Read Toraja-Sa'dan YAKOBUS 5 Bible Online

YAKOBUS 5 - Toraja-Sa'dan bible

YAKOBUS 5

¹E kamu to sugi’, tumangi’komi sia unnorronkomi, belanna mintu’na kasanggangan la urrampoikomi.

²Sanggangmo tu kasugirammi sia nakandemo busung tu tamangkalemi.

³Ta’garammo tu bulaan sia salakami na iatu ta’ga’na la kendek titanan sa’bi umbalikomi, sia ungkande duku’mi susi api. Mangkamokomi urrampun eanan tonna ma’katampakanna attu.

⁴Tiromi, iatu sarona to umpeparei bela’mi, tu milando pa’dui mipatadang, metamba sia iatu sarona to mepare tamamo talinganNa Puang Zebaot.

⁵Mangkamokomi tuo ma’pemammi’ lan te lino, sia masua’ kumande; umpelompoi bangpokomi kalemi, naallo pa’reresammo.

⁶Mangkamo mira’ta’ kumua la diukung sia mipatei tu to malambu’; natae’ naeakomi.

⁷Iamoto, e sangiulurangku, ma’tan penaakomi sae lako allo kasaeanNa Puang. Tiromi, tu to ma’pa’lak untayan bua malapu’ diong mai padang; napama’tanan penaa sae lako nata’painna uran masonak sia uran ma’pangalla’.

⁸Ma’tan penaa dukakomi ammi pabatta’ penaammi, belanna mareke’mo tu kasaeanNa Puang.

⁹E sangsiulurangku, da misisarroan, da naruakomi pangra’ta’ kadiukungan. Kilalai kumua bendanmo dio to’ ba’ba tu To mangra’ta’.

¹⁰E sangsiulurangku, alami sangka’ tu kauntanggunganna kamasussan sia kama’tanan penaanna mintu’ nabi tu mangka ma’kada tete dio sanganNa Puang.

¹¹Kilalai kumua iatu to bantang, tabilang maupa’; mangkamo mirangi tu kabantanganna Ayub, sia mangkamo mitiro tu katampakanna penggauranNa Puang, kumua sumpu mamase sia liu kaboro’.

¹²Apa iatu ma’iringanna tongan, e sangsiulurangku, da ammi menggata, la umpopenggata langi’ ba’tu lino, ba’tu penggata senga’, sangadinna la mikua tonganna, ke tonganni, sia tae’, ke tae’i, da naruakomi pangra’ta kadiukungan.

¹³Denrokomika tu masussa? sipatu la massambayang. Denkomiraka parannu? sipatu la umpopenani pa’pudian.

¹⁴Denrokomika tu masaki? sipatu la untambai tu mai penatua kombongan, anna passambayanganni, sia anna bolloi minnak tete dio sanganNa Puang.

¹⁵Anna passambayang narondong kapatonganan umpamakarimmanni tu to masaki, anna Puang la umpamalekei, sia iake mangkai umpogau’ kasalan, la dipa’dei tu kasalanna.

¹⁶Iamoto sipatukomi la sipangakuan kasalammi sia la sipassambayangankomi, ammi maleke. Iatu passambayangna to malambu’, tu napalantuk penaa, kapua kamatotoranna.

¹⁷Iatu Elia pada bangsia a’ganta, apa lantuk tu passambayangna kumua da nasae uran, tae’mi nasae tu uran dio padang iato tallung taun annan bulanna.

¹⁸Massambayang pole’omi, nasae tu uran dao mai langi’, anna pakendek burana tu padang.

¹⁹E sangsiulurangku, iake denkomi pusa diona tonganna, anna misa’ tau umpopengkatoba’i,

²⁰la miissan kumua iatu to umpopengkatoba’ misa’ to kasalan dio mai lalan pusana, iamo umpamakarimman deatanna tau iato dio mai kamatean, sia la ussamboi kasalan buda.