Read Toraja-Sa'dan KADA OMBO’ LAKO RASULU’ YOHANES 14 Bible Online

KADA OMBO’ LAKO RASULU’ YOHANES 14 - Toraja-Sa'dan bible

KADA OMBO’ LAKO RASULU’ YOHANES 14

¹Tiramban kutiroi tu Anak domba bendan dao buntu Sion, sia sisola tau saratu’ patangpulo nna’pa’ sa’bunna, tu to disura’ dio kidena tu sanganNa Anak domba sia sanganNa Ambe’Na.

²Angku rangi misa’ gamara dao mai langi’, takua to uai buda mongngo’, sia susi oni guntu’ kapua. Iatu gamara kurangi susito ma’katapi umpannoni katapinna;

³iatu tau iato mai umpopenani misa’ nanian ba’ru dio olo isungan kapayungan iato, sia olona a’pa’ a’gan kepenaa, sia mintu’na penatua; sia moi misa’ tau tae’ anna kullei umpelada’i tu nanian iato, sangadinna ia manna tu tau saratu’ patangpulo nna’pa’ sa’bunna tu to dila’bak dio mai lino.

⁴Iamote mai tu to tae’pa naparuttakki baine kalena, belanna malolle’pa; sia iamote mai tu to urrundu’ mai lako Anak domba umba-umba Naola. Iate tau iate mai mangka dila’bak tassu’ dio mai tolino Napobunga’ bua Puang Matua sia Anak domba.

⁵Sia tae’ ia mo’rang diappa’ dio pudukna sia tae’ sayuanna.

⁶Kutiromi misa’ malaeka’ senga’ mentia’ lan tangngana langi’, sia umbaa Kareba-kaparannuan matontongan, la napa’peissanan lako mintu’ to untorroi te kuli’na padang, iamotu mintu’ bangsa sia suku sia basa sia to sangpetayanan,

⁷anna metamba nakua: Kataku’i tu Puang Matua sia pangke’I, belanna rampomo tu attu kapa’paolaianNa salu, sia penombai tu Puang umpadadi langi’ sola lino sia tasik na mintu’ kalimbuang.

⁸Denno tu senga’na pole, undi urrundu’i, iamotu malaeka’ ma’penduanna anna ma’kada nakua: Mangsanmo, mangsanmo tu Babel, tondok kapua, belanna mangka napairu’ uai anggoro’ kamoraian gau’ salana tu mintu’ bangsa.

⁹Den siapa tu senga’na poleo undi urrundu’i sola duai iamotu malaeka’ ma’pentallunna, anna metamba nakua: Iake denni misa’ tau umpenombai olo’-olo’ iato sola rapang-rapang dipodeatanna sia untarima tanda dio kidena ba’tu dio limanna,

¹⁰la nairu’ duka tu uai anggoro’ iamotu kare’dekanNa Puang Matua, tu sakka’mo tang dito’bo’ lan irusan kasengkeanNa; sia la dipakario-rio api sia solo’ dio olona mintu’ malaeka’ masallo’ sia dio oloNa Anak domba,

¹¹sia iatu rambu kadipakario-rioanna kendek langngan tontong sae lakona: tau iato mai tae’ ka’tunna umperasai parri’ allo bongi, iamotu mintu’ to umpenombai olo’-olo’ iato sola rapang-rapang dipodeatanna sia to untarima tanda sanganna.

¹²Lan mintu’na te sipatu mintu’ to masallo’ umpa’pekitanan kabattaran, iamotu to ungkaritutui mintu’ parentaNa Puang Matua, sia kapatonganan lako Yesu.

¹³Kurangimi misa’ gamara dao mai langi’ ma’kada nakua: Sura’i susite: Rongko’ tu mintu’ to matemo, iamotu to mate lan Puang randuk totemo. Ondongpi, nakua tu Penaa, iatu tau iato mai la umpelayoan tarru’mo kamasussanna; belanna mintu’ penggauranna undi urrondongi.

¹⁴Tiramban kutiroi den sangkombong salebu’ mabusa, sia den misa’ tau unno’ko’ dao, takua susito Anak rampan dilino, ma’makota bulaan, sia dio limanNa den misa’ rangkapan mataran.

¹⁵Sun pole’omi misa’ malaeka’ senga’ lan mai banuanNa Puang Matua, metamba umpekapuai gamaranna lako tu To unno’ko’ dao salebu’ iato, nakua: Pata’pami tu rangkapanMi, amMi mepare, belanna nalambi’mo attu kapeparean, apa matasak tonganmo tu bura padang.

¹⁶Napopangayomi To unno’ko’ dao salebu’ tu rangkapanNa tama lino, nadipeparei tu lino.

¹⁷Sunmi misa’ malaeka’ senga’ pole’o lan mai banuanNa Puang Matua dao suruga; untoe toda ia misa’ pesae’ mataran.

¹⁸Sunomi dio mai to’ pemalaran misa’ malaeka’ senga’, tu ungkuasai api, anna metamba umpekapuai gamaranna lako malaeka’ untoe pesae’ taran, nakua: Pata’pami tu pesae’ taranmu, ta’takki tu mintu’ bure anggoro’ lino, belanna matasak melomo tu buanna.

¹⁹Napopangayomi malaeka’ iato tu pesae’na tama lino, nalellengi tu anggoro’lino iato, anna pembuanganni tama panglulluran kapua, iamo kasengkeanNa Puang Matua;

²⁰na bua anggoro’ lan panglulluran iato nalullu’ tau dio salian tondok; nalolong tu rara lan mai panglulluran iato angge passangaran darang, pada mambelanna sangsa’bu annanratu’ setadi.[1]