Read Toraja-Sa'dan KADA OMBO’ LAKO RASULU’ YOHANES 9 Bible Online

KADA OMBO’ LAKO RASULU’ YOHANES 9 - Toraja-Sa'dan bible

KADA OMBO’ LAKO RASULU’ YOHANES 9

¹Iatu malaeka’ ma’pellimanna umpannoni tarompe’ puana, angku tiroi misa’ bintoen mangka ronno’ dao mai langi’ tama lino; dibenmi gonting garonggong posi’ tana lambe’.

²Nabungka’mi tu garonggong posi’ tana lambe’, nasun rambu lan mai posi’ tana lambe’ iato, susi rambu dio mai panglallangan, naurunganni tu mata allo sia langi’ malillin napobua’ rambu posi’ tana lambe’ iato.

³Sunmi lan mai to’ rambu iato tu batik anna tama lino, anna diben kuasa susi kuasa te’tek-buku lan te lino.

⁴Dipokadammi kumua tae’ nala ussanggangi tu riu lan lino, ba’tu tananan ba’tu garonto’ kayu, sangadinna tolino manna tu tae’ ca’Na Puang Matua dio kidena.

⁵Dielorammi la napa’dikki bang limang bulan, podo da napatei. Iatu pa’di’na susi pa’di’na to nasui’ te’tek-buku.

⁶Iake attu iato la undaka’ mate tu tolino, apa tae’ naappa’i; nakamorai la mate, apa iatu kamatean mallai dio mai kalena.

⁷Iatu rupa batik butung to darang tumaya parari, nadao ulunna den susi makota takua bulaan, sia lindona susi lindo tau.

⁸Sia ma’beluak susi beluak baine na isinna susi isi singa.

⁹Sia dadanna susi bayu bassi, na oni pani’na susi oni kareta naturu’ darang ma’baanan sigalunturan la parari.

¹⁰Sia keikko’ susi te’tek-buku, nalan ikko’na den kuasanna la umpakario-rio tau limang bulan.

¹¹Sia umpodatu malaeka’na garonggong posi’ tana lambe’, lan basa Ibrani disanga Abadon, sia lan basa Grika disanga Apolion.

¹²Iatu kamaparrisan bunga’na lendu’mo. Tiromi la sae pole’opa da’dua kamaparrisan undinna.

¹³Iatu malaeka’ ma’pennannanna umpannoni tarompe’ puana, angku rangi misa’ gamara sun lan mai tu a’pa’ tanduk inan pemalaran bulaan dio oloNa Puang Matua,

¹⁴ma’kada lako malaeka’ ma’pennannanna tu untoe tarompe’ pua: Rampananni tu a’pa’ malaeka’ dipungo sikandappi’ salu kapua, iamo salu Efrat.

¹⁵Narampanammi tu a’pa’ malaeka’ tu inang tumayamo, ke te’te’ sia allo sia bulan sia taun iato, kumua anna patei tu sangtaa tallunna mintu’ tolino.

¹⁶Iatu budanna mintu’ surodadu ma’darang duanglampa lampana, mangkamo kurangi tu bilanganna.

¹⁷Iatu pentiroku mintu’ darang sia mintu’ to ussakei takua susite: tau iato mai ma’bayu bassi mararang susi api sia masekke’ sia ma’rupa solo’; sia iatu ulu darang susi ulu singa sia lan mai sadangna tassu’ tu api sia rambu sia solo’.

¹⁸Tete dio to tallu kamaparrisan iato, anna sangtaa talluna mintu’ tolino mate: napatei api sia rambu sia solo’ tu sun lan mai sadangna.

¹⁹Belanna iatu kamatotoranna mintu’ darang iato lan sadangna sia dio ikko’na: belanna iatu ikko’na butung ula’ keulu, napasanggangan.

²⁰Sia mintu’ tolino senga’ tu tae’ napatei te mintu’ kasanggangan iate, tae’ duka namengkatoba’ dio mai penggauranna, kumua da natontong umpenombai mintu’ deata masussu’ sia umpa’deatai bulaan, salaka, tambaga, batu, ba’tu kayu, tu tae’ napakita ba’tu parangi ba’tu lumingka.

²¹Tae’ dukapa namengkatoba’ umpatei tau ba’tu umpogau’ pangissanan ba’tu gau’ sala ba’tu kabokoan.