Read Toraja-Sa'dan TO PARENGNGE’ 4 Bible Online

TO PARENGNGE’ 4 - Toraja-Sa'dan bible

TO PARENGNGE’ 4

¹Iatonna matemo tu Ehud, napogau’ pole’omi to Israel tu apa kadake dio pentiroNa PUANG.

²Iamoto Nasorongi PUANG tu tau iato mai tama kuasanna Yabin, datu to Kanaan, tu ma’parenta dio Hazor; na iatu kamandang lompona disanga Sisera, torro dio Haroset-Hagoyim.

³Meongli’mi tu to Israel lako PUANG, belanna iatu Sisera iato unnampui kasera ratu’na kareta parari bassi sia napakario-rio tongan tu to Israel situang kamasa’garanna lan duangpulo taunna.

⁴Attu iato iatu Debora, nabi baine, bainena Lapidot, urrengnge’ to Israel.

⁵Biasamo unno’ko’ diong to’ koroma Debora dio kasiallaranna Rama na Betel dao buntu Efraim; rampomi tu mintu’ to Israel lako kalena la dipaolai salu tu kara-karana.

⁶Mesuami untambai Barak, anakna muane Abinoam dio mai Kedesh lan lili’na Naftali, anna ma’kada lako, nakua: Tae’raka Napasan PUANG, Kapenombanna to Israel, kumua: maleko langngan buntu Tabor, musolanni tu sangpulo sa’bunna to Naftali sia to Zebulon.

⁷Na dio biring salu’-salu’ Kison la Kunii umpasaeangko tu Sisera, kamandang lompona Yabin sola mintu’ kareta pararinna sia surodadunna, sia la Kusorong tama limammu.

⁸Ma’kadami Barak lako nakua: Ianta la male sia sola, la male siana’, apa iake tae’i mimale, tae’ duka kula male.

⁹Ma’kadami tu Debora nakua: Melo duka, ke maleki’ sola, apa iate lalan la muolai tae’ mupomala’bi’i, belanna tama kuasanna misa’ baine la Nanii PUANG ussorongi tu Sisera. Ta’kala ke’de’mi tu Debora, anna male sola Barak lako Kedesh.

¹⁰Natambaimi Barak tu mintu’ to Zebulon sia Naftali sirampun dio Kedesh, anna ke’de’ sangsiturusan sola tu to sangpulo sa’bu; ia duka tu Debora male nasisolan.

¹¹Iatu Heber, to Keni, ussarakki kalena dio mai to Keni senga’, tu bati’na Hobab, iamotu ipa’na Musa, anna pabendanni tu tendana sae lako garonto’ tarpin dio Zaanaim, sikandappi’ Kedesh.

¹²Napokadami tau lako Sisera, kumua iatu Barak, anakna Abinoam, malemo langngan buntu Tabor.

¹³Iamoto narampunni Sisera tu mintu’ karetana, kasera ratu’na kareta parari bassi sia iatu mintu’ tau nasolan dio mai Haroset-Hagoyim sae lako salu’-salu’ Kison.

¹⁴Ma’kadami tu Debora lako Barak nakua: Ke’de’moko, belanna allo iate Nasorongi PUANG tu Sisera tama limammu; tang PUANG raka male undoloangko? Solo’mi tu Barak dao mai buntu Tabor sisola tu to sangpulo sa’bu undi urrundu’i.

¹⁵Napapussakmi PUANG tu Sisera sola tu mintu’ karetana sia mintu’ surodadu diona kanatiroanna tu pa’dang tinonok dio tingayona Barak, iamoto namengkalao tu Sisera dao mai karetana, anna mallai ma’lalan bang.

¹⁶Naula’mi Barak tu mintu’ kareta sia surodadu sae lako Haroset-Hagoyim, na mintu’ surodadunna Sisera pura mate nakande pa’dang; moi misa’ tae’ napatorro.

¹⁷Mallaimi tu Sisera ma’lalan lako tendana Yael, bainena Heber, to Keni, belanna sikaelo ia Yabin datu Hazor tu to lan banuanna Heber, to Keni.

¹⁸Tassu’mi Yael untammui tu Sisera, nama’kada nakua: Lendu’komi mai, puangku, lendu’komi mai, da mimataku’. Malemi tama tendana nasamboi Yael sambu’ parramba’.

¹⁹Mangkato ma’kadami Sisera lako nakua: Benna’ uai sidi’ kuiru’i; belanna ma’rangna’. Nabungka’mi tu kiriba’ nanii pangandu’ lan, napairu’i, namane ussamboi sule.

²⁰Ma’kadami Sisera lako, nakua: Bendanko dio ba’ba tenda na iake den tau sae ungkutanaiko kumua: Denraka tau inde, la mukua mebali: Tae’ tau inde.

²¹Apa naala Yael, bainena Heber, tu misa’ petana’ tenda sia untoe pepa’tong, napela’i male lako Sisera, anna tana’i tu petana’ iato tama pili’na, natarru’ rokko padang anna mate, belanna tarru’ leppeng napobua’ kabo’yokanna.

²²Saemi tu Barak unnula’ Sisera, anna tassu’ tu Yael ussitammuanni, anna ma’kada lako nakua: Maikomi, kupatiroangkomi tu to midaka’. Malemi tama tendana, natiroi tu Sisera matemo sumpandan dio na iatu petana’ lan bangsia pili’na.

²³Susimoto Nanii Puang Matua umpatundukki tu Yabin, datu Kanaan, dio tingayona mintu’ to Israel.

²⁴Samasai-sainna sanati’tin-ti’tinna to Israel tu Yabin, datu Kanaan, sae lako nasabu’i tu Yabin, datu Kanaan.