae’ nakakinaan lu dao mai sangadinna kakinaan lu dio mai lino, tu umbudanan mentolinona, sia menggaronto’ dio mai pa’poraianna deata bulituk.

¹⁶Belanna umba tu nanii kamagi’giran sia kasite’geran, indemoto tu katangma’rundunan, sia mintu’ penggauran kadake.

¹⁷Apa iatu kakinaan songlo’ lu dao mai tipamulanna masallo’, ungkabarii kamarampasan, mabalele, matinuru’, ponno kamamasean sia bua-bua maelo, tae’ nabata, sia tae’ nabelo puduk.

¹⁸Anna buanna, iamotu kamaloloan, diambo’ situang kamarampasan lako mintu’ to ma’pasikaelo.