Read Toraja-Sa'dan TO PARENGNGE’ 13 Bible Online

TO PARENGNGE’ 13 - Toraja-Sa'dan bible

TO PARENGNGE’ 13

¹Napogau’ pole’omi to Israel tu apa kadake dio pentiroNa PUANG; iamoto Nasorongi PUANG tama limanna to Filistin, patangpulo taunna.

²Denmi misa’ muane dio mai Zora, dio mai pa’rapuanna to Dan, disanga Manoah, iatu bainena tamanang, tae’ nakianak.

³Ombo’mi tu Malaeka’Na PUANG lako baine iato anna ma’kada lako, nakua: Manassa tamanangko sia tae’ mukianak, apa la ma’tambukko, ammu dadian misa’ pia muane.

⁴Iamoto kanandai tu kalemu, da muiru’ uai anggoro’ ba’tu diiru’na tu melangona sia da mukande apa maruttak.

⁵Belanna manassa la ma’tambukko, ammu dadian misa’ pia muane; iatu ulunna tae’ nama’din narua piso peku’ku’ belanna randuk dio mai pa’tambukanna indo’na iatu pia muane iato misa’ nasirinNa Puang Matua; iamo la randuk ullendokan to Israel dio mai kuasanna to Filistin.

⁶Malemi tu baine iato umpokadanni muanena, nakua: Den misa’ taunNa Puang Matua sae lako kaleku, kutiro susito misa’ malaeka’Na Puang Matua, metakuran tongan. Tae’ kukutanai umbara nanii sae, sia tae’ duka napokadanna’ sanganna.

⁷Apa ma’kada lako kaleku, nakua: Manassa la ma’tambukko ammu dadian misa’ pia muane; iamoto da muiru’ uai anggoro’ ba’tu diiru’na tu melangona sia da mukande apa maruttak, belanna randuk dio mai pa’tambukanna indo’na sae lako allo kamateanna, iatu pia muane iato la dadi nasirinNa Puang Matua.

⁸Attu iato mengkamoyami tu Manoah lako PUANG sia ma’kada, nakua: O PUANG, ke ma’dinni iatu taunNa Puang Matua, tu mangka Misua, nasaepa pissan lako kaleki umpatudukan, apa tu sipatu la kipogau’ lako tu pia muane la dadi.

⁹Naperangiimi Puang Matua tu pengkamoyana Manoah, iamoto nasae pole’ tu Malaeka’Na Puang Matua lako baine iato, tonna dio pa’lak, apa iatu Manoah, muanena tae’ nadio sola.

¹⁰Ma’dondomi tu baine iato male umpokadanni muanena, nakua: Manassa iatu muane tu mane mangka sae lako kaleku, ombo’omo lako kaleku.

¹¹Ke’de’mi tu Manoah, naundi urrundu’ bainena; iatonna rampomo lako tau iato ma’kadami lako, nakua: Kamumoraka tu mangka ma’kada lako baine iate? Mebalimi, Nakua: Akumo.

¹²Ma’kadami tu Manoah, nakua: Iake dadimi susitu kadammi, la matumbari tu katuoanna sia toeanna pia muane iato?

¹³Mebalimi tu Malaeka’Na PUANG lako Manoah Nakua: Iatu mintu’ apa mangka Kupokadan baine iate, la nakanandai melo.

¹⁴Da nakandei tu apa lu dio mai garonto’ anggoro’; da nairu’i tu uai anggoro’ ba’tu diiru’na tu melangona sia da nakandei tu apa maruttak. La nakanandai tu mintu’ apa Kupasan lako kalena.

¹⁵Ma’kadami tu Manoah lako Malaeka’Na PUANG nakua: La kipatorropokomi inde te, angki toratupokomi misa’ anak bembe’ laki.

¹⁶Apa ma’kada tu Malaeka’Na PUANG lako Manoah, Nakua: Moi ammu patorroNa’ inde te, inang tae’ sia angKu la ungkandei tu kandemu. Apa iake la moraiko umpasakka’i tu iannato dipopemala’ pemala’ ditunu pu’pu’, melo ke mupemalaranni lako PUANG. Belanna tae’ naissanni Manoah, kumua Iamo Malaeka’Na PUANG to.

¹⁷Mangkato ma’kadami Manoah lako Malaeka’Na PUANG, nakua: Mindara tu sangamMi? Belanna iake dadimi susitu Mipokadanna, la kipakala’bi’Komi.

¹⁸Apa mebali tu Malaeka’Na PUANG lako Nakua: Ma’apai ammu pekutananni tu sangangKu? Iatu iannato memangngan.

¹⁹Naalami Manoah tu misa’ anak bembe’ laki sia kande dipemalaran, anna pemalaranni lako PUANG dao buntu batu. Attu iato Napogau’mi Malaeka’Na PUANG tu apa memangngan sia natiro bang Manoah sola bainena tu iannato.

²⁰Iatonna marassan tu api dukku diong mai inan pemalaran ma’lantang-lantang langngan langi’, kendekmi tu Malaeka’Na PUANG lan to’ dukku api diong mai inan pemalaran. Iatonna tiromi Manoah sola bainena tu iannato tukkumi sae rokko padang.

²¹Iatu Malaeka’Na PUANG tae’mo ombo’ len lako Manoah sola bainena. Attu iato maneri natandai Manoah, kumua Iamo Malaeka’Na PUANG.

²²Ma’kadami tu Manoah lako bainena, nakua: Manassa la mateki’, belanna mangkamoki’ untiro Puang Matua.

²³Apa ma’kada tu bainena lako, nakua: Iake la morai PUANG umpateiki’, ma’apai Nala untarimai tu pemala’ ditunu pu’pu’ sia kande dipemalaran tu tasoronganNi sia ma’apai Napatiroangki’ te mintu’na te sia ma’apai Naparangiangki’ totemo tu apa susite.

²⁴Undadiammi misa’ pia muane tu baine iato, nasangai: Simson. Salobo’-lobo’nami tu pia iato, sia Napamasakke-sakke PUANG.

²⁵Randukmi tu PenaanNa PUANG umpatiakka’ penaanna Simson dio Mahane-Dan, kasiallaranna Zora na Estaol.