Read Toraja-Sa'dan TO PARENGNGE’ 1 Bible Online

TO PARENGNGE’ 1 - Toraja-Sa'dan bible

TO PARENGNGE’ 1

¹Iatonna matemo tu Yosua, mekutanami tu to Israel lako PUANG, nakua: Mindarakan tu la male dolo urrarii to Kanaan.

²Ma’kadami PUANG, Nakua: Melo ke Yehudamo male dolo; manassa la Kusorong te tondok tama limanna.

³Ma’kadami Yehuda lako Simeon, siulu’na, nakua: Take’de’mo sola lako to’ lili’ mana’ku, anta rarii tu to Kanaan, tamane maleo lako to’ lili’ mana’mi. Malemi tu Simeon sola.

⁴Ke’de’mi tu Yehuda, Nasorongi PUANG tu to Kanaan sia to Feris tama limanna, nataloi tu tau sangpulo sa’bu dio sikandappi’ Bezek.

⁵Belanna nalambiran tu Adoni-Bezek dio Bezek, anna sirari dio, nataloi tu to Kanaan sia to Feris.

⁶Apa iatu Adoni-Bezek male mallai, apa undi naula’, anna tingkanni, nata’takki tu mintu’ indo’ taruno limanna sia indo’ taruno lentekna.

⁷Ma’kadami Adoni-Bezek, nakua: Pitungpulo tu datu tu dita’takki indo’ taruno limanna sia indo’ taruno lentekna, urruruk kande rondon diong sulluk medaku. Umba susitu penggaurangku lako kalena, susi dukamoto Napapakkanni Puang Matua lako kaleku. Nasolammi tau lako Yerusalem, namate dio.

⁸Mangkato narariimi to Yehuda tu Yerusalem, nataloi sia napatei pa’dang tu mintu’ tau lan sia naballa tu kota iato.

⁹Namane solo’ tu to Yehuda rokko la urrarii to Kanaan, tu torro dao padang ma’buntunna, dio Padang Lo’na lu, sia diong Padang Merrantena.

¹⁰Malemi tu Yehuda ullaoi to Kanaan, tu torro dio Hebron — dolona iatu Hebron disanga Kiryat-Arba — , nataloi tu Sesai sia Ahiman sia Talmai.

¹¹Inde to dio mai nanii ke’de’ la ullaoi to umpa’tondokki Debir. Iatu Debir dolona disanga Kiryat-Sefer.

¹²Attu iato ma’kadami tu Kaleb, nakua: Minda-minda untaloi tu Kiryat-Sefer sia unnalai, la kupa’bengan tu Akhsa, anakku, anna pobainei.

¹³Natalomi Otniel, anakna Kenas, adinna Kaleb, tu kota iato; napa’benganmi Kaleb tu Akhsa, anakna, anna pobainei.

¹⁴Iatonna rampomo tu baine lako, nanaranni tu muanena la lao umpalaku sangtempe’ pa’pa’lakan lako ambe’na. Anna mengkalao dao mai keledainna. Nakutanaimi Kaleb nakua: Apara mutungkanan?

¹⁵Mebalimi nakua: La mitekkennina’, angki pokasibalianni; mangkamo’ miben padang rangke, la miben dukapa’ ba’tu pira-pira kalimbuang. Nabenmi Kaleb tu kalimbuang daona lu sia iatu kalimbuang diongna lu.

¹⁶Ke’de’mi tu bati’ to Keni, matusanna Musa, sola mintu’ to Yehuda dio mai kota Koroma lako padang pangallaran Yehuda, tu dio Padang Lo’na lu sikandappi’ Arad. Anna rampo ma’tondok sola pa’tondokan.

¹⁷Ke’de’mi Yehuda sola Simeon, siulu’na, anna taloi tu to Kanaan dio Zefat; nasabu’i tu tau iato mai butung pepayu, iamoto nasangai tau tu kota iato Horma.

¹⁸Natalo pole’omi Yehuda tu Gaza sola mintu’ lili’na sia Askelon sola mintu’ lili’na sia Ekron sola mintu’ lili’na.

¹⁹Narondongmi PUANG tu Yehuda, iamoto naala nasangi tu mintu’ tondok ma’buntunna, apa tang naatta unnula’i tu tau dio padang marante, belanna tau iato unnampui kareta bassi parari.

²⁰Mangkamo diben Kaleb tu kota Hebron, susitu napasan Musa lako tau iato mai, sia mangkamo naula’i inde to dio mai tu anakna Enak sola tallui.

²¹Apa iatu to Benyamin tae’ naula’i tu to Yebus, tu umpa’tondokki Yerusalem, iamoto iatu to Yebus torro ma’tondok dio Yerusalem, sikandappi’ to Benyamin sae lako allo iate.

²²Ia duka tu bati’na Yusuf ke’de’ male ullaoi Betel, anNa rondongi PUANG tu tau iato.

²³Iatu bati’na Yusuf mesua usserre’i Betel; iatu kota iato dolona disanga Lus.

²⁴Natiromi to masserre’i tu misa’ muane tassu’ lan mai kota, nakuami ungkuanni: Patiroangkanni tu lalan ma’din naola tau tama kota iato, angki karampa’iko.

²⁵Napatiroammi tau iato tu lalan ma’din naolai tau tama kota, anna patei pa’dang tu mintu’ to lan kota iato, apa iatu tau mangka umpatiroanni lalan, nasua marampa’mo male sola mintu’ sangdadianna.

²⁶Malemi lako tondokna to Het, anna bangun misa’ kota, tu nasangai Lus, iamo naposanga to sae lako allo iate.

²⁷Iatu Manasye tae’ naula’i tu to Bet-Sean sola to lan lili’na sia to Taanakh sola to lan lili’na sia to umpa’tondokki Dor sola lili’na sia to umpa’tondokki Yibleam sola lili’na sia to umpa’tondokki Megido sola lili’na, naurungan iatu to Kanaan ma’dinpa torro ma’tondok dio tondok iato.

²⁸Iatonna matoto’mo tu to Israel, napopa’diama lompomi tu to Kanaan, apa tae’ naula’i.

²⁹Susi dukato tu to Efraim, tae’ naula’i tu to Kanaan torro dio Gezer, naurunganni tu to Kanaan torro dio lu to Efraim dio Gezer.

³⁰Iatu to umpa’tondokki Kitron sia Nahalol tae’ naula’i Zebulon, naurungan torro dio lu tu to Kanaan, moi anna popa’diama lompoi.

³¹Tae’ naula’i Asyer tu to umpa’tondokki Ako sia Sidon sia Ahlab sia Akhzib sia Helba sia Afek sia Rehob.

³²Iamoto natorro tu to Asyer dio lu to Kanaan, tu to inang umpa’tondokki tu tondok iato, belanna tae’ naulai’i to Asyer.

³³Tae’ naula’i Naftali tu to umpa’tondokki Bet-Semes sia Bet-Anat; iamoto natorro dio lu to Kanaan, tu to inang umpa’tondokki tu tondok iato; apa iatu to umpa’tondokki Bet-Semes sia Bet-Anat napopa’diama lompo.

³⁴Narussun to Amori tu to Dan langngan buntu, belanna tae’ naeloranni tu tau iato mai male rokko padang marante.

³⁵Sia ma’dinpa tu to Amori torro ma’tondok dio Har-Heres, dio Ayalon sia Saalbim, apa iatu bati’na Yusuf samawatang-watangna ungkuasai, naurunganni umpopa’diama lompoi tu tau iato mai.

³⁶Iatu angge lili’na to Amori randuk dio mai lombokna dao tanete, tu umposanga Te’tek Buku, dio mai Sela, sia iatu lu langnganna.