Read Toraja-Sa'dan KADA OMBO’ LAKO RASULU’ YOHANES 18 Bible Online

KADA OMBO’ LAKO RASULU’ YOHANES 18 - Toraja-Sa'dan bible

KADA OMBO’ LAKO RASULU’ YOHANES 18

¹Undinnato kutiromi misa’ malaeka’ senga’ songlo’ dao mai langi’ tu kapua kuasanna, na iatu lino naarrang kamala’biranna.

²Melallakmi umpekapuai gamaranna nakua: Ro’pokmo, ro’pokmo tu tondok Babel kapua sia naniimo tonang mintu’ deata bulituk, sia nanii pentirerunganna mintu’ deata masussuk, sia pa’kurunganna manuk-manuk maruttak sia dikagi’gi’na.

³Belanna mintu’ bangsa unniru’mo uai anggoro’ kamoraian gau’ salana, sia sigau’ salamo mintu’ datu lan lino sia mintu’ pa’baluk-baluk lan te lino sanapasugi’-sugi’na belanna lendu’ tongan malabona.

⁴Kurangi polemi misa’ gamara senga’ dao mai langi’ nakua: Mallaikomi dio mai kalena, e taungKu, da ammi perapii tu mintu’ kasalanna, sia da anna pada urruakomi kamaparrisanna;

⁵belanna ma’tombon-tombonmo sumpu langngan langi’ tu mintu’ kasalanna, sia Nakilalaimo Puang Matua tu mai kakelokanna.

⁶Papakkanni lako kalena susitu napogau’na sia popanglokkon penduanni na iatu mintu’ penggauranna; na iatu lan irusan mangka napasito’bo’, to’boranni manglokkon penduan.

⁷Tumba tu kaumpamadoanna kalena sia kasolleranna, pada dukato tu kamaparrisan sia tangi’ la mibenni, belanna nakua lan penaanna: Unnisungna’ susi datu baine; tangiana’ to balu, sia inang tae’ angku la sitiro katumangiran.

⁸Iamo bannangna to nalan sangallori nanii la bu’tu tu kamaparrisanna, iamotu kamatean, katumangiran sia ra’pak padang, sia la ditunu api, belanna mawatang tu Puang Matua, tu Puang umpaolai salunna.

⁹Mintu’ datu lan lino tu nasigau’ salan sia nasolan solle’, la untangi’i sia la umbatingi, ke natiromi tu rambu api ungkandei,

¹⁰anna bendan mambela belanna ungkataku’ kadipakario-rioanna sia ma’kada nakua: A’a, a’a tondok Babel kapua, sia tondok matoto’! sangte’te’ri anna saemo tu ukungan urrampoiko.

¹¹Sia mintu’ pa’baluk-baluk lan lino untangi’i sia umbatingi, belanna moi misa’ tau tae’mo unnalli balukanna,

¹²iamotu balukan bulaan sia salaka sia parimata, sia ma’rupa-rupa mattiara, sia sampin kasa, sia sampin lango-lango, sia sa’be, sia sampin karamisi, sia mintu’ kayu busarungngu’, sia mintu’ parea digaraga dio mai gading, sia dio mai kayu masuli’ allinna, sia dio mai tambaga sia bassi, sia dio mai batu marmar,

¹³sia kayu tanik, sia minna’ pandere’, sia kemenian, sia muru, sia dupa, sia uai anggoro’, sia minna’ saitun, sia ta’pung manisak, sia gandung, sia sapi, sia domba, sia darang, sia kareta, sia kaunan sia sunga’ tolino.

¹⁴Iatu anggenna bua-bua nakaelo’i penaammu lanna’mo dio mai kalemu, sia mintu’na tu mammi’na sia maballona tilendokmo dio mai kalemu tae’mo dikabu’tui len.

¹⁵Mintu’ to ma’balukna balukan iate, tu napasugi’mo, la bendan mambela, belanna ungkataku’ kamaparrisanna, natumangi’ sia umbating,

¹⁶nakua: A’a, a’a tondok kapua, tu umpobelo sampin kasa, sia sampin lango-lango sia sampin karamisi, sia nasapu’ bulaan sia parimata sia mattiara!

¹⁷Sangte’te’ri nanii sanggang tu mintu’na kasugiran susi kapuana to. Mintu’ durukamudi, sia mintu’ to ma’lopi, sia mintu’ to mengkarang lan kappala’ sia mintu’ tu umpopandakaran tasik, bendan mambela.

¹⁸Pakalan melallakmi tonna tiroi tu rambu api ungkandei, nama’kada nakua: Tondok umbara tu pada te tondok kapua iate?

¹⁹Nasamborammi tau iato mai tu barra’-barra’ langngan ulunna sia melallak anna tumangi’ sia umbating nakua: A’a, a’a tondok kapua, nanii to unnampui kappala’ lan tasik, napasugi’mo mintu’ iananna; sangte’te’ri nanii sanggang!

²⁰E, lanna suruga, sia mintu’ to masallo’ sia mintu’ rasulu’, sia mintu’ nabi arrakki, belanna Napaolaiammokomi salunna Puang Matua.

²¹Naangka’mi misa’ malaeka’ mawatang tu misa’ batu susi rupanna batu pangrissoan, napempa’nakanni tama tasik nama’kada nakua: Tete dio pepa’nak susite, na iatu Babel, tondok kapua la tipempa’nak, sia inang tae’mo anna dikita len.

²²Sia oni to ma’katapi sia to menani sia to massuling sia tarompe’ pua tae’mo anna dirangi lan mai, sia iatu to manarang lan misa’ kamanarangan, tae’ dukamo untorroiko, sia oni batu pangrissoan inang tae’mo anna dirangi.

²³Sia arrang palita inang tae’mo anna la parrang lan lili’mu, sia gamara muane diparampo sia baine narampoi tae’mo anna la dirangi lan. Belanna mintu’ to ma’baluk-balukmu to kapua lan lino; belanna balik matammu, pusami tu mintu’ bangsa.

²⁴Nalan lili’na diappa’ tu rarana mintu’ nabi sia to masallo’ sia rarana mintu’ to dipatei lan te lino.