Read Toraja-Sa'dan 2 PETRUS 2 Bible Online

2 PETRUS 2 - Toraja-Sa'dan bible

2 PETRUS 2

¹Apa den dukamo dolona ba’tu pira nabi mo’rang dio lu to Israel, susi duka tu kamunna la bu’tu ba’tu pira guru ma’papusa, la umbaa buni pangadaran sala, tu untumang tau, sia napeonganni tu Puang mangka ulla’bakki’, sia umpasae kasanggangan madoi’ lako kalena.

²Sia buda tau la unturu’i tu to tang penggauran napogau’; iamora tu tau iato napobannang anna sayui tau tu lalan pangadaran tongan.

³Belanna kabasisi-inaanna nala undaka’ saro dio mai kalemi umpokada kada passede. Masaimo tumaya tu ukungan la urrampoi sia ia duka tu kasangganganna ma’kampa bangmo.

⁴Belanna iake tae’i anNa dampangi Puang Matua tu malaeka’ tonna pogau’ kasalan, sangadinna Napembuangan tama naraka sia Napatama lo’ko’ kamalillinan sia Napattang sae lako diukungna,

⁵sia iake tae’i Nadampang lino dolo-dolo, sangadinna Nuh manna, to umpa’peissanan kamaloloan, karuai sibaa tu Narinding pala’, tonna pasabu’i uai saba’ tu lino to tang mekaaluk;

⁶sia iake Napopennaumi tu tondok Sodom na Gomora sia Naukung naurungan mangsan, Nanii umpadenanni sangka’ tu mintu’ to umpalolang tang mekaaluk kalena,

⁷sia Narampanan tu Lot to malambu’, tu umpomasussa gau’ tang penggauran napogau’ to kadake,

⁸— apa iatu to malambu’ iato tonna sisola tau iato mai, belanna natiro sia narangi tu penggauran ma’liu aluk, allo-allomi masussa tu penaa malambu’na —

⁹iake susito, payanmo kumua Naissan Puang urrampanan mintu’ to mengkaola lan mai kadirosoan, sia umpattang mintu’ to kelok penaanna sae lako allo pangukungan, anNa pakario-rioi,

¹⁰ondong polepi tu to umpalolang kalena unturu’ kamoraian pa’kalean lan kamailuan masarepa, sia tang umbilang mintu’ kapaan. Barani sia umpattuan penaanna sia tang magiang ullangdo mintu’ tu mai disanganna mala’bi’,

¹¹na mintu’ ia malaeka’ moi anna mandu kapua kamatotoranna sia kuasanna tae’ anna pa’peukungan tampak ropui tu tau iato lako Puang Matua.

¹²Apa mintu’ tau iate, susi olo’-olo’ tae’ tangnga’na, dipadadi turu’ lalan biasanna la napotingkanan sia dipatei, untelle apa nakabagai; tae’ anna salai tang la sanggang natumang penggauran pasangganganna,

¹³naurunganni unnappa’ pakkan kasalanna. Tau iato mai nasanga misa’ kasendean tu pa’pemammi’na keallo, anna attangan sia sayuan tu tau iato mai, ma’pemammi’ lan pa’pakenanna, ke kumandekomi sola.

¹⁴Mentia’-tia’ bang tu matanna ma’gau’ sala sia tang natorei umpogau’ kakadakean, nadaai tu to tang bantang penaanna, umpopa’biasa basisi penaanna, anak-anak ditampakki ropu;

¹⁵iatu tau iato mai untampe lalan malolo anna pusa narundu’i tu lalanna anakna Beor, iamotu Bileam, tu umporai saro bu’tu dio mai kakelokan,

¹⁶apa narua pelo’bo belanna diona kakelokanna; misa’ keledai tang ma’kada, ma’kada tolino undampa kabaganna nabi iato.

¹⁷Tau iate mai susi kalimbuang marangke sia salebu’ nairi’ talimpuru’, tiparandanmo tu kapi’tukan lako kalena.

¹⁸Belanna umpokada matampo kada tang kebattuan, anna daai pa’poraian pa’kalean sia tang penggauran tu to mane tilendok dio mai to unnolai lalan pusa.

¹⁹Naalluran katilendokan tu tau iato mai, na ia kalena napokaunan kasanggangan; belanna iatu tau mengkaunan lako pasau’na.

²⁰Belanna iake tilendokmi tu tau iato mai dio mai kamaruttakanna lino tete dio kauntandaiannamo Puang To pakarimmananta, Yesu Kristus, naundinna tibalik poleomi naala poya lan mintu’nato anna talo, mandu kadake ia te undinna na iatu pamulanna.

²¹Belanna mandu melo, iake tae’pi natandai tu lalan kamaloloan na iake natandaimi, namemboko’ dio mai atoran masallo’ disoronganni.

²²Nalambi’mo te parumbasan tongan tu tau iato mai, tu nakua: Asu ungkande luana sia bai mangka didio’ mentombang sule.