Read Toraja-Sa'dan 1 PETRUS 2 Bible Online

1 PETRUS 2 - Toraja-Sa'dan bible

1 PETRUS 2

¹Iamoto rampananmi tu mintu’ kalando-pa’duan sia mintu’ sanda pakena sia kabelo-pudukan sia kamagallian sia mintu’ pa’palele beko;

²susi pia’-pia’ mane dadi, la susi dukakomi to ungkaduangi bumbungan massang, dikua anna ia mipolobo’ landa’ lako kasalamaran,

³iake misa’dingmi kumua masokan tu Puang.

⁴Iamo mipentireke’i, iamotu batu tuo, tonganna natibei tolino, apa passanganNa Puang Matua ditonno’ sia keangga’;

⁵la susi dukakomi batu tuo dibangun mendadi misa’ banua mempenaa sia kombongan masallo’na tominaa, dikua ammi pemalaran pesuru’ mempenaa, tu Naporai Puang Matua belanna Yesu Kristus.

⁶Belanna den disura’ lan Sura’ Madatu kumua: Kutanan lan Sion tu batu petau, ditonno’ sia keangga’; na iatu to umparandan Dio kapatongananna, tae’ anna la dipakasiri’.

⁷Iamoto iatu kamu ma’patonganna mipakeangga’, apa iatu tang ma’patonganna napatu te kada iate: iatu batu natibe pande, ia bangsiamo mendadi batu petau,

⁸sia: Misa’ batu katitodoan sia buntu batu ma’pamatana’, tu nanii titodo tau iato, belanna tae’ anna turu’i tu kadanNa Puang Matua; dilampakmo tu tau iato mai lako apa iato.

⁹Apa kamu te misa’ rapu ditonno’, misa’ kombongan tominaa ma’parenta, misa’ bangsa masallo’, sangrapu tau misanNa Puang Matua, kumua ammi pakaleleanni tu penggauran kapuanNa Puang, tu untambaimokomi tassu’ lan mai kamalillinan mentama kamaseroan kalle-kalleanNa;

¹⁰iamotu kamu dolona tangia taunNa, apa totemo taunNamo Puang Matua; tu dolona tang unnappa’ kamamasean, apa totemo te dikamaseimo.

¹¹E pa’kaboro’ku, kupakilalakomi susito mentiruran sia to lumio’ lan te lino, la mitoyangan tu kalemi dio mai mintu’na kamailuan pa’kalean tu sirari deatammi;

¹²iatu gau’mi la melo dio lu to kapere’, dikua anna iatu napobannang umpalele bekokomi tau butung to umpogau’ kadake, tu belanna natiro tu penggauran melomi, anna pakala’bi’i tu Puang Matua ke alloNami Puang sae umpakilalai.

¹³La turu’komi lako mintu’ parenta napondok tolino belanna Puang, la lako datu kapua, belanna iamo ma’iringanna kuasanna;

¹⁴la lako mintu’ to maraya, belanna iamo nasua datu kapua umpakkanni tu mintu’ to umpogau’ kadake, sia la umpakkanni melo tu to umpogau’ kameloan.

¹⁵Belanna susimoto tu pa’poraianNa Puang Matua, kumua anna diona penggauran melo minii ungkamummu’i tu puduk katangpaissananna to baga.

¹⁶Susito torro to makaka; tang susito unnangkaran katorro-tomakakanna la ussamboi kakadakean, sangadinna susito taunNa Puang Matua.

¹⁷Kasiri’i tu mintu’ tau. Pakaboro’i tu mintu’ sangsiuluran. Kataku’i tu Puang Matua. Pangke’i tu datu kapua.

¹⁸E mintu’ ruranan, tundukkomi lako puangmi sia kasiri’ tongan-tonganni, tangia lako manna manamanna sia masokanna, sangadinna lako duka tu masa’ga’na.

¹⁹Belanna iamo Naporai Puang Matua, ke manda’i tu tanan penaanna tau lako Puang Matua, nabelai umpatananni tu kamasussan, moi umperasai kamaparrisan tang sirua-rua.

²⁰Belanna apara kadipudianna, ke ma’tan penaakomi ma’patanan dikambei, belanna umpogau’komi kasalan? Apa ke ma’tan penaakomi umpatanan kamaparrisan belanna umpogau’komi kameloan, iamo ia Naporai Puang Matua to.

²¹Belanna iamora patunna to ammi ditambaimo, apa umperasai dukamo kamaparrisan tu Kristus belanna kamu, Natampeangkomi misa’ sangka’, kumua ammi rundu’i bate lalanNa.

²²Iamo Ia, tu tang umpogau’ kasalan, tae’ duka naombo’ dio mai randan pudukNa tu kada patua’ ba’tang;

²³iatonna disere kadai, tae’ anNa papakkanni sere kada, sia iatonna rampoi kamaparrisan, tae’ anNa ma’pakarrang, sangadinna Nasorong lako Puang tu iannato, tu tang pakayun bimbang umpaolai salunna.

²⁴Ia Kalenamo umpassanni lan batang kaleNa tu mintu’ kasalanta Napemalaranni dao kayu pea’ta’, kumua iatonna tiro matemoki’ kasalan, la natiro tuoki’ kamaloloan; belanna iatu kamassendang-sendanganNa mipomondo.

²⁵Belanna dolona pusakomi susi domba, apa totemo mengkara’pa lu lakomokomi To mangkambi’ sia To ungkatirinnai deatammi.