Read Toraja-Sa'dan 1 PETRUS 3 Bible Online

1 PETRUS 3 - Toraja-Sa'dan bible

1 PETRUS 3

¹Susi duka kamu, e mintu’ baine, la tundukkomi lako muanemi siamo, dikua iake denni umbali-balii tu kada iato, ma’din natalo kedona bainena, moi tae’ nama’kada,

²ke natiroi tu kedo maseromi sia sibaa pa’pakaraya.

³Da ammi pakei kalemi pakean merrupa, iamotu beluak diampinni’ sia umpake bulaan, ba’tu ma’rupa-rupa pakean maballo,

⁴sangadinna sipa’ malammak diong ba’teng, tu umpake pakean tang la sanggang, iamotu kedo sorong inaa sia kappa, tu kapua angga’na dio oloNa Puang Matua.

⁵Belanna susi dukato tonna dolo-dolona mintu’ baine masallo’, tu urrannuan Puang Matua, umpakei duka kalena, anna tunduk lako muanena siamo,

⁶susi Sara sanda katuru’ lako Abraham napekapuangi. Na iatu kamu te dadimokomi anakna, iake umpogau’komi melo, ammi tang ungkataku’i tu apa ma’patiramban.

⁷Susi duka kamu to, e mintu’ muane la kinaakomi siruran bainemi, belanna ma’kada baine, ammi kasiri’i, apa pada umpomana’komi pa’kamaseanNa Puang Matua, iamotu katuoan: dikua anna tang tikadang-kadang tu passambayangmi.

⁸Ma’katampakanna sipatukomi sola nasang sanginaa, sia maturu-turu, sia unnala mase mintu’ siulu’, sia madulu’, sia umpamadiongan penaa;

⁹da ammi papakkanni kakadakean tu kakadakean, ba’tu sere kada dipakkanni sere kada, sangadinna palakuanni karongkosan, belanna iannamorato tu ditambangkomi, kumua ammi pomana’ karongkosan.

¹⁰Belanna: Iatu to morai la tuo sia unnappa’ attu melo, la napakari’pi tu lilana umpokada kadakena, sia pudukna, tang la narandan kalandopa’duan;

¹¹sia sipatu la ullempangan kakadakean, anna pogau’ kameloan; sipatu la undaka’ kamarampasan anna ula’i;

¹²belanna iatu matanNa Puang umpemantang to malambu’ sia Natananni talinga tu pa’palakunna, apa Natiro sengke tu to umpogau’ kakadakean.

¹³Mindara tu la umpogau’ kadake lako kalemi ke birisankomi untuntun kameloan?

¹⁴Apa iake naruakomi kamaparrisan tu belanna kamaloloan, rongko’komi; sia da mikataku’i tu pa’pakarrangna to mai tau sia da ammi potirambanni.

¹⁵Pamaindanni lan penaammi tu Kristus kumua iamo Puang, sia la tontongkomi marea umpebalii tu mintu’ to ungkutanaikomi diona kapa’rannuanan dio kalemi, apa la naturu’ sorong inaa sia sipa’,

¹⁶sia bannang putekomi, dikua anna diona kanasangammi tau kadake, iamo napomasiri’ to ussayu torro ke’de’ melomi lan Kristus.

¹⁷Apa mandu melo ke miperasai tu kamaparrisan, — ke Napoelo’i Puang Matua — , belanna umpogau’ melo na iatu umperasai parri’ belanna umpogau’ kadake.

¹⁸Belanna pissan dukari tu Kristus mate diona mintu’ kasalanna tau, Iamo To malolo belanna to tang malolo, kumua anNa solangki’ lako Puang Matua; tonganna anNa dipatei diona batang kale, apa dipatuo diona penaa.

¹⁹Nalan penaa iato Nanii umpa’peissananni lako mintu’ bombo lan pa’pattangan,

²⁰tu dolona battuk tonna pamalambe’pi Puang Matua tu kama’tanan penaanNa, tonna attunna Nuh, namarassan dipasakka’ tu lembang, tu nanii sidi’ri tau lan — karuari tau — dirinding pala’ tete dio uai.

²¹Iatu uai rapangan umpamakarimmankomi totemo, iamotu pa’dioran, tu battuananna tangia ullossokki mariganna dio batang kalemi, sangadinna mepalakuan sukaran inaa maelo Puang Matua, tete dio kamalimbangunanNa Yesu Kristus,

²²tu mangkamo kendek langngan suruga, anNa unno’ko’ dio kananNa Puang Matua, na mintu’ malaeka’ sia to paa sia kakuasan mengkanorong lako Kalena.