Read Toraja-Sa'dan 1 YOHANES 1 Bible Online

1 YOHANES 1 - Toraja-Sa'dan bible

1 YOHANES 1

¹Iatu apa denmo tempon dio mai, tu kirangimo, tu nata’paimo matangki, tu mangkamo kitiro sia mangkamo nakaka’ limangki iamotu diona Bisara katuoan,

²— na iatu katuoan mangkamo dipasombo sia kitiromo, angki katottongi sia kipa’peissanan lako kalemi tu katuoan matontongan, tu inang denmo siayoka Ambe’, anna dipasombo lako kaleta; —

³iatu apa kitiromo sia kirangimo, ia dukamo kipa’peissanan pole lako kalemi, anna kamu duka tama kasiulangan lan kasiturusan sisola kami; iatu kasiturusangki iamo kasiturusan kisiulangi Ambe’ sia Yesu Kristus, AnakNa.

⁴Iatu iannate kisura’, dikua anna sundun tu kaparannuanta.

⁵Iamote tu kadanNa tu mangka kirangi dio mai Kalena, angki pa’peissananni lako kalemi, kumua iatu Puang Matua Iamo kamasiangan, sia inang tae’ kamalillinan lan Kalena.

⁶Iake ma’kadaki’ kumua den kasiturusanta sola, apa lolang lanki’ malillinna, manassa mo’rangki’ sia tae’ tapogau’i tu situru’na kamanapparan.

⁷Apa iake lolangki’ lan kamaseroan, susi Ia torro lan kamasiangan, manassa denmo kasiturusanta sola nasang, sia raraNa Yesu, AnakNa, usseroiki’ dio mai mintu’ kasalan.

⁸Iake ma’kadaki’ kumua tae’ kasalan dio kaleta, umpakena kalenaki’ kaleta sia tae’ kamanapparan dio kaleta.

⁹Apa iake taakui tu mintu’ kasalanta, maruru’ sia malambu’ Ia tu Puang Matua, la umpa’dei mintu’ kasalanta, sia usseroiki’ dio mai mintu’ kakadakeanta.

¹⁰Iake ma’kadaki’ kumua tae’pa tapogau’ len kasalan, untanda to mo’rangki’ Puang Matua, sia tae’ dio kaleta tu kadanNa.