Read Toraja-Sa'dan KADA OMBO’ LAKO RASULU’ YOHANES 22 Bible Online

KADA OMBO’ LAKO RASULU’ YOHANES 22 - Toraja-Sa'dan bible

KADA OMBO’ LAKO RASULU’ YOHANES 22

¹Napakitammo’ misa’ salu nanii uai katuoan, malino susi kinang lolong dio mai to’ isungan kapayunganNa Puang Matua sia Anak domba.

²Lan tangnga lalan lan tondok iato sia patomalinna randanan salu iato den kayu katuoan, membua pessangpulo dua; bulanoi membuaoi, namintu’ daunna napomondo mintu’ bangsa.

³Tae’ ia tampak ropu dio; na iatu isungan kapayunganNa Puang Matua sia Anak domba la tongkon lan, sia mintu’ taunNa la mengkaola lako Kalena,

⁴sia la untiro lindoNa, sia iatu sanganNa den dio kidena tau iato mai.

⁵Tae’mo nala bongi len, sia tau iato mai tae’ nala umpiang arrang palita sia arrang matallo, belanna Puang Kapenomban la unnarrangi, sia la ma’parenta tu tau iato mai tontong sae lakona.

⁶Nakuami lako kaleku: Mintu’ kada iate matappa’ sia tonganna. Iatu Puang Matua, Puangna mintu’ penaanna nabi, ussuamo malaeka’Na umpakitanni mintu’ taunNa tu apa tae’ anna salai tang la dadi madoi’.

⁷Kilalai, la madoi’Na’ sae. Maupa’ tu to ungkaritutui mintu’ kada pa’nubua’ lan sura’ iate.

⁸Akumo Yohanes tu urrangii sia untiroi tu mintu’na te. Iatongku rangimi sia kutiromi, tukku dukamo’ umpenombai tu malaeka’ umpakitan nasangna’ tu mintu’ apa iato.

⁹Nakuami lako kaleku: Da mususi to. Aku te padaki’ taunNa Puang Matua, sia susi duka mintu’ sangsiulurammu, nabi sia mintu’nato ungkaritutui mintu’ kada lan sura’ iate. Puang Matua Ia mupenombai.

¹⁰Nakuami lako kaleku: Da mumanda’i tu ca’na mintu’ kada pa’nubua’ lan sura’ iate, belanna iatu attunna mandappi’mo.

¹¹Iatu to kelok, da’ito napatarru’i umpogau’ kakelokanna, sia iatu to maruttak, da’ito anna samaruttak-ruttakna; na iatu to malambu’, dai’to napatarru’i umpogau’ kamalamburan; na iatu to masallo’ da’ito anna sadipamasallo’-sallo’na.

¹²Kilalai, la saeNa’ madoi’, na iatu pepakkan dio mai Kaleku Kubaa len, dikua angKu papakkanni simisa’-misa’i tu tau sitinaya penggauranna.

¹³Akumote tu Alfa sia Omega. Bunga’-bunga’na sia Undi’-undi’na, Pamulanna sia Ma’katampakanna.

¹⁴Maupa’ tu mintu’ to umbusukki bayu lamba’na, naurunganni den katongananna unnappa’i tu kayu katuoan iato, sia mentama tondok iato unnola babangan.

¹⁵Apa la salian rinding tu mintu’ asu sia to patiro-tiro sia to ma’gau’ sala, sia mintu’ to papatean, sia mintu’ to umpenombai deata, sia minda-minda tu ungkamali’ kamo’rangan sia umparri-parrii.

¹⁶Akumote tu Yesu mangka ussua malaeka’Ku la ungkatottongi lako kalemi tu mintu’ apa iate lan mintu’ kombongan. Akumo tu una’na sia tarukna Daud, sia bintoen sulo melambi’ pandala-dala.

¹⁷Ma’kadami tu penaa sola baine ma’kapa’ nakua: MaiKomi! Sia iatu to urrangii, melo ke nakua dukai: MaiKomi! Na iatu to ma’rang, melo ke saei, sia minda-minda morai, melo ke natimbai tu uai katuoan tang dibaya’.

¹⁸Kusedan sarong lako mintu’ to urrangii tu kada pa’nubua’ lan sura’ iate, kumua iake denni tau urrangnganni tu kada iato, manassa la Narangnganni Puang Matua lako kalena te mintu’ kamaparrisan disura’ lan sura’ iate;

¹⁹sia iake denni tau umpa’deanni pira tu kada lan sura’ pa’nubua’ iate, manassa la Napaputta Puang Matua tu taana dio mai kayu katuoan sia dio mai tondok maindan, susitu disura’ lan sura’ iate.

²⁰Iatu To umpamanassai te mintu’na apa iate, Nakua ma’kada: Tonganna, la saeNa’ madomi’. Amin, maimoKomi, o Puang Yesu!

²¹Anna pa’kamaseanNamora Puang Yesu urrondong mintu’ to masallo’.