Read Toraja-Sa'dan KADA OMBO’ LAKO RASULU’ YOHANES 2 Bible Online

KADA OMBO’ LAKO RASULU’ YOHANES 2 - Toraja-Sa'dan bible

KADA OMBO’ LAKO RASULU’ YOHANES 2

¹Surasanni malaeka’ kombongan dio Efesus susite: Kumua iamote tu kada lu dio mai Puang tu untoe pitu bintoen lan lima kananNa, tu sumalong lu lako lu dio mai lan tangngana tu pitu tongkonan palita bulaan.

²Kuissan tu mintu’ penggaurammu sia kamara’tasammu sia kabattarammu, sia kutandai kumua tae’ mutananni tu mintu’ to kadake, apa mangkamo musudi tu mintu’ to ussanga kalena rasulu’, apa tangngia, sia muappa’ to mo’rang tu tau iato mai;

³sia batta’ penaammu sia tang mata’ka’ko ma’patanan belanna sangangKu.

⁴Apa den misa’ Kusayuangko, iamotu untampemoko pa’kaboro’ dolomu.

⁵Iamoto kilalai tobang lu umbako nii, sia mengkatoba’ko sia pogau’i sule tu penggauran dolomu; iake tae’i, la mati’Na’, angKu palelei tu tongkonan palitammu dio mai inanna, sangadi ke mengkatoba’ko.

⁶Apa den dio kalemu tu apa iate, iamotu mukabiri’ tu mintu’ penggauranna to Nikolaus, tu Kukabiri’ duka.

⁷Minda-minda ketalinga, la naperangii tu apa Napokada Penaa lako mintu’ kombongan. Na lako to patalo, la Kupakande bua katuoan tu lan FirdausNa Puang Matua.

⁸Surasanni malaeka’ kombongan Smirna susite: Iamote tu kadanNa Puang tu pamulanna sia ma’katampakanna, tu mangka mate, anna tuo sule:

⁹Kuissan tu kadipakario-rioammu sia kabongkoammu — apa sugi’ko — sia Kuissan tu petelle dio mai to ussanga kalena to Yahudi, apa tangngia, sangadinna misa’ banua pa’kombonganna deata bulituk.

¹⁰Da mukataku’i tu mintu’ kadipakario-rioan la muperasai. Tiromi, iatu deata bulituk la napatamakomi pa’tarungkuan pira, anna rosokomi, sia la dipakario-riokomi sangpulo allona. Apa batta’ko sae lako matemu, angKu benko tu makota katuoan iato.

¹¹Minda-minda ketalinga la naperangii tu apa Napokada Penaa lako mintu’ kombongan na iatu to patalo tae’ nala urrua lenni kasanggangan kamatean ma’penduan.

¹²Surasanni malaeka’ kombongan Pergamus susite: Iamote tu kada lu dio mai Puang tu ma’pa’dang mataran patomali.

¹³Kuissan umba tu munii torro, iamotu naninna isunganna deata bulituk. Mentoeko lako sangangKu sia tae’ mupeonganni tu kapatonganan lako Kaleku, moi iatonna attunna Antipas, sa’bi maruru’Ku, tu mangka dipatei dio tingayomi, dio inan nanii deata bulituk torro.

¹⁴Apa den sidi’ Kusayuangko, belanna denkomi tu mentoe lako pangadaranna Bileam, tu mangka unnada’i Balak umpaden katitodoan lako to Israel, naurunganni tau iato mai ungkandei tu apa dipemalaran lako deata, sia ma’gau’ sala.

¹⁵Ten dukami to denkomi tu mentoe lako pangadaranna to Nikolaus, tu susi dukato.

¹⁶Iamoto mengkatoba’ko; iake tae’i la saeNa’ mati’ madoi’, angKu rarii pa’dang dio te pudukKu tu tau iato mai.

¹⁷Minda-minda ketalinga la naperangii tu apa Napokada Penaa lako mintu’ kombongan. Na lako tu to patalo, la Kuben manna kabunian, sia la Kuben misa’ batu mabusa na dio batu iato tisura’ misa’ sanga ba’ru, tu tae’ misa’ tau untandai, sangadinna ia manna tu to untarimai.

¹⁸Surasanni malaeka’ kombongan Tiatira susite: Iamote tu kadanNa AnakNa Puang Matua, tu matanNa susi dukku api, sia lentekNa susi tambaga pandila-dila.

¹⁹Kuissan tu mintu’ penggaurammu, sia pa’kaboro’mu, sia kapatonganammu sia pa’kamayamu sia kabattarammu sia mintu’ penggauran ma’katampakammu mandu losong na iatu pamulanna.

²⁰Apa den apa Kusayuangko, iamotu mupopa’elo’na tu baine disanga Izebel ungganti kalena nabi, sia mangada’ anna umpapusa mintu’ taungKu ma’gau’ sala sia ungkande apa dipemalaran lako deata.

²¹Mangkamo Kutempoan kumua anna mengkatoba’, apa tae’ namorai mengkatoba’ dio mai tu gau’ salana.

²²Tiromi, la Kupamasaki dao inan mamma’na, sia iatu to nasolan ma’gau’ sala Kupatama kamasussan kapua, sangadinna ke toba’mi unturu’ mintu’ penggauranna baine iato.

²³Sia mintu’ anakna la Kusabu’i, anna mintu’ kombongan la unnissanni, kumua Akumo tu umparessa ba’tang sia penaanna tau sia Akumo tu la umpapakkannikomi situru’ penggauran simisa’-misa’mi.

²⁴Apa lako kamu mintu’ to senga’ dio Tiatira samami tu tang unturu’ pangadaran iato, sia tae’ naissanni tu kamandalananna deata bulituk, susi kadanna tau iato mai, — Kukua, kumua: tae’ Kupapassannikomi panglemba senga’.

²⁵Apa iatu apa den dio kalemi, toe manda’i sae lako saeKu.

²⁶Na iatu to patalo, sia ungkaritutui mintu’ pengkarangangKu sae lako ma’katampakanna, la Kuben kuasa ungkuasai mintu’ to kapere’;

²⁷anna parentai unnoong tekken bassi; butung kurin tana la dinisak-nisak, tete dio kuasa, susitu Kutarimanna dio mai Ambe’Ku

²⁸sia la Kuben bintoen sulo melambi’ iato.

²⁹Minda-minda ketalinga la naperangii tu apa Napokada Penaa lako mintu’ kombongan.