Read Toraja-Sa'dan 2 PETRUS 3 Bible Online

2 PETRUS 3 - Toraja-Sa'dan bible

2 PETRUS 3

¹E pa’kaboro’ku, iamote tu sura’ ma’penduanna kupakatuangkomi; lan to sura’ da’dua kunii umpamabalisa inaa malambu’mi tete dio kakupakilalammi,

²dikua mikilalai tu kada mangka napokada mintu’ nabi masallo’ dolona sia atoranNa Puang To pakarimmananta, napokadangkomi mintu’ rasulu’mi.

³Ma’iringanna la mikilalai te iannate, kumua iake ma’katampakanna attu la sae ba’tu pira-pira to patelle sibaa petellena, tu umpalolang kalena unturu’ kamailuanna,

⁴anna ma’kada nakua: Umbara nakua tu kasaeanNa tu diallu’? belanna temponna pa’de nene’ta, iatu mintu’ angge maritik susi bang sia to dio mai tipamulanna kadadianna langi’ na lino.

⁵Belanna naangga’i tau iato mai tang umpalan ara’i te iannate mai, kumua tete dio kadanNa Puang Matua inang denmo tempon dio mai tu langi’ sia lino duka dikombong dio mai uai tonna dipopa’misa tu kauaianna.

⁶Tete dio duka uai anna sabu’ tu lino to attu iato nakabu’ uai saba’.

⁷Apa iate langi’ sola lino te denna totemo, susi ianan dianna rara’, diparandanan api, tete dio duka kada iato sae lako allo kadiukungan sia kasangganganna mintu’ to battuk.

⁸Apa iate misa’na te da mitang umpalan ara’i, e mintu’ pa’kaboro’ku, kumua sangallo Nasanga Puang pada bangsia sangsa’bu taunna sia sangsa’bu taunna pada bangsia sangallo.

⁹Tae’ Namarempa tu Puang umpalanda’ pangallu’Na, susitu nasanga tau pira kumua marempa tu iannato, sangadinna Nasuka’ kalandokomi, tae’ Naporai, ke denni misa’ tau sanggang, sangadinna kumua anna mengkatoba’ nasang.

¹⁰Apa iatu alloNa Puang la sae butung to boko; allo iato mintu’ langi’ la sappi anna mongngo’, sia mintu’na anasi’ la nakande api nasisarak-sarak, sia iatu lino sola mintu’ penggauran lan, la dimampu’i.

¹¹Belanna susinna la kasangganganna to tu mintu’ apa, naumbara la mipakuanni tu kalemi unturu’ gau’ masallo’ sia kamengkaolan?

¹²Sia mamali’ untayan kasaeanna alloNa Puang Matua, tu napobannang langi’ la nakande api nasisarak-sarak sia mintu’ anasi’ lolong lan api ma’lana-lana.

¹³Apa iatu Naallu’na Puang, untayanki’ langi’ ba’ru sia lino ba’ru, tu nanii kamaloloan.

¹⁴Iamoto, e pa’kaboro’ku, tayanni tu mintu’nato sia pengkullei, ammi diapparan torro marampa’ tang attangan sia tang sayuan dio oloNa Puang, miurunganni marampa’.

¹⁵Sia sipatu la mibilang, kumua iatu pesuka’ kalandoNa Puangta umpabu’tu kamakarimmanan, susi duka tu mangka nasurasangkomi Paulus, siulu’ pa’kaboro’ta, sitinaya kapaissanan dikamaseanni.

¹⁶Susimo lan mintu’ sura’na to, ke nasa’bu’i te iannate. Den duka lan ba’tu pira passalan tu masussa dibattuananni; iatu to tang mandalan paissanna sia tang bantang nabulang leko’ susitu mai sura’ senga’, naurunganni umpabu’tu kasanggangan lako kalena.

¹⁷Na kamu te, e pa’kaboro’ku, belanna inang miissan dolomo tu mintu’na passalan iato, dadi la matangkinkomi, da nabaakomi pangadaran ma’papusanna mintu’ to kadake iato, ammi tilendok dio mai kabantangammi;

¹⁸sangadinna sakendek-kendekmi lan pa’kamasean sia kauntandaian diona Puangta sia To pakarimmananta, Yesu Kristus. Lu lako Kalena tu kamala’biran, la totemo te, la attu tontong sae lakona. Amin.