Read Toraja-Sa'dan TO PARENGNGE’ 8 Bible Online

TO PARENGNGE’ 8 - Toraja-Sa'dan bible

TO PARENGNGE’ 8

¹Ma’kadami tu to Efraim lako Gideon, nakua: Matumbari te penggaurammi lako kaleki, natae’ra mitambaikan tommi male urrarii to Midian? Nasarabaimi tu Gideon.

²Apa ma’kada tu Gideon lako nakua: Umbara susite penggaurangku, ke dipasitintii penggaurammi? Tang mandu meloraka tu peanggoro’ undinna Efraim na iatu peanggoro’na Abiezer.

³Nasorongmo Puang Matua tama limammi tu Oreb sola Zeeb, datunna to Midian; apa todara tu ma’din kupogau’ ke dipasitintii penggaurammi? Iatonna ma’kadamo susito, meremi tu kasengkeanna tau lako.

⁴Iatonna rampomo Gideon lako Yordan, lambanmi sola tu tau talluratu’ nasolan; moi namata’ka’ tongan, apa mangula’ duka.

⁵Ma’kadami lako to umpa’tondokki Sukot nakua: Benpi ba’tu pira-pira rotimmi te to undi urrundu’na’, belanna mata’ka tongan sia akumo undi unnula’i te Zebah sola Salmuna, datu to Midian.

⁶Apa ma’kada tu mintu’ arungna Sukot nakua: Denraka pala’ limanna Zebah sola Salmuna lan limammi totemo, angki la umbenri roti tu surodadummi?

⁷Ma’kadami tu Gideon nakua: Belanna kada iate, ianNa sorongi PUANG tu Zebah sia Salmuna tama limangku, manassa kubamba duri padang pangallaran sia a’da’ tu kalemi.

⁸Ke’de’mi inde to dio mai namale lako Pnuel, anna ma’kada duka susito lako to umpa’tondokki Pnuel, apa nabali tau iato susitu pebalinna to Sukot.

⁹Iamoto ma’kadami tu Gideon lako to umpa’tondokki Pnuel, nakua: Iangku sule marampa’ sia, manassa la kusanggang te menara iate.

¹⁰Attu iato diomo lu Karkor tu Zebah sola Salmuna sisola surodadunna, agi-agi den sangpulo lima sa’bu tau; iamotu mintu’ surodadu torropa dio mai mintu’ suku rampe matallo; na iatu dipateinna den saratu’ duangpulo sa’bu tu to manakkamo untakin pa’dang.

¹¹Ma’palurekkemi tu Gideon urrundu’ lalanna to ma’tenda rampe matallona Nobah sola Yogbeha, anna taloi tu surodadu iato, tonna masaliomo tu tau iato mai.

¹²Mallaimi tu Zebah sola Salmuna, apa undi naula’; anna rampai tu da’dua datu to Midian, iamotu Zebah sola Salmuna sia napasisarak-sarak tu mintu’ surodadunna.

¹³Sulemi tu Gideon, anakna Yoas, dio mai inan kasirarian, unnola lombok dao tanete Heres.

¹⁴Natingkanmi tu misa’ pia muane dio mai to Sukot, anna kutanai, sia nasurasanni tu mintu’ arungna sia pekaamberanna Sukot, den pitungpulo mpitu tau.

¹⁵Malemi lako to Sukot, anna ma’kada, nakua: Tiromi indemo tu Zebah sola Salmuna, tu minii untellena’ mikua: Denraka pala’ limanna Zebah sola Salmuna lan limammi, angki la umbenri roti tu mai to mata’ka’mi?

¹⁶Naalami tu mintu’ pekaamberanna kota iato na iatu duri padang pangallaran sola a’da’ naadaranni tu to Sukot iate.

¹⁷Sia iatu menarana Pnuel nasanggang sia iatu mai muane lan lu kota napatei.

¹⁸Undinnato ma’kadami lako Zebah sola Salmuna, nakua: Umbamira tu to mangka mipatei dao Tabor? Mebalimi nakua: Susikomi, iatu pa’kaleanna, ke misa’oi susito misa’ anak datu.

¹⁹Ma’kadami tu Gideon nakua: Tau iato mai siulu’ku, sangindo’na’! La lelukraka tuoNa PUANG, iakemmi patuoi, manassa tae’ kupateikomi.

²⁰Ma’kadami lako Yeter, anak pa’bunga’na nakua: Ke’de’ko ammu patei. Apa mataku’ tu pia muane iato sia tae’ nanonokki tu pa’dangna, belanna mangurapa.

²¹Attu iato ma’kadami Zebah sola Salmuna nakua: Kamu kalenamo ke’de’ untobokkanni, belanna susi taunna susi dukato tu kamatotoranna. Ke’de’mi tu Gideon, anna patei tu Zebah sola Salmuna sia naalai tu pareanan susito bulan ma’rangkapan lan mai baroko untana.

²²Ma’kadami tu to Israel lako Gideon nakua: Kamumo umpuangikan totemo la kamu la anakmi la ampomi, belanna kamumo urrampanangkan lan mai kuasanna to Midian.

²³Mebalimi tu Gideon lako tau iato mai, nakua: Tangia aku la umpuangikomi sia tangia duka anakku, sangadinna PUANG Ia tu la umpuangikomi.

²⁴Sia ma’kadapa tu Gideon lako tau iato mai, nakua: Misa’ri kupalaku lako kalemi: Pantankomi la umbenna’ simisa’ baba’ pangrampami; iatu tau iato mai ma’baba’ bulaan, belanna to Ismael.

²⁵Ma’kadami tu tau iato mai, nakua: La kipa’bengan situang penaa sallo’ki. Naampa’mi tu misa’ bayu lamba’, anna pantan umbuangi rokko simisa’ baba’ dio mai pangrampana.

²⁶Iatu timbanganna mintu’ baba’ bulaan den sangsa’bu pituratu’ sikele’ bulaan,[2] senga’pi tu pareanan susito bulan ma’rangkapan, anting-anting sia pakean lango-lango makaseda, tu napakemo datu to Midian, sia senga’pa ia tu mintu’ rante lan baroko untana.

²⁷Mintu’ to apa iato nagaragai Gideon misa’ epo’, anna palanni kotana Ofra. Iatu mintu’ to Israel memboko’mo namale umpa’deatai tu epo’; iamo dadi poya lako Gideon to sia lako mintu’ to lan banuanna.

²⁸Susimoto tu to Israel umpatundukki tu to Midian sia tang nabelamo tu tau iato mai umbangunan ulunna. Attu iato tonna linona Gideon marampa’mi tu tondok lan patang pulo taunna.

²⁹Sulemi tu Yerubaal, anakna Yoas, anna torro lan banuanna.

³⁰Den pitungpulo tu anak dadianna Gideon, belanna buda tu bainena.

³¹Iatu baine gundi’na dio Sikhem umpadadianni misa’ muane, tu nasangai Abimelekh.

³²Matemi tu Gideon, anakna Yoas, tonna sumpu matuamo, anna lamun-ni tau lan lamunanna Yoas, ambe’na dio Ofra, to Abiezer.

³³Iatonna mate tu Gideon, memboko’mi tu to Israel umpengkaolai Baal sia umpodeata Baal-Berit;

³⁴tae’mo nakilalai to Israel tu PUANG, Kapenombanna, tu mangkamo urrampanan tau iato mai lan mai limanna mintu’ ualinna tiku lao,

³⁵sia tae’ napabala’i kamamasean tu to lan banuanna Yerubaal — Gideon sitinaya mintu’ kameloan tu na pogauran to Israel.