Read Toraja-Sa'dan 2 PETRUS 1 Bible Online

2 PETRUS 1 - Toraja-Sa'dan bible

2 PETRUS 1

¹Iate sura’ lu dio mai Simon Petrus, taunNa sia rasulu’Na Kristus, diparampo lako mintu’ to unnappa’mo kapatonganan, tu pada mala’bi’na kapatonganangki tete dio kamaloloanNa Kapenombanta sia Yesu Kristus, To pakarimmanan:

²dennoupa’ anna sakerangngan-rangnganna tu pa’kamasean sia kamarampasan lako kalemi, diona kauntandaiammi Puang Matua sia Yesu, Puangta.

³Belanna kamatotoran kamendeatanNa nakamaseammoki’ tu mintu’na apa mebaa lako katuoan sia kapengkaolan, bannang dio kauntandaiannai tu To untambaiki’ tete dio kamala’biranNa sia kasundunan kameloanNa.

⁴Tete indemorato anta dikamaseimo mintu’ pangallu’ mala’bi’ sia mandu kapua, kumua anna pangallu’ iato minii umpotaa pasirua mendeata, ke ullendokammokomi kalemi dio mai kasanggangan bu’tu lan te lino belanna kamailuan.

⁵Iamo bannangnato ammi la umpengkullei tonganni umpasombo kameloan lan kapatonganammi; na kameloammi umpasombo kapaissanan;

⁶na kapaissanammi umpasombo kauntaloian kale; na kauntaloiammi kale umpasombo kabantangan; na kabantangammi umpasombo kapengkaolan;

⁷na kapengkaolammi umpasombo pa’kaboro’ lako sangsiuluran, na pa’kaboro’mi lako sangsiuluran umpasombo kasiala-masean.

⁸Belanna iake dio nasangi kalemi tu iannate, sia sakerangngan-rangnganna, iamora tang untangga’komi tukkunan sia tang membua diona kapaissanan untandai Puangta Yesu Kristus.

⁹Belanna iatu to tae’ nadio nasang kalena tu iannate, tau iato buta sia maraun, apa tang nakilalaimo tu kadiseroianna dio mai kasalan masainna.

¹⁰Iamoto e sangsiulurangku, la mandu mipengkullei umpamatoto’i tu kaditambaiammi sia kaditonnorammi; belanna iake mipogau’i susito, inang tae’ mila tilende’ len.

¹¹Belanna susimoto ammi dibungkaran sea-sea lalan tama Parenta matontonganNa Yesu Kristus, Puangta sia To pakarimmananta.

¹²Iamoto tang la maliluna’ umpakilala nenne’komi tu diona mintu’na te, moi miissan nasangmi, sia dipabantangkomi lan pangadaran tongan, susitu mangkanna mitarima.

¹³Iatu kusanganna pato’, ke lan siapa’ tenda iate la kupamabalisakomi, ke kupakilalakomi;

¹⁴belanna kuissan kumua iate tendaku la kutampe madoi’, susi tu Napasomboammo’ Puangta Yesu Kristus,

¹⁵dikua anna lan duka mintu’na attu, ke matemo’ la mibela umpengkilalai tu mintu’nato.

¹⁶Belanna tae’ angki turu’i tu ulelean pare digaraga kamalutean, tongki pokadangkomi tu kuasa sia kasaeanNa Puangta Yesu Kristus, sangadinna kitiro kalenamo tu kamatandeanNa.

¹⁷Belanna mangkamo unnappa’ kadipangkeran sia kamala’biran dio mai Puang Matua Ambe’, tonna diparampoI gamara dao mai kamala’biran matande, susite: Iamote tu Anak pa’kaboro’Ku, Ia dukamo Nanii kasendeangKu.

¹⁸Kami kalenamo mangka urrangii te gamara lu dao mai langi’, tongki sisola dao buntu maindan.

¹⁹Mandu polepa matoto’ tu kada nubua’ dio kaleta; ke mipemaranga susii palita parrang lan inan malillin, naurunganni tibangka’ masiang, sia bu’tu lan penaammi tu bintoen sulo bai.

²⁰Apa iatu ma’iringanna la mikilalai tu iannate, kumua tae’ misa’ pa’nubua’ lan Sura’ Madatu ma’din nabattuananni tangnga’ misanna tolino,

²¹belanna tae’ bangpa pa’nubua’ napabu’tu pa’poraian tolino, sangadinna Natamaipi Penaa Masallo’ tu tau, anna sa’bu’i tu kada lu dio mai Puang Matua.