Read Toraja-Sa'dan 1 YOHANES 4 Bible Online

1 YOHANES 4 - Toraja-Sa'dan bible

1 YOHANES 4

¹E mintu’ pa’kaboro’ku, da mipatongan bangi tu anggenna penaa, sangadinna sudi dolo tu mintu’na penaa iato, ba’tu la lu dio siai mai Puang Matua; belanna budamo nabi tang tongan bu’tu lan lili’na lino.

²Susinna te minii untandai tu PenaanNa Puang Matua; umba-umba tu penaa unnaku Yesu Kristus kumua saemo lan a’gan tolino, iamoto tu lu dio mai Puang Matua;

³na umba-umba tu penaa, tae’ naakui tu Yesu, iamoto tu tang lu dio mai Puang Matua, sangadinna iamote tu penaanna uali Kristus tu mangka mirangi la bu’tu sia totemo te denmo lan lino.

⁴E anakku, kamu te lu diokomi mai Puang Matua sia mangka untaloi tau iato mai, belanna mandu kapua tu To lan kalemi na iatu to lan lino.

⁵Tau iato lu dio mai lino, iamoto nama’kada tolino, sia naperangii lino.

⁶Kita te lu dioki’ mai Puang Matua; sia iatu to untandai Puang Matua, iamo umperangiiki’; apa iatu to tae’ nalu dio mai Puang Matua, tae’ ia naperangiiki’. Susinnamoto tanii untandai tu penaa tongan sia penaa pusa.

⁷E mintu’ pa’kaboro’ku, sipatu la siala maseki’, belanna iatu pa’kaboro’ lu dio mai Puang Matua, sia minda-minda tu ma’pakaboro’, iamo lu dio mai Puang Matua sia untandai Puang Matua.

⁸Iatu to tae’ nama’pakaboro’, tang untandai Puang Matua; belanna iatu Puang Matua a’gan ma’pakaboro’.

⁹Iamote nadipasombo tu pa’kaboro’Na Puang Matua lako kaleta, kumua mangkamo Nasua tu Anak tungga’Na tama te lino, anna tete dio Kalena anta tuo.

¹⁰Iamote a’ganna pa’kaboro’, kumua tae’ nakita mangka ungkamasei Puang Matua, sangadinna Ia tu mangka ungkamaseiki’, sia mangka ussua AnakNa mendadi suru’ usseroi mintu’ kasalanta.

¹¹E mintu’ pa’kaboro’ku, iake mangkamoki’ Nakamasei Puang Matua susito, sipatu dukaki’ la siala mase.

¹²Moi misa’ tau tae’pa untiro len Puang Matua; iake pada sipakaboro’ki’, torro tu Puang Matua lan kaleta, sia tepu tu pa’kaboro’Na lan kaleta.

¹³Iamote tanii unnissanni kumua torroki’ lan Kalena, anna Ia lan kaleta, belanna mangkamoki’ Nakamasean tu PenaanNa pira.

¹⁴Sia kami te untiromi angki katottongi, kumua mangkamo Nasua Ambe’ tu Anak mendadi To pakarimmananna te lino.

¹⁵Minda-minda unnakui kumua Yesumo tu AnakNa Puang Matua, la torro tu Puang Matua lan kalena anna ia duka torro lan Puang Matua.

¹⁶Kita te taissanmo sia takatappa’imo tu pa’kaboro’Na Puang Matua lako kaleta. Puang Matua a’gan ma’pakaboro’, na iatu to torro lan pa’kaboro’ torro lan Puang Matua, sia Puang Matua duka torro lan kalena.

¹⁷Dionamoto anna tepu tu pa’kaboro’ lan kaleta, kumua anna barani penaanta, ke allo kapangra’tasan, belanna tumbai tu Kristus, la susi dukamoki’ to lan te lino.

¹⁸Lan pa’kaboro’ tae’ kamatakuran, apa pa’kaboro’ tepu umpa’dei kamatakuran, belanna iatu kamatakuran situang kadiukungan, sia iatu to mataku’ tae’ natepu tu pa’kaboro’na.

¹⁹Ma’pakaboro’ki’, belanna Napakaboro’ki’ Puang dolo.

²⁰Iake den tau ma’kada nakua: Kukamasei tu Puang Matua, apa ungkabiri’ siulu’na, tau iato mo’rang, belanna iatu to tae’ napakaboro’ siulu’na tu natiromo lako, tae’ nakullei nakamasei tu Puang Matua, tu tang natiro lako.

²¹Parenta iate mangkamo tatarima dio mai Puang, kumua iatu to ungkamasei Puang Matua, sipatu umpakaboro’ duka siulu’na.