Read Toraja-Sa'dan KADA OMBO’ LAKO RASULU’ YOHANES 17 Bible Online

KADA OMBO’ LAKO RASULU’ YOHANES 17 - Toraja-Sa'dan bible

KADA OMBO’ LAKO RASULU’ YOHANES 17

¹Saemi misa’ tu malaeka’ pitu tu umbaa pitu gori-gori iato, umpa’kadaina’ nakua: Maiko la kupakitangko ukungan lako pa’gau’ sala masarrang tu unno’ko’ dio to’ uai buda;

²iamora nasigau’-salan mintu’ datu lan lino, sia mintu’na issinna lino nalangomo uai anggoro’ gau’ salana.

³Nabaai tu deatangku lako padang aak, angku tiroi tu misa’ baine messake dao misa’ olo’-olo’ mararang karamisi, nasituru’i sanga kada solang, sia pitu ulunna na sangpulo tandukna.

⁴Iatu baine iato ma’tamangkale lango-lango sia mararang karamisi rupanna, sia dipakei bulaan sia parimata, sia ma’rupa-rupa mattiara sia sitoe misa’ irusan bulaan ponno sanda kadake sia kamaruttakanna gau’ salana;

⁵sia dio kidena den sanga misa’ disura’, iamo rasia: Tu Babel kapua, indo’na gau’ sala sia sanda kadake lan lino.

⁶Kutiromi tu baine iato nalango rara, rarana mintu’ to masallo’ sia rarana mintu’ to ungkatottongI Yesu. Lendu’ mangngaku untiroi.

⁷Nakuami tu malaeka’ iato lako kaleku: Ma’apari ammu mangngara? La kupokadangko tu rasia diona te baine, sia diona olo’-olo’ nasakei, tu pitu ulunna sia sangpulo tandukna.

⁸Iatu olo’-olo’ mutiro, dolona den apa totemo pa’demo, la kendek diong mai garonggong posi’ tana lambe’, namentama kasanggangan. Mintu’na tau lan lino tu randuk dio mai diparandanganninna te lino tu tang disura’ sanganna lan sura’ katuoan, la mangnga, ke natiroi tu olo’-olo’ tu dolona den, apa totemo pa’demo sia la bu’tu pole.

⁹Inde te sipatu diangkaran tu tangnga’ narondong kakinaan; iatu pitu ulu iato, iamo pitu buntu, nanii tu baine iato unno’ko’ sia ia dukamoto tu pitu datu:

¹⁰Limamo tu tibambang, nadenpa tu misa’, sia iatu senga’na tae’pa sae, iake saemi, tae’ nasalai tang torro sangattu’.

¹¹Iatu olo’-olo’ tu den dolona, na totemo pa’demo, iamo ma’pengkaruanna, sia sangbilangan sola tu pitunna, sia mentama duka kasanggangan.

¹²Sia iatu sangpulo tanduk mutiro iamo sangpulo datu tu tang untarimapa kadatuanna, apa kuasa susi datu-datu sisola olo’-olo’ iato sangte’te’ bangri.

¹³Samaturu’mi sola nasangi, anna sorongi tu kamawatanganna sia kakuasanna lako olo’-olo’ iato.

¹⁴Mintu’i sola nasang la sirari Anak domba, apa la Natalo Anak domba; belanna Iamo Puangna mintu’ puang sia Datunna mintu’ datu; na mintu’ tu baananna patalo duka, iamotu mintu’ to ditambai sia to ditonno’ sia iatu to maruru’.

¹⁵Nakuami lako kaleku: Iatu mintu’na uai mutiro dio inan nanii unno’ko’ pa’gau’ sala iato, iamora tu ba’tu pira-pira to sangpetayanan sia to tang dipetayanni sia mintu’ bangsa sia basa.

¹⁶Na iatu sangpulo tanduk sia olo’-olo’ tu mutiro, iamo la ungkabiri’ pa’gau’ sala iato anna kalosso’i sia nakambelangi, sia la nakande tu duku’na sia natunu api.

¹⁷Belanna Napatamaimo tanan penaa Puang Matua tu penaanna la umpogau’ pa’poraianNa Puang Matua sia samaturu’ tu tau iato mai sia ussorong kadatuanna lako olo’-olo’ iato sae lako rampo randanna tu kadanNa Puang Matua.

¹⁸Iatu baine mutiro iamo tondok kapua, tu umparenta mintu’ datu lan lino.