Read Toraja-Sa'dan TO PARENGNGE’ 12 Bible Online

TO PARENGNGE’ 12 - Toraja-Sa'dan bible

TO PARENGNGE’ 12

¹Ditambaimi sirampun tu to Efraim nalamban male lako Zafon. Ma’kadami lako Yefta nakua: Ma’apari ammi male urrarii to Amon, natae’ mitambaikan tamale sola? Iamoto angki la umballai tu banuammi dao botto ulummi.

²Ma’kadami tu Yefta lako tau iato mai, nakua: Aku sola te mai sukungku lankan kasisalan kapua to Amon; attu iato kutambaikomi, apa tae’ misae urrampananna’ dio mai kuasanna.

³Iatongku tiromi kumua, tae’ misae urrampanangkan, tae’mo kudampangi tu sunga’ku, angku male ullaoi to Amon, sia Nasorongmo PUANG tu tau iato mai tama kuasangku. Ma’apai ammi saera la urrariina’ te allo iate?

⁴Natambaimi Yefta sirampun tu mintu’ muane to Gilead, anna sirari to Efraim. Nataloi to Gilead tu to Efraim. Kasirarian iamorato napobannangi tu to Efraim ma’kada, kumua: Kamumora tu to mallai dio mai Efraim. Apa iatu Gilead manassa dio kasiallaranna Efraim na Manasye.

⁵Nakampaimi to Gilead tu kalambanan Yordan lako Efraim. Iake denni misa’ tu to Efraim tu malemo mallai ma’kada nakua: Eloranna’ angku lamban, ma’kadami to Gilead lako nakua: To Efraimrokoka. Iake mebalii nakua: Tangia,

⁶nakuami lako ungkuanni: Pokadaikae tu syibbolet. Iake nakuai: sibbolet, sia tang naissan umpokada meloi, ta’pa natingkan tu tau iato, napatei dio to’ kalambanan Yordan. Attu iato matemi tu to Efraim patangpulo ndua sa’bu.

⁷Naparentami Yefta tu to Israel annan taunna. Matemi tu Yefta, to Gilead, anna dilamun lan misa’ tondok dio lili’na Gilead.

⁸Undinnato naparentami Ebzan, to Betlehem, tu to Israel.

⁹Iatu anakna den tallungpulo muane. Iatu anakna baine tallungpulo napakemuane senga’mo sia naalan tallungpulo baine tu mintu’ anakna muane napobaine, iamo baine salian lembang. Naparentami tu to Israel pitung taun.

¹⁰Matemi tu Ebzan anna dilamun dio Betlehem.

¹¹Undinnato naparentami Elon, to Zebulon, tu to Israel. Naparentami tu to Israel sangpulo taunna.

¹²Matemi tu Elon, to Zebulon, anna dilamun dio Ayalon, dio lili’na Zebulon.

¹³Undinnato naparentami Abdon, anakna muane Hilel, to Piraton, tu to Israel.

¹⁴Iatu anakna muane patangpulo na ampona tallungpulo; pitungpulo keledai laki nasakei sola nasangi. Naparentami tu to Israel karua taunna.

¹⁵Matemi tu Abdon, anakna muane Hilel, to Piraton, anna dilamun dio Piraton, lan lili’na Efraim, dao buntunna to Amalek.