Read Toraja-Sa'dan YUDAS 1 Bible Online

YUDAS 1 - Toraja-Sa'dan bible

YUDAS 1

¹Sura’ iate lu dio mai Yudas, taunNa Yesu Kristus sia siulu’na Yakobus, diparampo lako mintu’ to ditambai tu naluang pa’kaboro’Na Puang Matua Ambe’ sia kadikarimmanan dio mai Yesu Kristus.

²Dennoupa’ anna sakerangngan-rangnganna tu kamamasean sia kamarampasan na pa’kaboro’ lako kalemi.

³E mintu’ pa’kaboro’ku, iatongku pengkullei tongan-tonganni massura’ lako kalemi diona kamakarimmananta sola, nasangami lan penaangku la massura’na’ umpakilalakomi, ammi pengkullei umpangeai tu kapatonganan dipissanni disorong lako mintu’ to masallo’.

⁴Belanna den ba’tu pira-pira tau tama buni, iamotu to tisura’ dolomo lako ukungan iate; to tang mekaaluk, tu ussondai tang penggauran tu pa’kamaseanNa Kapenombanta, anna peonganni tu pangulu misa’ta sia Puangta, Yesu Kristus.

⁵Apa kuporai la umpakilalakomi, moi ammi tappuimi miissan nasang, tonna mangka Puang ungkarimmanni tu misa’ bangsa tassu’ lan mai tondok Mesir, undinnato Nasabu’imi tu mai to tang ma’patongan.

⁶Sia mintu’ malaeka’ tang undampang pangka’na, sangadinna ussalai kao’koranna, Napattang rante bassi matontongan Puang naonganni kamalillinan sae lako pangukungan allo kapua iato.

⁷Susi Sodom na Gomora sia mintu’ tondok nasikandappiran, susi bangsiamo tau iato mai mangka ussorong kalena lako gau’ tang nakande asu anna male sigau’ sala tangia bali lalan biasanna, mendadi misa’ rapangan nakande api tang pa’de-pa’de tonna perasai kamaparrisanna.

⁸Moi susito iatu mai to katindo-tindo ia dukamoto urruttakki kalena, sia untumpu mintu’ pekapuangan sia nakagi’gi’ tu mintu’ mala’bi’na.

⁹Apa Mikhael pangulu malaeka’, tonna site’ge’ deata bulituk ussialai batang rabukna Musa, tae’ ia nabarani ungkada layukki, sangadinna nakua bangri: Na Puangmora unnada’ko.

¹⁰Apa mintu’ tau iate ungkagi’gi’ apa tae’ natandai, sia apa natandai tu belanna inang a’gannamo susito panampa tang keinaa, na dionamora apa iato nanii sanggang tau iato mai.

¹¹Upu’ allona tau iato mai, belanna unturu’mo lalanna Kain, sia mentu’mu’mo tama peroso sarona Bileam, anna sanggang diona pabali-balinna susi Korah.

¹²Tau iamote mai tu umpaattangan mintu’ kakumandean umpotete pa’kaboro’mi, ke kumandekomi sola tau iato mai tae’ naissanni tu siri’, ungkilalai misa bang kalena; butung to gaun tang untambuk uai, nairi’ angin male lao, sia susi garonto’ kayu tang membua ke tampak pealloanni, penduan mate sia tibuak sae lako aka’na;

¹³susi bombang kapua lan tasik umpemburrusan kalena siri’na; susi bintoen tilele-lele; tau iato mai tiparandanmo kamapattangan lako kalena tontong sae lakona.

¹⁴Diona dukamo tau iato mai namangka ma’nubua’ tu Henokh, bati’ ma’pempitunna Adam, nakua: Tiromi, saemo tu Puang sola to masallo’Na ma’pulo-pulo sa’bu,

¹⁵la umpaolai salunna lako mintu’na tau, sia la unnukung mintu’ to tang mekaaluk diona mintu’ penggauran tang mekaalukna, tu mangka napogau’ tang mekaaluk, sia diona mintu’ kada makarra’ nasa’bu’ to kasalan tang mekaaluk unnea Puang.

¹⁶Tau iamorato mai tu pa’nuku-nukuan sia suma’rok sia unturu’ bang kamoraianna, ma’kada matampo, anna ussede tau belanna untiroan misa kalena.

¹⁷Apa kamu te, e pa’kaboro’ku, la mikilalai tu apa napokada dolomo mintu’ rasulu’Na Puangta Yesu Kristus;

¹⁸susitu mangkamokomi napokadan, kumua iake attu undinna la sae ba’tu pira-pira to patelle tu unturu’ kamailuan masuangna.

¹⁹Tau iato mai tu umpaden kasisarakan, iamotu to umbudanan mentolinona sia tae’ Nanii Penaa.

²⁰Apa kamu te, e pa’kaboro’ku, pabantangi tu kalemi umpoparandangan kapatonganan masallo’mi tongan, ammi massambayang Narondong Penaa Masallo’.

²¹Nasusito karitutui tu kalemi lan pa’kaboro’Na Puang Matua, ammi tayan kamamaseanNa Puangta Yesu Kristus tu mebaa lako katuoan matontongan.

²²Iatu to bata-bata kamasei;

²³sia sintakki tu tau iato mai lan mai to’ api ammi pamakarimmanni; na lako tu senga’na la matangkinkomi ungkamasei, sia la mikagi’gi’ tu tamangkale naruttakki kamoraian pa’kalean.

²⁴Na lako Puang, tu kuasa ungkarimmannikomi dio mai katitodoan, anNa popennolo tang sayuangkomi dio olo mala’bi’Na, situang kaparannuan kapua,

²⁵iamo Puang Matua tu Misari, To pakarimmananta, tete dio Yesu Kristus tu Puangta, tu kamala’biran sia kakapuan sia kamatotoran sia kapaan tempon dio mai sia totemo te sia sae lakona. Amin.