Read Toraja-Sa'dan KADA OMBO’ LAKO RASULU’ YOHANES 10 Bible Online

KADA OMBO’ LAKO RASULU’ YOHANES 10 - Toraja-Sa'dan bible

KADA OMBO’ LAKO RASULU’ YOHANES 10

¹Kutiromi misa’ malaeka’ senga’ matoto’ mengkalao dao mai langi’ umpobayu lamba’ gaun, sia tindak sarira dao ulunna, sia lindona butung to allo, sia lette’na susito lentong api.

²Lan limanna den misa’ sura’ bitti’ tibungka’; iatu lette’ kananna mellese diong tasik, na lette’ kairinna dao karangkean;

³metambami umpekapuai gamaranna susi gamara singa umburrung-burrung na iatonna metamba, pantan unnonimi tu pitu guntu’.

⁴Iatonna unnonimo tu guntu’ pitu, angku la ussura’i, kurangimi misa’ gamara dao mai langi’, nakua: Ca’i to apa mangka napokada pitu guntu’ sia dandi’ sura’i.

⁵Iatu malaeka’ mangka kutiro mellese diong tasik sia dao karangkean unnangka’ lima kananna lu langngan langi’,

⁶anna menggata ussa’bu’ sanganNa Puang tu tuo matontongan, tu umpadadi langi’ sola mintu’ issinna sia lino sola mintu’ issinna sia tasik sola mintu’ issinna, kumua: tae’mo nala disorong.

⁷Apa iake oni gamarannami malaeka’ ma’pempitunna, ke la umpannonimi tarompe’ puana, maneri dipalanda’ tu rasianNa Puang Matua, susitu kareba dipa’peissanan lako mintu’ taunNa, iamo mintu’ nabi.

⁸Iatu gamara mangka kurangi dao mai langi’ ma’kada pole’o lako kaleku, nakua: Maleko, alai tu sura’ tibungka’ lan limanna to malaeka’ mellese diong tasik sia dao karangkean.

⁹Malemo’ lako malaeka’ iato angku kua lako kalena: Benna’ tu sura’ bitti’ iato. Nakuami lako kaleku: Alami ammu kande nasangi, sia iamo la umpemapai’i tambukmu, apa lan sadangmu la musa’ding matanning susi uai tani’.

¹⁰Kualami tu sura’ bitti’ dio mai limanna tu malaeka’, angku kande nasangi; lan sadangku matanning susi uai tani’, apa iatongku mangka ungkandei, mapai’mi lan tambukku.

¹¹Dikuammo’: La ma’nubua’ko diona ba’tu pira-pira to sangpetayanan sia ba’tu pira-pira bangsa sia ma’rupa-rupa basa sia ba’tu pira-pira datu.