Read Toraja-Sa'dan 1 YOHANES 2 Bible Online

1 YOHANES 2 - Toraja-Sa'dan bible

1 YOHANES 2

¹E anakku, ia sia kusurasangkomi te, dikua da mipogau’ kasalan. Na iake denni misa’ tau umpogau’ kasalan, den kita tu Pa’bisaranta lako Ambe’, iamo Yesu Kristus, To malambu’,

²sia Iamo dadi pemala’ usseroi mintu’ kasalanta, sia tangia kasalanta manna, sangadinna kasalanna duka mintu’ issinna lino.

³Dionamote taissanni kumua tatandaimo, iake takaritutui tu parentaNa.

⁴Iatu to ma’kada kumua: Kutandaimo, apa tae’ nakaritutui tu parentaNa, iamoto mo’rang, sia tae’ kamanapparan dio kalena.

⁵Apa minda-minda ungkaritutui tonganni tu kadanNa, tonganna kumua lanmo kalena nanii tepu pa’kaboro’Na Puang Matua. Dionamoto taissanni kumua iatu kita lanki’ Kalena.

⁶Iatu to ussanga kalena torro lan Puang sipato’ ia la umpalolang kalena susi Kristus mangkamo umpalolang Kalena.

⁷E mintu’ pa’kaboro’ku, tangia parenta ba’ru kusurasangkomi, sangadinna parenta masaimo, tu inang diomo kalemi tempon dio mai. Iatu parenta masai, iamotu kada mangka mirangi.

⁸Apa kusurasan dukakomi parenta ba’ru, iamotu apa tongan diona Kristus sia diona kamu, belanna iatu malillin lendu’mo sia iatu manassana masiang parrangmo.

⁹Minda-minda tu ussanga kalena lan masiangna, apa ungkabiri’ siulu’na, iamo tontong lan malillinna sae lako totemo.

¹⁰Apa iatu to umpakaboro’ siulu’na, tonang lan ia masiangna, nalan tau iato tae’ dipotitumbunna.

¹¹Apa iatu to ungkabiri’ siulu’na, iamo lan malillinna, sia lolang lan malillinna sia tae’ natandai tu napatunna, belanna napabutamo malillinna tu matanna.

¹²E anakku, massura’na’ lako kalemi, belanna mintu’ kasalammi dipa’deimo tete dio sanganNa Kristus.

¹³E mintu’ ambe’, massura’na’ lako kalemi, belanna mitandaimo tu Puang tu inang denmo tempon dio mai. E mintu’ to mangura, massura’na’ lako kalemi, belanna mangkamo mitalo tu deata bulituk.

¹⁴E pia, mangkamo’ massura’ mati’, belanna mitandaimo tu Ambe’. E mintu’ ambe’, mangkamo’ massura’ mati’, belanna mitandaimo tu Puang tu inang denmo tempon dio mai. E mintu’ to mangura, mangkamo’ massura’ mati’, belanna batta’komi sia naniikomi torro kadanNa Puang Matua, sia mangkamo mitalo tu deata bulituk.

¹⁵Da mikamali’i tu lino ba’tu apa lan lino. Iake denni misa’ tau ungkamali’i te lino, manassa tae’ pa’kaboro’Na Puang Matua lan tau iato.

¹⁶Belanna mintu’na tu lan lino, iamotu kamailuan pa’kalean, kamailuan mata, sia kasolleran, tae’ nalu dio mai Ambe’, sangadinna lu dio mai lino.

¹⁷Lino iate la lanna’ sola mintu’ kamaballoanna, apa iatu to umpogau’ pa’poraianNa Puang Matua tontong sae lakona.

¹⁸E pia, nalambi’mo tu ma’katampakanna attu; sia susitu mangkamo mirangi kumua la sae undinna tu uali Kristus, na totemo te budamo; iamo tanii untandai to kumua ma’katampakannamo attu te.

¹⁹Messarakmo dio mai kaleta tu tau iato mai, apa inang tangia solata, belanna iake solatai tae’ nasalai tang mari’pi ussisolangki’; apa messarak ia anna payan kumua tae’ na ia nasang solata.

²⁰Na kamu te unnappa’mokomi pa’kamasean, iamotu mangkamokomi Napassakke To maindan sia paissankomi sola nasang.

²¹Tae’ra kusurasangkomi, belanna tae’ mitandai tu kamanapparan, sangadinna belanna mitandaimo sia belanna tae’ apa tang tongan lu dio mai kamanapparan.

²²Mindara tu to mo’rang, ke tang to umpeonganni Yesu, kumua tangia Kristus? Na iatu to umpeonganni Ambe’ sia Anak, iamoto tu uali Kristus.

²³Minda-minda umpeonganni Anak, tae’ duka anna poAmbe’i tu Puang Matua, apa iatu to unnaku Anak, napoAmbe’ tu Puang Matua.

²⁴Iate kamu te, sipatu manda’ lan penaammi tu apa mangka mirangi dio mai pamulanna. Iake manda’i lan penaammi tu apa mangka mirangi dio mai pamulanna, manassa la manda’ dukakomi lan Anak sia lan Ambe’.

²⁵Iamote tu pangallu’ mangka Naallu’ lako kaleta, iamotu katuoan matontongan.

²⁶Mintu’na apa iate mangkamokomi kusurasan tu diona to la umpapusakomi.

²⁷Iatu kamu te, manda’mo lan kalemi tu pa’kamasean Napassakkeangkomi Puang, tae’omo mimanggi’ naada’i pole’ misa’ tau: sangadinna susi Naadarangkomi pa’kamaseanNa diona mintu’ apa sia tongan sia tae’ namo’rang, sia susitu mangkakomi Naada’i, la manda’komi lan Kalena.

²⁸Totemo te, e anakku, manda’komi lan Kalena, kumua iake dipasombomi, la unnappa’ki’ kabattaran sia tae’ tala kasirisan dio oloNa, ke attu kasaeanNa.

²⁹Na iake miissanni kumua malambu’ tu Puang, manassa miissan duka kumua minda-minda umpogau’ kamalamburan, iamo lu dio mai Kalena.