Read Toraja-Sa'dan TO PARENGNGE’ 10 Bible Online

TO PARENGNGE’ 10 - Toraja-Sa'dan bible

TO PARENGNGE’ 10

¹Iatonna matemo tu Abimelekh, bendanomi tu Tola, anakna Pua, anakna Dodo, misa’ to dio mai Isakhar, la urrampanan to Israel. Torromi dio Samir dao buntunna Efraim.

²Naparentami tu to Israel duangpulo ntallu taunna; matemi anna dilamun dio Samir.

³Undinnato bendanomi tu Yair, to Gilead, anna umparenta to Israel duangpulo ndua taunna.

⁴Iatu anakna muane den tallungpulo, ussakei keledai laki tallungpulo sia unnampui tu tallungpulo tondok, tu disangai sae lako allo iate kampongna Hawot-Yair lan lili’na Gilead.

⁵Matemi tu Yair anna dilamun dio Kamon.

⁶Napogau’ pole’omi to Israel tu apa kadake dio pentiroNa PUANG; umpenombai tu mintu’ Baal sia Astoret sia kapenombanna Aram, Sidon sia Moab, sia kapenombanna to Amon sia to Filistin, apa iatu PUANG naboko’imo sia tae’mo napengkaolai.

⁷Iamoto anna re’dek ara’Na tu PUANG lako to Israel, Nasorongi tu tau iato tama kuasanna to Filistin sia to Amon.

⁸Lan duka tu taun iato dinii umpandasai sia umpakario-rioi tu to Israel sia lan sangpulo karua taunna dinii umpandasai tu mintu’ to Israel sambalinna lu Yordan, lan tondok to Amori lan lili’na Gilead.

⁹Ondongpi iatu mintu’ to Amon ullambannimo Yordan la urrarii to Yehuda, to Benyamin sia to Efraim, naurunganni lendu’mo pussakna tu to Israel.

¹⁰Attu iato metambami tu mintu’ to Israel langngan PUANG, nakua: Kasalammokan lako Kalemi, belanna kiboko’imo tu Kapenombangki sia kipenombaimo tu mintu’ Baal.

¹¹Apa ma’kada tu PUANG lako mintu’ to Israel, Nakua: Tangiaraka Aku tu mangka urrampanangkomi lan mai kuasanna to Mesir, to Amori, to Amon, to Filistin,

¹²to Sidon, to Amalek sia to Maon, tonna pakario-riokomi, ammi metamba lako Kaleku?

¹³Apa moi susito mitampe dukaNa’ sia menombamokomi lako kapenomban senga’; iamoto tae’mo Kula urrampanangkomi.

¹⁴Malemokomi ammi metamba lako tu mintu’ deata mipilei, na iamora urrampanangkomi lan mai kapussakammi.

¹⁵Ma’kadami tu to Israel lako PUANG, nakua: Umpogau’mokan kasalan. Pogau’ bangmi lako kaleki tu Misanganna melo, podo Mirampanangkan te allo iate!

¹⁶Iatu rapang-rapang dipodeata dio lu tau iato mai natibemo, anna umpengkaolai PUANG; attu iato tang masemo penaanNa Puang untiroi tu kamandasanna to Israel.

¹⁷Ditambaimi sirampun tu to Amon anna ma’tenda dio Gilead; iatu to Israel sirampun anna ma’tenda dio Mizpa.

¹⁸Sikutanami tu tau, iamotu mai arungna to Gilead, nakua: Mindara tu muane la umpangului kasirarian unnea to Amon? Iamo la dadi pangulunna mintu’ to umpa’tondokki Gilead.