Read Toraja-Sa'dan KADA OMBO’ LAKO RASULU’ YOHANES 11 Bible Online

KADA OMBO’ LAKO RASULU’ YOHANES 11 - Toraja-Sa'dan bible

KADA OMBO’ LAKO RASULU’ YOHANES 11

¹Nabenmo’ bulo sanglolo susito tekken, anna ma’kada, nakua: Bendanko ammu suka’i tu banuanNa Puang Matua sia inan pemalaran sia mintu’ tu to menomba lan.

²Sia paboko’i tu luba’ba dio salianna banuanNa Puang Matua, da musuka’i, belanna dibenmo to kapere’ sia iatu tondok maindan la dilessa’-lessa’ patangpulo ndua bulanna.

³La Kuben kuasa tu da’dua to ma’katottongingKu tu ma’tamangkale karoro’, ma’nubua’ sangsa’bu duaratu’ annan pulona allona.

⁴Iamo sangrapang da’dua garonto’ saitun sia da’dua tongkonan palita, tu bendan dio oloNa Puangna lino.

⁵Iake denni tau la morai ussanggangi to sola duai, sunmi tu api lan mai sadangna ungkandei tu mintu’ ualinna; sia iake denni misa’ tau la ussanggangi sola duai, manassa la mate susi duka iato.

⁶Kuasa ia sola duai la untampun langi’, kumua da nasae uran, ke tontongpi sola duai ma’nubua’, sia kuasa sola duai umpopendadi rara uai, sia umparampoi ma’rupa-rupa kasanggangan tu lino pempiran-piran, tu naporainna.

⁷Iatonna pasundunmi tu pa’katottonginna sola duai, la narariimi olo’-olo’ masuru tu sun diong mai posi’ tana lambe’, sia nataloi anna patei.

⁸Iatu batang rabukna sisumpandanan dio lalan tondok kapua, tu lan rapangan disanga Sodom na Mesir, tu Nanii duka Puangna dia’ta’.

⁹Ba’tu pira-pira tau dio mai mintu’ bangsa sia suku sia basa sia to sangpetayanan untiroi tu batang rabuk iato tallung allo sangpolo, sia tae’ naeloranni tau iato mai tu batang rabukna dilamun.

¹⁰Mintu’ tu to untorroi kuli’na padang umpoparannui sia sende-sende sia siben ben apa, belanna iatu nabi sola duai umpakario-rio mintu’ to untorroi kuli’na padang.

¹¹Undinnato tallung allo ssangpolo natamaimi penaa ma’patuo lu dio mai Puang Matua sola duai, anna malimbangun bendan; saemi kamatakuran kapuana tu mintu’ to untiroi sola duai.

¹²Tau iato mai mangka urrangi misa’ gamara kapua dao mai langi’ ungkuanni sola duai: Kendekkomi mai. Kendekmi sola duai langngan langi’ naputu’ gaun, sia mintu’ ualinna untiroi.

¹³Iatonna attu ia dukato saemi lino’ kapua, naurunganni mangsan taa sangpulona tu tondok iato; pitungsa’bu tau mate belanna lino’ iato, na iatu torronapa lendu’ mataku’na, anna pakala’bi’i tu Puang Matua dao suruga.

¹⁴Iatu kamaparrisan ma’penduanna lendu’mo; kanandai tu kamaparrisan ma’pentallunna la sae madomi’.

¹⁵Iatu malaeka’ ma’pempitunna umpannoni tarompe’ puana, denmi ba’tu pira-pira gamara kapua dao suruga ma’kada nakua: Iate kadatuan lino natoemo Puangta sia To Natokko, Iamo la ma’parenta tontong sae lakona.

¹⁶Iatu duangpulo nna’pa’ penatua tu unnisung dao isungan kapayunganna dio oloNa Puang Matua tukku umpenombai Puang Matua,

¹⁷anna ma’kada: Ma’kurre sumanga’kanni mati’ oloMi, o Puang Kapenomban, tu Umpoissan angge maritik, tu den, sia inang den tempon dio mai, belanna untoeKomi kuasa kapuaMi sia ma’parentamoKomi.

¹⁸Kendekmo kasengkeanna tu mintu’ bangsana to kapere’, apa saemo tu kasengkeamMi, sia attu umpaolai salunna to mate, sia nalambi’mo attunna kadiseronginna karongkosan tu mintu’ taumMi, iamotu mintu’ nabi sia mintu’ to masallo’ sia to ungkasiri’ sangamMi, la bitti’ la kapua; sia nalambi’mo attunna ussanggangi tu mintu’ to ussanggang lino.

¹⁹Tibungka’mi tu banuanNa Puang Matua dao suruga, kaananmi tu patti pangalluranNa Puang Matua lan tu banua iato; saemi ba’tu pira-pira kila’ sia gamara sia guntu’ sia lino’ sia uran batu kamban.