Read Toraja-Sa'dan 1 PETRUS 5 Bible Online

1 PETRUS 5 - Toraja-Sa'dan bible

1 PETRUS 5

¹Inde sia tu pa’pakilalangku lako mintu’ penatuammi — belanna pada penatua dukana’ sia to umpemanassa diona mintu’ kamaparrisanNa Kristus, sia umpotaa kamala’biran la dipasombo undinna: —

²kambi’i tu mintu’ dombaNa Puang Matua tu mitage’na, da anna susito diparuku sangadinna la sanning penaa situru’ pa’poraianNa Puang Matua; sia da anna butung la morai mesaro bu’tu kadake, sangadinna naturu’ penaa kalebu;

³da mia’ga to ma’parenta kalemi lako mintu’ to dipatagerangkomi, sangadinna umpa’petiroangkomi kalemi la dadi sangka’lako mintu’ domba iato.

⁴Sia iake bu’tumi undinna tu Pangulu to mangkambi’ iato, la miappa’ tu makota kamala’biran tang la malayu len.

⁵Susi duka kamu, e to mangura, la tundukkomi lako mintu’ penatua sia la situndu-tunduangkomi sola nasang umpotambeke’ kaumpamadiongan penaa; belanna Nabali Puang Matua tu to matampo, apa Napa’kamasean tu pa’kamasean lako to madiongan penaanna.

⁶Iamoto la mipamadiongan tu kalemi diong to’ lima matoto’Na Puang Matua umpoissan angge maritik, anNa pamalangka’komi ke attunNami.

⁷Sorongi tu mintu’ kamasussammi lako Kalena, belanna Ia ungkaritutuikomi.

⁸La mainga’komi sia matangkinkomi; iatu deata bulituk, balimmi susito singa umburrung-burrung lumiling, undaka’i minda tu la naamma’ kalebu.

⁹Eai kapatonganan batta’, belanna miissan, kumua mintu’ kamaparrisan susito, naupu’ naperasai mintu’ sangsiulurammi lan lili’na lino.

¹⁰Puang Matua oto’na mintu’ pa’kamasean tu mangka untambaikomi tete dio Kristus mentama kamala’biran matontonganNa, ke mangkamokomi umperasai kamaparrisan lan attu sangattu’, Ia duka la umpasundunkomi sia umpabantangkomi sia umpamatoto’komi sia umparandangannikomi.

¹¹Lu lako Kalena tu kapaan tontong sae lakona! Amin.

¹²Iate sura’ naoki’ Silwanus tu kusanga siulu’ maruru’ lako kalemi, kunii ussauran kondi’komi, la ma’pakilala sia ungkatottongi, kumua iamote tu pa’kamasean tonganNa Puang Matua. Bantangkomi lan.

¹³Iatu kombongan dio Babel, tu ditonno’ susi kamu, umparampo salama’na lako kalemi, susi duka anakku Markus.

¹⁴La sisalama’-lama’ pangudung pa’koboro’komi. Ammi marampa’mora sola nasang tu lanna Kristus.